ارداگەرلەر كەڭەسىنىڭ ءوز ءۇيى بار

وسى كەزگە دەيىن وبلىستىق ارداگەرلەر كەڭەسى كورىنگەن مەكەمەدەگى ارتىلعان بولمەدە وتىرىپ كەلگەن بولاتىن. ال اعا ۇرپاقتىڭ دا قوعامدا ۇلكەن ورنى بار. ءومىردى كورگەن, تاجىريبەسى مول اقساقالدار كەڭەسىمەن اتقارۋشى بيلىك تە ساناسىپ وتىرادى. وبلىس جانە قوستاناي  قالاسى  اكىمدەرى كەڭەسە وتىرىپ,  قالانىڭ  قاق ورتاسىنداعى  ەكى قاباتتى عيماراتتى وبلىستىق ارداگەرلەر كەڭەسىنە تۇتاسىمەن بەردى. بۇل  قىزىل كىرپىشتەن ورنەكتەلىپ سالىنعان  عيمارات وتكەن عاسىردىڭ باسىندا ءبىر كوپەستىڭ  وزىنە ارناپ سالدىرعان ءۇيى ەكەن. ول قالا تاريحىنىڭ  ارحيتەكتۋرالىق  جادىگەرىنىڭ ءبىرى سانالىپ, مەملەكەتتىك قورعاۋعا الىنعان. كىرپىشى دە, ىرگەتاسى دا قايراقتاي ءۇي مىقتى, ماماندار ونىڭ ءالى ءبىر-ەكى عاسىر تاپجىلماي تۇراتىنىنا سەنىمدى. ءۇيدىڭ ءبىرىنشى قاباتىن قوستاناي قالالىق , ال ەكىنشى قاباتىنا وبلىستىق ارداگەرلەر كەڭەستەرى ورنالاستى. ارداگەرلەر ءۇيىنىڭ ەدەنىنە اسەم كىلەمدەر توسەلگەن,  استىڭعى قاباتىندا 70 ادام  وتىراتىن ءماجىلىس زالى بار. جوعارعى قاباتتا ارداگەرلەردىڭ دەمالىس زالى جاساقتالدى. وندا تەلەۆيزور, كومپيۋتەر, شاحمات, دويبى قويىلعان. وبلىستىق كىتاپحانا ديرەكتورى گۇلجاماريا قازينا ارداگەرلەر ۇيىنە 200 كىتاپ سىيعا تارتتى. ەندى مۇندا اتالار مەن اجەلەرگە ارنالعان كىتاپحانا دا بولادى. ولار گازەت, جۋرنال تىگىندىلەرىن دە كىتاپحانادان تابادى. –ارداگەرلەردىڭ مۇنداي كەڭسە-ءۇيى كەز كەلگەن وبلىس ورتالىعىنان تابىلا بەرمەيدى.  بىزدە دە كوپكە دەيىن  ارداگەرلەر ءۇيى بولعان جوق. وبلىس باسشىلىعىنىڭ قامقورلىعى, قالا اكىمشىلىگى مەن كاسىپكەرلەردىڭ كومەگى ارقاسىندا قوستانايداعى  ءساندى ۇيلەردىڭ ءبىرىن ارداگەرلەر كەڭەسى يەمدەنىپ وتىر.  ەندى ءبىز ءوز شارالارىمىزدى وتكىزۋ ءۇشىن وزگەلەردىڭ اكت زالدارىن سۇراپ جاتپايمىز,–دەيدى وبلىستىق ارداگەرلەر كەڭەسىنىڭ توراعاسى كەنجەبەك ۋكين. ارداگەرلەر كەڭەسى ۇيىنە كەز كەلگەن زەينەتكەر كەلىپ, قاتارلاستارىمەن اڭگىمە-دۇكەن قۇرىپ, گازەت-جۋرنال وقىپ كەتۋىنە بولادى. ءمانى دە, ءسانى دە كەلىسكەن ۇيگە كەلگەن  قارتتار رۋحاني بايىپ قالادى. ءنازيرا جارىمبەتوۆا قوستاناي