ق. توقاەۆ قازاقستاندا قىتايمەن ستراتەگيالىق ارىپتەستىكتى دامىتۋعا ەرەكشە ءمان بەرىلەتىنىن اتاپ ءوتتى. سەنات توراعاسى پرەزيدەنت نۇرسۇلتان نازارباەۆ پەن قىتاي توراعاسى سي تسزينپين اراسىنداعى سەنىمدى قاتىناستار ءوزارا تابىستى ءىس-قيمىلدىڭ كەپىلى ەكەنىن جانە ولار قول جەتكىزگەن ۋاعدالاستىقتاردا ەكىجاقتى قاتىناستاردىڭ مازمۇنى مەن كۇن ءتارتىبى بەلگىلەنەتىنىن اتاپ ءوتتى.
تاراپتار ء«بىر بەلدەۋ, ءبىر جول» جاھاندىق باستامانىڭ قۇرامداس بولىگىنە اينالعان قىتايلىق «جىبەك جولى ەكونوميكالىق بەلدەۋى» ستراتەگياسى اياسىنداعى ىنتىماقتاستىققا جوعارى باعا بەردى. ق.توقاەۆتىڭ پىكىرىنشە, بۇل باستاما تابىستى ىسكە اسقاندا ەكىجاقتى ىنتىماقتاستىققا كۇشتى سەرپىن بەرىپ, جاھاندىق ەكونوميكانى باياۋ قالىپتان ورنىقتى دامۋ جولىنا شىعارۋعا ىقپال ەتەدى. بۇل تۇرعىدا «نۇرلى جول» باعدارلاماسى مەن قىتايلىق ستراتەگيانىڭ ۇشتاسۋىنىڭ ءمانى ەرەكشە زور. توراعا قازاقستان مەن قحر-دىڭ جاڭعىرۋ ماسەلەلەرى بويىنشا تاجىريبە جانە اقپارات الماسۋ ءۇشىن ەكى ەلدىڭ ءتۇرلى مەكەمەلەرى اراسىندا ىنتىماقتاستىق پەن ءوزارا ءىس-قيمىل قالىپتاستىرۋ قاجەت دەپ سانايدى.
سەنات توراعاسى ەكىجاقتى ساياسي ۇنقاتىسۋدىڭ ماڭىزدى بولىگى بولىپ تابىلاتىن پارلامەنتارالىق بايلانىستارعا قارقىن بەرۋگە نازار اۋداردى جانە حالىق وكىلدەرىنىڭ بۇكىلقىتاي جينالىسى تۇراقتى كوميتەتى توراعاسىنىڭ قازاقستانعا الداعى ساپارى ىنتىماقتاستىققا ەلەۋلى سەرپىن بەرەتىنىن اتاپ ءوتتى.
ء«بىزدىڭ ەلدەرىمىزدىڭ ۇكىمەت ورگاندارى اراسىنداعى بايلانىستار مەن كونسۋلتاتسيالاردى بەلسەندى جۇرگىزۋ ەكى ەلدىڭ ءتۇرلى سالاداعى بايلانىستارىنىڭ ماڭىزدى باعىتتارى بولىپ تابىلادى. تۋىنداعان بارلىق ماسەلەلەر دوستىق رۋحى مەن ءوزارا قۇرمەت اياسىندا, مامىلەگە كەلۋ نەگىزىندە, ەڭ الدىمەن ديپلوماتيالىق جولدارمەن شەشىلۋى ءتيىس», - دەپ اتاپ ءوتتى ق.توقاەۆ.
ق. توقاەۆ استانا قحر شىڭجاڭ-ۇيعىر اۆتونوميالىق اۋدانىمەن تۇراقتى, ورنىقتى جانە قاۋىپسىز دامۋعا مۇددەلى ەكەنىن, سوندىقتان وسى ايماقتىڭ ەكونوميكالىق جەتىستىكتەرىنە ءجىتى نازار اۋدارىلىپ وتىراتىنىن ايتتى. قازاقستان سونىمەن قاتار ەكىجاقتى دەڭگەيدەگى جانە كوپتاراپتى سيپاتتاعى, ەڭ الدىمەن تەرروريزم, سەپاراتيزم جانە ەكسترەميزمگە قارسى كۇرەستە شىۇ اياسىنداعى ىنتىماقتاستىققا دا مۇددەلى.
