ءفيلمنىڭ الەمدىك تۇساۋكەسەرى 4 قىركۇيەكتە وتكەن بولاتىن. «كوكجيەكتەر» اتتى كونكۋرستىق باعدارلاماسىندا وتاندىق فيلمنەن باسقا كينەماتوگرافيا سالاسى دامۋىنىڭ جاڭا تەندەنتسيالارىن ۇسىناتىن كوركەم 18 اۆتورلىق تۋىندىلار قاتىستى. مەرەيتويلى ۆەنەتسيا فەستيۆالىنىڭ جەڭىمپازدارىن 8 قىركۇەكتە جاريا بولدى.
اتاۋلى «ۇزدىك رەجيسسەر» جۇلدەسىن – «ارىستاندى» – فەستيۆالدىڭ ماراپاتتاۋ سالتاناتىندا پولشا كو-پروديۋسەرىنىڭ وكىلى اگنەشكا پۋچيلو الدى. رەجيسسەر ەمير بايعازين ماراپاتتاۋ راسىمىنە قاتىسا المادى, ويتكەنى ول «وزەن» ءفيلمىن تورونتو كينوفەستيۆالىندە تانىستىرۋ ءۇشىن كاناداعا ارنايى بارعان بولاتىن ( «وزەن» ءفيلمى نەگىزگى كونكۋرستىق «پلاتفورما» باعدارلاماسى شەڭبەرىندە كورسەتىلەدى).
ايتا كەتسەك, ەمير بايعازين بۇل ءفيلمنىڭ ستسەناري اۆتورى, رەجيسسەرى, قويۋشى وپەراتورى, پروديۋسەرى, سونىمەن قاتار, كارتينانىڭ مونتاج جۇمىستارىن دا ءوزى جاساعان. تريلوگيانىڭ سوڭعى ءبولىمىنىڭ (تريلوگيانىڭ العاشقى ەكى ءبولىمى - «اسلاننىڭ ساباقتارى» («ۋروكي گارموني») جانە ء«تورت وقيعا» («رانەنىي انگەل») فيلمدەرى) جارىققا شىعۋىنا قر مادەنيەت جانە سپورت مينيسترلىگى, ش.ايمانوۆ اتىنداعى «قازاقفيلم» اق, پولشانىڭ كينو ينستيتۋتى جانە Sorfond (نورۆەگيا) اتسالىستى. بۇل تۋىندى ستسەناري كەزىندە MPA APSA ازيا-تىنىق مۇحيتتىق كينواسسوتسياتسياسى گرانتىنىڭ قولداۋىنا يە بولدى.
ءفيلمنىڭ الەمدىك تۇساۋكەسەرىنەن كەيىن باتىستىڭ الەمگە ايگىلى باسىلىمدارى «وزەن» ءفيلمى تۋرالى جارىسا جازىپ, وڭ پىكىرلەرىن ءبىلدىرىپ جاتىر.
