جۇلدىزدى جاستار «التىن كىتاپقا» ەندى

قوستانايدا ۇزدىكتەر مەن تالانتتاردى وبلىس جاستارىنىڭ «التىن كىتابىنا تىركەۋ» ءداستۇرى جالعاسىپ كەلەدى. بيىل رۋدنىي قالاسىنداعى «گورنياك» مادەني-دەمالىس سارايىندا  جۇلدىزدى جاستاردىڭ كەزدەسۋى جەتىنشى رەت وتكىزىلدى. وندا وبلىس اكىمى سەرگەي كۋلاگين جاستارعا «التىن كىتاپقا» ەنگەنى تۋرالى سەرتيفيكات پەن سىيلىقتار  تاپسىردى. سالتاناتتى كەزدەسۋگە «قوستاناي وبلىسى جاستارىنىڭ التىن كىتابىنىڭ»  2005-2011 جىلدار اراسىنداعى لاۋرەاتتارى, اۋىل جاستارىنىڭ, ۇكىمەتتىك ەمەس ۇيىمداردىڭ وكىلدەرى قاتىستى. وتكەن جىلى 117 جاستىڭ ەسىمى التىن سيامەن جازىلعان «قوستاناي وبلىسى جاستارىنىڭ التىن كىتابى» البومى وبلىستىق تاريحي-ولكەتانۋ مۋزەيىنە سالتاناتتى تۇردە تاپسىرىلعان بولاتىن.بيىل ءومىردىڭ بارلىق سالاسىنداعى ۇزدىك جاستاردىڭ ەسىمى جازىلاتىن وسىنداي البومنىڭ جاڭا بەتى اشىلدى. جاڭا  البومعا ەسىمى جازىلعان  ون ءۇش جاستىڭ اراسىندا اعىپ بارا جاتقان ادامدا سۋدان قۇتقارعان ەرجۇرەكتەر دە,مەديتسينا سالاسىنا يننوۆاتسيالىق جاڭالىق ەنگىزگەن دارىگەر, عالىمدار, وقۋ ۇزدىكتەرى,  تالانتتى ونەرپاز جاستار بار.  مىسالى وبلىستىق جول پوليتسياسىنىڭ قىزمەتكەرى  داۋلەت تىلەۋكەنوۆ ۇستىمىزدەگى جىلدىڭ مامىر ايىندا  توبىل وزەنىندەگى كوپىردەن سۋعا قۇلاپ كەتكەن ادامدى ارىپتەسىمەن بىرگە سۋدان قۇتقارىپ, وعان العاشقى مەديتسينالىق كومەك كورسەتىپ,  اجالدان امان قالدى. وسى ەرلىك ءىسى ءۇشىن داۋلەت  ىشكى ىستەر ءمينيسترىنىڭ بۇيرىعىمەن «قۇقىق ءتارتىبىن قامتاماسىز ەتۋدە ۇزدىك شىققانى ءۇشىن» مەدالىمەن ماراپاتتالدى. داۋلەتتىڭ ەسىمى «التىن كىتاپقا» ەنگەنىمەن ءوزى سالتاناتتى كەشكە كەلە المادى. ول جاڭاوزەندەگى جاعدايدى قالىپقا كەلتىرۋگە كومەكتەسۋ ءۇشىن ىسساپارمەن ماڭعىستاۋ وبلىسىنا ءجۇرىپ كەتكەن بولاتىن. رۋدنىي قالالىق اۋرۋحاناسىندا انەستەزيولوگ دارىگەر بولىپ ىستەيتىن ۆلاديمير پانچەنكو ءولىم مەن ءومىر جانتالاسقان ساتتە 750 ادامدى اجال تىرناعىنان  امان الىپ قالدى.  ۆلاديمير كۇندەلىكتى دارىگەرلىك  تاجىريبەسىندە انەستەزيولوگيانىڭ يننوۆاتسيالىق ءتۇرىن  ەنگىزىپ ءجۇر. وپەراتسيا ستولىندا جاتقان ناۋقاس ءۇشىن انەستەزيولوگيانىڭ  قاۋىپسىز جانە قولايلى ءتۇرى  نەيروستيمۋلياتور اپپاراتىنىڭ ارقاسىندا مۇمكىن بولدى. ۆلاديمير قولدانىسقا ەنگىزگەن بۇل اپپاراتتىڭ وبلىستا ءالى تەڭدەسى جوق. «التىن كىتاپقا» ەسىمى ەنگەن جاستارعا بەرىلگەن سەرتيفيكاتتىڭ نومەرى بەلگىلەنگەن. ولار كەيىن مۋزەيگە تاپسىرىلىپ وتىراتىن  البومنان ءوزىنىڭ ەسىمىن كەز كەلگەن ۋاقىتتا وسى  نومەر ارقىلى  وڭاي تاۋىپ الاتىن بولادى. بيىل «جاستاردىڭ التىن كىتابى» شارالارى تەك وبلىستا عانا ەمەس, اۋدانداردا دا وتە باستادى. بۇل ءداستۇردى تاران, اليەكول اۋدانى جانە ارقالىق قالاسىنىڭ جاستارى جالعاستىردى. ءار اۋداننىڭ, ءتىپتى ءار اۋىلدىڭ ءوز جۇلدىزدارى بولادى. اڭگىمە ولاردىڭ  قۇربىلارىنا جاقسى ۇلگىسىندە, ەلىنىڭ پاتريوتى بولۋىندا. جۇلدىزدى جاستار باردا ەلىمىزدىڭ بولاشاعى دا جارقىن. ءنازيرا جارىمبەتوۆا قوستاناي