كوزى تىرىسىندە اڭىزعا اينالعان ابىز تۇلعانىڭ تاعدىرلى بەينەسى ءاربىر قازاقتىڭ كوز الدىندا. قاراورمان قازاققا ورتاق عازيز تۇلعانىڭ ومىردەن وتكەنىنە ون جىلداي ۋاقىت بولسا دا, حالقى ونى ءالى كۇنگە دەيىن ساعىنا ەسكە الادى. باتىر ءوزىنىڭ «جاۋ تىلىنداعى بالا» اتتى شىعارماسىندا سوعىس قاسىرەتىن بەينەلەي وتىرىپ, ءوزىنىڭ تاعدىرىن اشىپ جازادى. ورىمدەي كەزىندە ورتكە ورانعان مايدان شەبىنە اتتانعان قاسىمنىڭ ۋكراينا دالاسىندا قايتالانباس ەرلىك كورسەتكەنى تاريحتان بەلگىلى.
بارشا قازاققا ورتاق تۇلعا قاسىم قايسەنوۆتىڭ ءجۇز جىلدىق مەرەيتويى بۇگىن تاراز قالاسىندا تويلاندى. جامبىل وبلىستىق ىشكى ساياسات باسقارماسى ۇيىمداستىرعان داڭقتى تۇلعانى ەسكە الۋ كەشى م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە ءوتتى. اۋەلى كوپشىلىككە قاسىم قايسەنوۆ ومىرىنەن سىر شەرتەتىن دەرەكتى فيلم كورسەتىلدى. بۇدان كەيىن ساحناعا اقىن, قازاقستان جازۋشىلار وداعىنىڭ توراعاسى ۇلىقبەك ەسداۋلەت كوتەرىلىپ, باتىر تۇلعا جايلى ەستەلىكتەر ايتتى. ءار كەزدەسۋدەن قالعان اسەرىن كورەرمەنمەن ءبولىستى. سونىمەن قاتار, شارا بارىسىندا جازۋشى, قازاقستان جازۋشىلار وداعى توراعاسىنىڭ ورىنباسارى مەرەكە قۇلكەنوۆ, كوپ جىلدار بويى قاسىم قايسەنوۆتىڭ حاتشىسى بولعان ەركىن نۇرازحان سياقتى ازاماتتار دا قاھارمان تۋرالى جۇرەكجاردى لەبىزدەرىن ءبىلدىردى. ءوز سوزىندە جازۋشى ەلەن ءالىمجان دا قازاقتىڭ قايسار ۇلى جايىنداعى ويىمەن ءبولىستى.
ادەبي شارا بارىسىندا باتىر ومىرىنەن ساحنالىق قويىلىمدار قويىلىپ, كورەرمەندى كەرەمەت اسەرگە بولەدى. شاپاعات ءابدىر, اقنۇر سۇلتانبەكوۆا سياقتى ونەرلى جاستار اننەن شاشۋ شاشتى. شىنىن ايتقاندا, قاسىم قايسەنوۆ ءومىرىنىڭ ءاربىر ءساتى جينالعان كوپشىلىكتىڭ كوكەيىنە ۇلكەن وي سالدى دەۋگە بولادى. سونىمەن قاتار, جيىن بارىسىندا كوپشىلىككە بەيمالىم جايت, قاسىم قايسەنوۆتىڭ كەزىندە جامبىل وبلىسىنىڭ قازىرگى جۋالى جانە بايزاق اۋداندىق اتقارۋ كوميتەتى توراعاسىنىڭ ورىنباسارى بولىپ قىزمەت اتقارعانى دا ايتىلدى.
جيىن سوڭىندا ۋنيۆەرسيتەت رەكتورى ماحمەتعالي سارىبەكوۆ جينالعان كوپشىلىككە العىس ايتا كەلىپ, ۇلىقبەك ەسداۋلەتتى م.ح.دۋلاتي اتىنداعى ارنايى توسبەلگىمەن ماراپاتتادى. اتاقتى تاريحشىنىڭ بەينەسى بەينەلەنگەن كىلەمشەنى سىيعا تارتتى.
حاميت ەسامان,
«ەگەمەن قازاقستان»
جامبىل وبلىسى
