ونەر مەن مادەنيەتتى ورىستەتىپ وتىرعان مادەنيەت وشاعى «رۋحاني قازىنا» باعدارلاماسى اياسىنداعى اسقارالى مىندەتتەردى جۇزەگە اسىرۋ ءۇشىن ۇلتىمىزدىڭ رۋحاني بولمىسىن, حالقىمىزدىڭ جان دۇنيەسىن بايىتا تۇسەر باسىم باعىتتاردى انىقتاپ, الداعى مىندەتتەردى سارالاپ العان.
– مادەنيەت سارايىنىڭ بەدەلىن كوتەرۋ ءۇشىن بۇرىننان جۇزەگە اسىپ كەلە جاتقان مادەني جۇمىستاردى ەكشەپ, جاڭالاپ, زامان تالابىنا لايىقتاپ شيراتۋ قاجەت بولدى, – دەيدى مادەنيەت سارايىنىڭ ديرەكتورى كۇمىس ءبىلالوۆا, – جاندى جۇمىستىڭ ارقاسىندا تابىسىمىز دا از ەمەس. ەڭ باستىسى مادەنيەت سارايى كوكشەتاۋلىقتاردىڭ رۋحاني ورتالىعىنا اينالدى. جۇرت تەك مادەني شارالاردى تاماشالاۋعا عانا ەمەس, وزدەرى دە قاتىسۋعا ىنتالى. ال بۇل ەل بىرلىگى دەگەن ءسوز.
ايتسا ايتقانداي, مادەنيەت سارايىنىڭ كوركەمونەرپازدارى قاتارىنان بىرنەشە جىل بويى ءداستۇرلى وبلىستىق «اقمولا جۇلدىزدارى» بايقاۋىنىڭ باس جۇلدەسىن ەنشىلەپ, بىرنەشە اۆتوكولىككە يە بولعان. ونەر بايگەسى دە باق پەن باپ شاباتىن الامان عوي. جارىس جولىندا دەلەبەڭدى قوزدىرار, ءبۇيىر قىزدىرار سونى سوقپاقتىڭ بولعانى قانداي جاقسى. تىڭنان جول ىزدەگەن بۇلار «جاس باتىر», «رەترو اۋەندەرى», «سۇلۋ حانشايىم», «التىن داۋىس» ءتارىزدى سايىستاردى داستۇرگە اينالدىردى. جىلت ەتكەن جاڭالىق حالىقتى وزىنە باۋراي ءتۇستى. ءسويتىپ كوپشىلىك ءسۇيىپ تىڭدايتىن, تىڭداپ قانا قويماي جان جۇرەكتەرىندە شۋاقتى جىلىلىق ەستىرتەتىن كورەرمەندەردىڭ كوزايىمىنا اينالعان مادەني شارالارعا اينالدى.
كەلەر كۇندەردىڭ كوكجيەگى ارايلانا ءتۇسۋ ءۇشىن دە الىسقا ارناپ جوسپار جاساعان ساراي باسشىسى «كوكشەتاۋ», «ون التى قىز», «شالقىما» جانە «كەربەز سۇلۋ» حالىقتىق بي انسامبلدەرىنە تاجىريبەلى بالەتمەيستەرلەر مەن ديريجەرلەردى شاقىردى. ءسويتىپ جاڭا باعدارلامالار قۇرىلدى. 2010 جىلى دومبىرانى ناسيحاتتاۋ ماقساتىندا «كوركەمتاۋ» بالالار وركەسترىن قۇرىپ, سونىعا سوقپاق سالدى. وركەستر بۇگىندە كيەلى كۇي الەمىنە نىق قادام باسقان ۇجىمعا اينالدى. كوكشەتاۋلىق بالالار دا تىلسىم ونەردىڭ قىر-سىرىن ۇعۋعا قۇمارتا ءتۇستى. ونى وسى ۇجىمعا مۇشە بولۋعا ءوتىنىش بىلدىرۋشىلەردىڭ سانىنان-اق اڭعارۋعا بولادى. اۋەل باستاعى ماقسات بابالاردىڭ كوكىرەگىن تەربەتكەن باعزى ونەردىڭ باعى اشىلىپ كەلە جاتقاندىعىن الاقايلاپ ايتۋعا ابدەن بولادى.
بۇگىنگى زاماننىڭ مۇمكىندىكتەرىنەن دە قۇرالاقان قالىپ وتىرعان جوق. ينتەرنەت فەستيۆالدار مەن سايىستار ۇيىمداستىرۋ ارقىلى كوكشەتاۋلىق كوركەمونەرپازداردىڭ كەمەل ونەرىن الەمدىك كەڭىستىكتە جۇيەلى ناسيحاتتاۋ جولعا قويىلدى. ارقيلى تاقىرىپتاعى ينتەرنەت كونفەرەنتسيالار مەن سالماقتى پىكىر ايتىلاتىن سەمينارلار ۇيىمداستىرىلىپ, كوممۋنيكاتسيالار مەن اقپاراتتى وڭدەۋ ادىستەرىن يگەرىپ, الەۋمەتتىك جەلىلەرمەن دە جۇمىس ىستەۋدە.
