جاڭا وقۋ جىلىندا الماتى قالاسىندا 240 مىڭنان استام بالا العاشقى قوڭىراۋ ۇنىمەن مەكتەپ تابالدىرىعىن اتتادى. ولاردىڭ 25 مىڭى العاشقى سىنىپقا بارعان بالدىرعاندار. بيىلعى ءبىلىم كۇنىنە وراي وڭتۇستىك استانادا 2300 بالاعا ارنالىپ ءتورت جاڭا مەكتەپ اشىلدى.
الماتى قالاسىنىڭ قۇرامىنا قوسىلعان ناۋرىزباي اۋدانىندا 1200 ورىندى مەكتەپ اشىلدى, وندا بالالاردىڭ ساپالى ءبىلىم الۋىنا تولىق مۇمكىندىك جاسالعان. جاڭا وقۋ ورنىندا روبوت تەحنيكالارى كابينەتتەرى, فيزيكا مەن حيميا سىنىپتارى, اتا-انالارعا ارنالعان بولمەلەر, ويىن الاڭدارى جاڭا جيھازدارمەن, كورنەكىلىكتەرمەن جابدىقتالعان. قاۋىپسىزدىك شارالارىنا دا ەرەكشە كوڭىل بولىنگەن.
مەكتەپتىڭ تاعى ءبىر ەرەكشەلىگى – زاعيپ جانە ناشار كورەتىن بالالار ءۇشىن برايل قارپىنە وقىتاتىن سىنىپتارمەن, ارنايى سانيتارلىق بولمەلەر جانە شاقىرۋ نۇكتەلەرىمەن قامتاماسىز ەتىلگەن.
قالا اكىمى باۋىرجان بايبەك جاڭا مەكتەپتىڭ وقۋشىلارى جانە اتا-انالارىمەن كەزدەستى. مۇندا وزدىگىنەن جۇرە المايتىن بالالارعا دا اربامەن جۇرۋگە قولايلى جاعداي جاسالعان. سونىمەن قاتار مەكتەپتە اتامەكەنىنە ورالعان وتباسىلار بالالارىنىڭ دا ەركىن ءبىلىم الۋىنا بارىنشا مۇمكىندىك قاراستىرىلعان.
قالا اكىمدىگى ءباسپاسوز قىزمەتىنىڭ دەرەكتەرى بويىنشا, بيىل ءبىلىم وشاقتارىن سالۋ مەن كۇردەلى جوندەۋدەن وتكىزۋگە 17 ملرد تەڭگەدەن استام قارجى بولىنگەن. وسى وقۋ جىلىنا وراي الماتىنىڭ الاتاۋ اۋدانىنداعى №151 مەكتەپ جانىنان سالىنعان 600 ورىندى قوسالقى نىسان پايدالانۋعا بەرىلسە, №26 مەكتەپتىڭ ەسكى عيماراتى جاڭارتىلدى. ال كۇزدىڭ سوڭىنا قاراي مۇندا 600 ورىندىق جانە №184, 185 مەكتەپتەر جانىنان 400 ورىندىق قوسالقى نىساندار اشىلاتىن بولادى.
ەلۆيرا سەرىكقىزى,
«ەگەمەن قازاقستان»
الماتى
