اتالعان ءىس-شاراعا شىڭعىس ايتماتوۆتىڭ ۇلى, «ىستىقكول» فورۋمىنىڭ پرەزيدەنتى اسقار ايتماتوۆ, نازارباەۆ ۋنيۆەرسيتەتتىڭ پرەزيدەنتى شيگەو كاتسۋ, قىرعىز ۇلتتىق اكادەمياسى ش.ايتماتوۆ اتىنداعى ءتىل جانە ادەبيەت ينستيتۋتىنىڭ ديرەكتورى, اكادەميك ابدىلداجان اقماتاليەۆ, تۇركيانىڭ ارداحان ۋنيۆەرسيتەتىنىڭ پروفەسسورى, عالىم ورحان سويلەمەز, بەلگىلى رەجيسسەر, حالىق ءارتىسى تالعات تەمەنوۆ جانە وزگە دە قالامگەرلەر, عالىمدار, جوعارى وقۋ ورىندارىنىڭ وقىتۋشى-پروفەسسورلارى جانە مەكتەپ باسشىلارى, مۇعالىمدەر مەن ستۋدەنتتەر قاتىستى.
ادەبي كەشتىڭ العاشقى ءسوزىن شيگەو كاتسۋ مىرزا باستاپ, كەلگەن قوناقتارعا العىس ايتتى. ول ايتماتوۆ شىعارمالارىن ۋنيۆەرسيتەت جاستارىنىڭ ءسۇيىپ وقيتىنىن جەتكىزسە, تالعات تەمەنوۆ شىڭعىس شىعارمالارىنىڭ قۇندىلىعىنا توقتالدى. رەجيسسەر «مەن ادامزاتتىڭ ايتماتوۆىنىڭ ءبىراز شىعارمالارىنا رەجيسسەرلىك ەتكەنىم ءۇشىن دە ءوزىمدى باقىتتى سانايمىن» دەگەن اقجارما تىلەگىن ايتتى.
كەش بارىسىندا قاليبەك قۋانىشباەۆ اتىنداعى قازاق تەاترىنىڭ جاس ارتىستەرى مەن نازارباەۆ ۋنيۆەرسيتەتتىڭ ستۋدەنتتەرى شىڭعىس ايتماتوۆتىڭ شىعارمالارىنان ساحنالانعان كورىنىستەر قويدى. «انا – جەر انا», «شىنارىم مەنىڭ, شىرايلىم مەنىڭ», ء«جاميلا» شىعارمالارىنان كورسەتىلگەن ۇزىندىلەر وتە اسەرلى شىقتى. سونىمەن بىرگە ستۋدەنتتەر قالامگەر تۋىندىلارىنان اعىلشىن تىلىندە ۇزىندىلەر وقىپ, كەلگەن قوناقتارعا تاماشا كوڭىل كۇي سىيلادى.
وسىنداي اسەرلى ساتتەردەن سوڭ اسقار شىڭعىس ۇلىنا ءسوز بەرىلدى. اڭگىمەسىن العىس ايتۋدان باستاعان ا.ايتماتوۆ قازاق حالقىنىڭ اكەسىنە دەگەن ىقىلاسى مەن قۇرمەتىنىڭ ەرەكشە ەكەنىن تىلگە تيەك ەتتى. «مەن ءۇشىن بۇگىنگى كەزدەسۋدىڭ ورنى بولەك, شىڭعىس شىعارمالارى قاي ۋاقىتتىڭ دا جاستارىنىڭ جان دۇنيەسىنە ءوز اسەرىن قالدىرارى ءسوزسىز. بۇگىنگى كەش تە سونىڭ ءبىر ايعاعىنداي» دەدى.
سونىمەن بىرگە ورحان سويلەمەز, ابدىلداجان اقماتاليەۆ, نازارباەۆ ۋنيۆەرسيتەتتىڭ پروفەسسورى, رۋحاني جاڭعىرۋ مادەني ورتالىعىنىڭ ديرەكتورى گۇلتاس سايىنقىزى قالامگەردىڭ ادام جانىنىڭ ايناسىنداي ايرىقشا شىعارمالارى جايلى ويلارىمەن ءبولىستى.
ۇلاربەك نۇرعالىم ۇلى,
«ەگەمەن قازاقستان»
