قازاق ءمۇسىن ونەرىندە وشپەس ءىز قالدىرعان قىلقالام شەبەرىنىڭ ءومىر جولى مەن شىعارماشىلىعىن ناسيحاتتاۋدى ماقسات ەتكەن كورمەگە ءمۇسىنشىنىڭ ءار جىلدارى جاساعان «توميريس», «تۇڭعىش», «سالت اتتى», «كەزدەسۋ», «بي», «بۇركىتشى» سىندى 16 ءمۇسىنى, قىزى ءساندى ابىشەۆانىڭ كەسكىندەمەلىك تۋىندىلارى قويىلعان.
باقىتجان ابىشەۆتىڭ ەسىمى ەلىمىزدەگى كوپتەگەن ەسكەرتكىشتەردىڭ اۆتورى رەتىندە بەلگىلى. استانادا اتاتۇرىككە, ءاليا مولداعۇلوۆاعا, جاياۋ مۇساعا ارنالعان ەسكەرتكىشتەرى ورنالاسقان. توقاش بوكين, جامبىل جاباەۆ, كەنەن ازىرباەۆ, ءادي شارىپوۆتەردىڭ ەسكەرتكىشتەرى الماتىعا كورىك بەرىپ تۇر. اتىراۋدىڭ ورتالىق الاڭىنداعى يساتاي مەن ماحامبەت ەسكەرتكىشى دە ءمۇسىنشىنىڭ دارا قولتاڭباسىن ايقىندايدى.
كورمەنىڭ اشىلۋ سالتاناتىنا قاتىسقان ءمۇسىنشىنىڭ زايىبى, قازاقستان رەسپۋبليكاسىنىڭ ەڭبەك سىڭگەن ءارتىسى شامشاگۇل مەڭدياروۆا: «باقىتجان جۇمىس ىستەگەندە سىرتقى فورماسىنا عانا ءمان بەرىپ قويمايدى, ءار كەيىپكەرىنىڭ جان-دۇنيەسىنە تەرەڭ ۇڭىلە بىلەدى. اقىل, جۇرەك جانە قول – وسى ۇشەۋى بىرىككەندە عانا قۇندى دۇنيە شىعادى دەيتىن. اسىرەسە جۇيرىك تۇلپاردى جاقسى كوردى, سوندىقتان بولسا كەرەك, ونىڭ تۋىندىلارىنىڭ قاتارىندا جىلقى بەينەسى كوپ كەزدەسەدى», دەيدى.
باقىتگۇل باباش,
«ەگەمەن قازاقستان»
اتىراۋ
