وتكەن شىلدە ايىندا كوكتۇما اۋىلىنداعى «سامال» پانسيوناتىندا دەمالىستا بولىپ قايتتىق. پانسيونات يەسى سويۋزحان نوسەرحانقىزى بالالارىمەن دەمالۋشىلارعا بارلىق جاعداي جاساپ وتىر. ءۇش مەزگىل ءدامدى ىستىق تاماقپەن قامتاماسىز ەتەدى. ازىق-ت ۇلىكتى وزدەرى ءار جەردەن اكەلەدى. نەگىزىنەن اجەپتاۋىر الىس ءۇشارال قالاسىنان تاسيدى. دەمالاتىن جەردە تولىق جابدىقتالعان بولمەلەر. بالالار الاڭى. كەشكە بي وتكىزەتىن ورىن. تابيعي شوپپەن قاپتالىپ, اۋاسى ارۋاقىتتا تازا جازعى اسحانا. دەمالۋشىلاردىڭ سانى ءجۇز ادامعا جەتەتىن ۋاقىتتارى دا بولاتىن كورىنەدى. كەلۋشىلەردىڭ كوپشىلىگى الماتىلىقتار. ولاردىڭ بىرازىمەن سويلەسكەنىمدە پانسيونات يەسىنە ريزا ەكەندىكتەرىن ءبىلدىردى.
ەكىنشى ءبىر پانسيونات يەسى ءالىم. ونىڭ مەكەن ەتكەن جەرى كولدىڭ جيەگى. بۇل مەكەندە بىرنەشە كولدە سەرۋەندەيتىن موتورلى كىشىگىرىم ءجۇزۋ تەحنيكالارى بار. تاۋدا شارۋاشىلىعى بار ەكەن. ءبىراز مال ونىمدەرىن سودان قامتاماسىز ەتىپ وتىراتىن كورىنەدى. بۇل ونىمدەر ەشقانداي حيميالىق قوسپاسىز ەكولوگيالىق تازا. وسى ءبىر جارىم مىڭداي حالقى بار كوكتۇما اۋىلىنىڭ ءبىرازىندا ءارتۇرلى كولەمدەگى پانسيوناتتاردىڭ بارىن بايقادىم. ونىمەن قوسا ءىرى قالالاردىڭ قالتالى ازاماتتارى ۇلكەن ءزاۋلىم عيماراتتار سالىپ, پانسيوناتتار اشىپ جاتقان كورىنەدى. سولاردىڭ بىرەۋى الماتىلىق ازامات مارات دەگەن كاسىپكەرمەن اڭگىمەلەسكەنىمدە, ول كىسى مۇنىڭ ءوزى ءۇشىن, دەمالۋعا كەلۋشىلەرگە دە, ونىمەن قوسا ۇكىمەتكە دە پايدالى ەكەندىگىن باياندادى.
وسىلاردىڭ ءبارىن ساراپتاپ قورتىندىلاعاندا, ءالى دە كولدىڭ جاعالاۋى تولىق يگەرىلىپ, جابدىقتالماعان. وسى ەلدى مەكەننەن ون بەس شاقىرىمداي جەردەگى اقشي ەلدى مەكەنى جاقسى يگەرىلىپ جاتقان كورىنەدى. جەرگىلىكتى تۇرعىنداردىڭ ايتۋىنشا, كوكتۇما ءوڭىرىنىڭ اقشيدەن كەيبىر ارتىقشىلىقتارى بار ەكەن. بۇل ەل تۇرعىندارىنىڭ سۇرايتىنى – جولدى جاقسارتۋ. ازىق-ت ۇلىك الاتىن جەرلەردى جاقىنداتۋ. كولدىڭ جيەگىن اباتتاندىرۋ. مەنىڭ ءوزىمنىڭ كوزىممەن كورگەنىم كولدىڭ كەيبىر جاعالارى تىك جار, ءتىپتى بيىكتىگى جەتى-سەگىز مەترگە جەتەدى. وپىرىلىپ قۇلاپ جاتىر جانە بايقاماساڭ تىك جاردان قۇلاپ كەتۋ قاۋىپى بار. ارينە, الاكولدىڭ كەلەشەكتە جاقسى دەمالىس ورنىنا اينالاتىنىنا كامىل سەنىمىز. ايتسە دە كولدىڭ كەيبىر جەرلەرىنە ەرەكشە كوڭىل ءبولىنىپ, كەيبىر جەرلەرى ۇمىت قالعان سياقتى. وسى ولقىلىقتىڭ ورنىن تولتىرۋعا بارلىق جاعداي جاسالسا, ەلىمىزدە ءتۋريزمدى دامىتۋعا قوسىلعان ۇلەس بولار ەدى.
ەركىن داۋەش ۇلى,
قازاقستان جۋرناليستەر وداعىنىڭ مۇشەسى