بۇگىندە ساراي ىشىندە بي ونەرى بيىك دەڭگەيدە دامىپ كەلە جاتىر. ەلىمىزدى بىلاي قويعاندا, شەتەلدىڭ تالاي تالعامپاز كورەرمەنىن تامسانتقان «ون التى قىز» حالىقتىق بي ءانسامبلىنىڭ ونەردەگى ءورىسى – جاس تولقىنعا جاقسى ونەگە. «شالقىما», «تۇمار», «پوليانكا», «سۋۆەنير» بي انسامبلدەرىنىڭ جۇمىسى جاڭا سيپاتقا يە بولدى. ءبىر قىزىعى, مادەنيەت سارايىنىڭ كوركەمونەرپازدار ۇيىرمەلەرىنە ەڭبەكتەگەن بالادان ەڭكەيگەن كارىگە دەيىن, ياكي بەس جاستان سەكسەن جاسقا دەيىنگى ادامدار قاتىسادى ەكەن. وسىنداعى ارداگەرلەر حورى جارتى عاسىر بويى ۇزبەي جۇمىس ىستەپ كەلەدى.
كوكشەتاۋ – اۋەلەگەن انىمەن اتى شىققان ولكە. ىلكىدەن جالعاسىپ كەلە جاتقان ادەمى ونەردى ناسيحاتتاۋ, تالاپتى بالالاردى تاربيەلەۋ وڭ جولعا قويىلعان. ماسەلەن, مادەنيەت سارايىنداعى «جۇلدىز», «شامشىراق», «بالداۋرەن» ءان ستۋديالارىندا تالانتتى بالالار تاربيەلەنۋدە. ولاردىڭ ونەردەگى ءورىسىن وبلىس ورتالىعىنىڭ تۇرعىندارى كورىپ, تىڭداپ, ءتانتى بولىپ ءجۇر.
تاعى ءبىر ايتا كەتەرلىگى, ەل ىشىندە ەلەۋلى ىستەرگە مۇرىندىق بولعان «رۋحاني جاڭعىرۋ» باعدارلاماسى اياسىندا جاڭا جوبالار جۇزەگە اسىرىلۋدا. سونىڭ ءبىرى «الەم» جوباسى شەڭبەرىندە حالىقارالىق فەستيۆالدارعا قاتىسىپ, ۇلتتىق ونەردىڭ ۇلاعاتىن ناسيحاتتاۋ قولعا الىنعان. جاستار اراسىندا بۇرىنعى قالىپتاسقان سانانى وزگەرتۋ, اقىل-وي قابىلەتتەرىن ارتتىرۋ, ەڭ باستىسى وتانىمىزعا دەگەن وت جالىنداي لاپىلداعان پاتريوتتىق سەزىمدى قالىپتاستىرۋ جۇزەگە اسىرىلۋدا. وسى جوبا اياسىندا وتكەن جىلى «پوليانكا» ۇلگىلى ۇجىمى سانكت-پەتەربۋرگ, فينليانديا, شۆەتسيا مەملەكەتتەرىندە وتكەن حالىقارالىق بايقاۋلاردا باس جۇلدەنى ەنشىلەدى. ۇستىمىزدەگى جىلى پولشادا وتكەن حالىقارالىق بايقاۋدا «شالقىما» بي ءانسامبلى ءبىرىنشى ورىنعا جانە «ۇزدىك حورەوگرافيا» اتالىمىنا يە بولدى. تاعى ءبىر جوبا تۋرالى تاراتىپ ايتا كەتۋگە بولادى. بۇل جوبا «ونەرىمىز وڭىرلەرگە» دەپ اتالاتىن. شىندىعىن ايتقاندا, وڭىردەگى كەيبىر شالعايداعى شاعىن اۋىلدار رۋحاني ازىققا سۋساپ وتىر. وسى ءبىر ولقىلىقتىڭ ورنىن تولايىم تولتىرا الماعانىمەن, قارلىعاشتىڭ قاناتىنا سۋ قۇيىپ ءورت سوندىرگەنى ءتارىزدى شاراپاتىمىز ءتيسىن دەگەن ۇيىمشىل ۇجىم ەل ىشىنە گاسترولدىك ساپارمەن شىعىپ, كونتسەرتتەر مەن كەزدەسۋلەر ۇيىمداستىرۋدا. ماقسات – بارلىق اۋدانداردى قامتۋ.
– مادەنيەت سالاسىندا ىستەلىپ جاتقان جۇمىس اۋقىمىن كوڭىل تارازىسىمەن عانا ەكشەۋگە بولار, – دەيدى كۇمىس ابدىبەكقىزى, – زاۋىتتار مەن فابريكالار ءوز ءونىمىن جارقىراتىپ كورسەتە السا, ءبىز ەل جۇرەگىندەگى ۇلى ونەردىڭ ۇردىسىمەن عانا ۇقتىرا الامىز. ءاربىر وتكىزگەن ءىس-شارامىزدان كورەرمەن رۋحاني ازىق السا, ءبىز ءۇشىن سول باقىت.
وسى سالانىڭ سان جىلدان بەرى پۇشپاعىن يلەپ كەلە جاتقان ىسكەر جاننىڭ پايىمىنا ءبىزدىڭ دە الىپ-قوسارىمىز جوق.
بايقال ءبايادىل,
«ەگەمەن قازاقستان»
اقمولا وبلىسى
