وقۋ-جاتتىعۋعا ۇقشۇ-عا مۇشە مەملەكەتتەردىڭ – ارمەنيا رەسپۋبليكاسىنىڭ, بەلارۋس رەسپۋبليكاسىنىڭ, قازاقستان رەسپۋبليكاسىنىڭ قىرعىز رەسپۋبليكاسىنىڭ, رەسەي فەدەراتسياسى مەن تاجىكستان رەسپۋبليكاسىنىڭ توتەنشە جاعدايلاردىڭ الدىن الۋ جانە ولاردىڭ سالدارىن جويۋ سالاسىنداعى ۋاكىلەتتى ورگاندارىنىڭ قۇتقارۋ بولىمشەلەرى قاتىستى.
وقۋ-جاتتىعۋدىڭ ءبىرىنشى كۇنى (اعىمداعى جىلعى 10 قىركۇيەك) وقۋ-جاتتىعۋدىڭ 2 كەزەڭى پىسىقتالادى, ونىڭ اياسىندا كوماندالىق-شتابتىق ويىن فورماتىندا جەر سىلكىنىسىنىڭ قاتەرى مەن تۋىنداۋ كەزىندەگى ءىس-قيمىلداردى پىسىقتاۋ, ۇقشۇ-عا مۇشە مەملەكەتتەردىڭ قۇتقارۋ بولىمشەلەرىنىڭ كۇشتەرى مەن قۇرالدارىنىڭ توپتارىن ناقتىلاۋ بويىنشا جەدەل شتابتىڭ جۇمىسى ۇيىمداستىرىلدى.
2018 جىلعى 11 قىركۇيەكتە ۇقشۇ قۇتقارۋ بولىمشەلەرىن دايارلاۋ سالاسىنداعى «جارتاستى قالا – استانا» بازالىق پوليگونىندا (الماتى وبلىسى, ىلە اۋدانى, تامعالى تاس شاتقالى) وقۋ-جاتتىعۋدىڭ پراكتيكالىق بولىگى ءوتتى.
وقۋ-جاتتىعۋدىڭ 3-كەزەڭى اياسىندا اۆاريالىق-قۇتقارۋ تەحنيكالارى مەن جابدىقتارىنىڭ كورمەسى ءوتتى.
پراكتيكالىق ءىس-قيمىلداردى پىسىقتاۋ ءۇشىن توعىز وقۋ ورنى انىقتالدى, وندا ءارتۇرلى توتەنشە جاعدايلارعا يميتاتسيا جاسالدى. ءاربىر ورىننىڭ ءوز ماقساتى, كەزەڭدەرى جانە وتكىزۋ شارتتارى بار.
وقۋ-جاتتىعۋدىڭ اڭىزى بويىنشا ەلدى مەكەن اۋماعىندا جويقىن جەر سىلكىنىسى سالدارىنان ونەركاسىپتىك عيماراتتار مەن قۇرىلىستار قيرادى, كوپىر بۇزىلدى, قاۋىپتى جانە راديواكتيۆتى زاتتار توگىلدى, ەكىنشى فاكتورلارعا بايلانىستى ءارتۇرلى ورتتەر ورىن الدى, زارداپ شەككەندەر بار.
قۇتقارۋشىلار اۋە كەمەلەرىن قولدانۋ ارقىلى جەر سىلكىنىسى ايماعىنا بارلاۋ, كينولوگيالىق ەسەپتەرى بار ارنايى بەلگىلەنگەن توپتاردى دەسانتتاۋ جۇمىستارىن جۇرگىزدى, قۇرىلىس كونسترۋكتسيالارى ايماعىندا جانە حيميالىق زاقىمدانۋ شارتتارىندا اۆاريالىق-قۇتقارۋ جۇمىستار كورسەتىلدى, توڭىرەكتى گازسىزداندىرۋ جانە زارداپ شەككەن ادامداردى ارنايى تازالاۋ جۇمىستارىن جۇرگىزدى.
بۇدان باسقا ورتتەردى ءسوندىرۋ جانە تەمىرجول كولىگىندە اۆاريالىق-قۇتقارۋ جانە كەزەك كۇتتىرمەيتىن جۇمىستار جۇرگىزۋ, زارداپ شەككەن ادامدارعا العاشقى مەديتسينالىق كومەك كورسەتۋ, زارداپ شەككەن حالىق ءۇشىن دالا لاگەرىن, حيميالىق دالا زەرتحاناسىن ورناتۋ جانە ونىڭ جۇمىسىن ۇيىمداستىرۋ بويىنشا بىرلەسكەن ءىس-قيمىلدار پىسىقتالدى.
اۆاريالىق-قۇتقارۋ جۇمىستارىن جۇرگىزۋ بارىسىندا ءورت ءسوندىرۋ جانە قۇتقارۋ بولىمشەلەرى, قۇتقارۋ اۆياتسياسى, تىكۇشاق تۇرىندەگى ۇشقىشى جوق ۇشۋ اپپاراتى, روبوت تەحنيكالىق قۇرىلعىلار جۇمىلدىرىلدى. وقۋ-جاتتىعۋعا بارلىعى 633 ءورت ءسوندىرۋشى مەن قۇتقارۋشى, 151 بىرلىك ارنايى تەحنيكا, 5 تىكۇشاق قاتىستى.
ۇقشۇ-عا مۇشە مەملەكەتتەردىڭ قۇتقارۋشىلارى وقۋ-جاتتىعۋ بارىسىندا جويقىن جەر سىلكىنىسى سالدارىن جويۋ كەزىندەگى پراكتيكالىق داعدىلاردى جەتىلىدىرىپ قانا قويماي, قۇتقارۋ وپەراتسيالارىن جۇرگىزۋ تاجىريبەسىمەن دە الماستى.
جالپى التى ەل قۇتقارۋ بولىمشەلەرىنىڭ مانەۆرلەرى بىرلەسكەن كۇشتەر توتەنشە جاعدايلاردى جويۋ كەزىندە ويداعىداي ءوزارا ءىس-قيمىل جاساۋعا قابىلەتتى ەكەنىن كورسەتتى.
