جولداۋ تالاپتارى ءتۇسىندىرىلدى

تابيعي مونوپوليالاردى رەتتەۋ اگەنتتىگىنىڭ توراعاسى نۇرلان الدابەرگەنوۆ باستاعان جۇمىس توبى سولتۇستىك قازاقستان وبلىسىندا جۇمىس ساپارىمەن بولدى. جۇرتشىلىقپەن كەزدەسۋلەر جولداۋدان تۋىندايتىن تالاپتاردى تۇسىندىرۋگە ارنالدى.  №2 جىلۋ ەلەكتر ورتالىعىنداعى ينۆەستيتسيالىق جوبالاردىڭ جۇزەگە اسىرىلۋ بارىسىن جۇمىس توبى زەيىن قويا زەرتتەدى. مۇندا قوندىرعىلاردى كۇردەلى جوندەۋدەن وتكىزۋگە 2,8 ميلليارد تەڭگە جۇمسالعان.  تاياۋ ارادا №6 بۋ قازاندىعى پايدالانۋعا بەرىلمەك. كەلەسى جىلدان باستاپ 60 مەگاۆاتتىق جاڭا تۋربينا ىسكە قوسىلادى. سوڭعى جىلدارى  جەو-نىڭ ءوندىرىس قۋاتتىلىعى 330-360 مەگاۆاتقا ۇلعايىپ, ەنەرگيا ۇنەمدەۋ باعىتىندا دا وڭ كورسەتكىشتەرگە قول جەتكىزىپ وتىر. ارداگەرلەر كەڭەسى مۇشەلەرىنىڭ, تابيعي مونوپوليا سۋبەكتىلەرى جەتەكشىلەرىنىڭ, پاتەر يەلەرى كووپەراتيۆتەرى مەن قوعامدىق ۇيىمدار وكىلدەرىنىڭ قاتىسۋىمەن وتكەن جيىنعا نۇرلان الدابەرگەنوۆ پەن وبلىس اكىمى سەرىك ءبىلالوۆ قاتىسىپ, تۇرعىن ءۇي-كوممۋنالدىق شارۋاشىلىعىن جاڭعىرتۋ, تاريف ساياساتىن ۇيلەستىرۋ ماسەلەلەرى كەڭىنەن ءسوز ەتىلدى.  اگەنتتىك توراعاسى ءوز سوزىندە «جول كارتاسى»  اياسىندا  تۇرعىن ءۇي-كوممۋنالدىق شارۋاشىلىق نىساندارىن قالپىنا كەلتىرۋدە كوپ جۇمىستار اتقارىلعانىن, ەندىگى باستى نازار, جولداۋدا اتاپ كورسەتىلگەندەي, تۇرعىن ءۇي قاتىناسىنىڭ وڭتايلى مودەلىن قۇرۋدى قامتاماسىز ەتۋگە اۋدارىلىپ وتىرعانىن ايتا كەلىپ, ۇكىمەتتىڭ تاريف ساياساتىنداعى ۇستانىمىن اڭگىمەلەپ بەردى. كورشىلەس ەلدەرمەن سالىستىراتىن بولساق, جىلۋ قۋاتى بىزدە  ارزان. سول سياقتى سۋدىڭ تۇتىنۋ باعاسى دا تومەن. مۇنىڭ ءوزى ادامداردىڭ ءومىر ساپاسىن جاقسارتۋداعى مەملەكەت قامقورلىعىن ايعاقتاسا كەرەك, دەدى ن.الدابەرگەنوۆ. وڭىردەگى ينۆەستيتسيالىق مىندەتتەمەلەردىڭ ورىندالۋىن وڭ باعالادى.  ارتاراپتاندىرىلعان تاريفتەر ەنگىزۋ تاجىريبەسىن قۇپتادى.  باسقوسۋدا شىعىپ سويلەۋشىلەر شىعىن كوزدەرىن كەمىتۋدىڭ مۇمكىندىكتەرى تولىق پايدانىلماي وتىرعانىن اتاپ  كورسەتتى.  دەرەكتەردىڭ ارقيلىعىنان ناقتى جاعدايدى باعالاۋ قيىن. جىلۋ تراسسالارىنىڭ اشىق-شاشىق جاتاتىنىن ءجيى كەزدەستىرۋگە بولادى. سول سياقتى سۋ ىسىرابى دا تىيىلماي وتىر. كەڭەستى ايماق باسشىسى س.ءبىلالوۆ قورىتىپ, تۇرعىن ءۇي-كوممۋنالدىق شارۋاشىلىق ينفراقۇرىلىمىن جاڭعىرتۋ سالاسىندا ۇلكەن مىندەتتەر تۇرعانىن,  ونى ورىنداۋدىڭ جەرگىلىكتى كوزدەرى مول ەكەنىن جەتكىزدى. ءومىر ەسقالي,  سولتۇستىك قازاقستان وبلىسى.