ونىڭ ايتۋى بويىنشا, وبلىستاعى سۋعا ءتۇسۋ ماۋسىمى رەسمي تۇردە 1 قىركۇيەكتەن باستاپ جابىلدى. بۇعان قاراماستان, توتەنشە جاعدايلار دەپارتامەنتى مەن جەرگىلىكتى پوليتسيا قىزمەتكەرلەرى بىرلەسىپ رەيدتىك ءىس شارالار جۇرگىزۋدى جالعاستىرۋدا.
«2017 جىلى وڭىردە ەرىكتى قۇتقارۋشىلار كەزەكشىلىك ەتەتىن كوممۋنالدىق جاعاجايلار اشىلدى. سۋ استىن تەكسەرىپ, سۋ بالدىرلارىنان تازارتا وتىرىپ, قاۋىپسىز ايماقتاردى انىقتاۋ, جانە ونى ەرەسەكتەر مەن بالالار ۋچاسكىلەرىنە ءبولۋ تۋرالى شارالار قابىلداندى. بۇل سۋدا ءولىم-ءجىتىم جاعدايىن ايتارلىقتاي تومەندەتۋگە مۇمكىندىك بەردى», - دەپ حابارلادى قايرات قاسىم.
جالپى العاندا, شومىلۋ ماۋسىمى كەزىندە وبلىس اۋماعىندا 56 جاعاجاي جۇمىس ىستەدى, ونىڭ ىشىندە 12 كوممەرتسيالىق, 44 كوممۋنالدىق. قۇتقارۋ بەكەتتەرىنىڭ جاۋاپكەرشىلىگىنە بەرىلگەن ايماقتاردا بارلىق ساناتتاعى حالىق ءۇشىن كىرۋ تەگىن بولعان 2 ۆەدومستۆولىق جاعاجاي جۇمىس ىستەدى.
«بيىل وبلىسىمىزدا 15 ادامنىڭ ولىمىنە الىپ كەلگەن, 15 قايعىلى جاعداي تىركەلسە, ونىڭ ىشىندە 4 بالا قازا تاپتى. اقتوبە قالاسىندا - 7 وقيعا, ىرعىزدا – 3, تەمىردە – 2, قارعالى, مۇعالجار جانە ويىل اۋداندارىندا 1 وقيعادان ورىن الدى. وتكەن جىلمەن سالىستىرعاندا كورسەتكىش 31,8% تومەندەگەنى بايقالادى. ادام ءولىمى تەك رۇقسات ەتىلمەگەن جەرلەردە عانا ەمەس, سونداي اق وزدەرىنىڭ وبەكتىلىك قۇتقارۋشىلارى بار جەكە جاعاجايلاردا دا ورىن الدى. بۇل جەردە ورىن العان وقيعالارعا جالدامالى قۇتقارۋشىلارمەن قاتار قازا تاپقانداردىڭ دا كىناسى بار. قۇتقارۋشىلار ءوز قىزمەتىن جەتكىلىكتى دارەجەدە ورىنداماعان جانە وزدەرىنىڭ تالاپتارىن ءتيىستى دارەجەدە جەتكىزە الماعان, ال دەمالۋشىلار قاۋىپسىزدىك ەرەجەلەرىن ساقتاماعان», - دەپ اتاپ ءوتتى تجد باسشىسىنىڭ ورىنباسارى.
پروفيلاكتيكالىق ءىس-شارالار بارىسىندا سۋ ايدىندارىندا قاۋىپسىزدىك ەرەجەلەرىن بۇزعانى ءۇشىن 12 جەكە جاعاجايدىڭ اكىمشىلىك يەلەرى مەن دەمالۋشىلارى دا جاۋاپكەرشىلىككە تارتىلدى.
