قازاقستان • 06 قىركۇيەك، 2018

تالدىقورعاندا «ءتىل – بىرلىكتىڭ بەسىگى» اتتى فورۋم ءوتتى

259 رەتكورسەتىلدى

بيىلدان باستاپ ەلىمىز قازاقستان حالقىنىڭ تىلدەرى كۇنى مەرەكەسىن 5 قىركۇيەكتە، اعارتۋشى عالىم احمەت بايتۇرسىن ۇلىنىڭ تۋعان كۇنىنە وراي  اتاپ ءوتۋدى باستادى. بۇل – ۇلت ءتىل عىلىمىن زەردەلەۋدىڭ كوشباسىندا تۇرعان تۇلعاعا قۇرمەتپەن قاتار، رۋحاني دامۋدىڭ جاڭاشا سيپاتتا جۇزە اسۋىنا جول اشاتىن قادام.

مەرەكە قۇرمەتىنە تالدىقورعان قالاسىندا  الماتى وبلىسىنىڭ تىلدەردى دامىتۋ جونىندەگى باسقارماسىنىڭ ۇيىمداستىرۋىمەن ء«تىل – بىرلىكتىڭ بەسىگى» اتتى فورۋم ءوتتى.

- بۇگىنگى تاڭدا ءسىز بەن ءبىزدىڭ، ءتىل جاناشىرلارىنىڭ جانە سالا ماماندارىنىڭ الدىنا قويىلعان مىندەت تە، قىزمەت تە، ازاماتتىق پارىز دا بىرەۋ عانا. ول – ەلمەن بىرگە تۋىلىپ، تاريحىمىزبەن قاتار وركەندەگەن ءتىلىمىزدىڭ كەلەشەكتە ماڭگىلىك ەلدىڭ اسىل قازىناسى بولىپ ساقتالۋىن قامتاماسىز ەتۋ. ىرىس دارىپ، قۇت قونعان جەتى وزەننىڭ ماڭايىن جاعالاي جايلاعان جەتىسۋ جۇرتى كيەلى مەكەننىڭ ساف اۋاسىن، تۇران دالاسىن، اسقارلى شىڭىن قالاي ايبار تۇتسا، ءتىلىن دە ءدال سولاي بەيبىتشىلىكتىڭ قازىعى دەپ بىلەدى. ەل مۇددەسى جولىندا اتقاراتىن ءىس قاشاندا جاۋاپكەرشىلىكتى تالاپ ەتەدى. سول سەبەپتى، الداعى كۇندەرگە ارتار جوسپارلار اۋقىمدى. ولاردى بىرىگىپ جۇزەگە اسىراتىنىمىزعا سەنىمدىمىن. ەندەشە، بىرلىگى بەكەم ەلىمىزدىڭ الەۋەتى ارتىپ، قادامى قارىشتاسىن. ال سول بىرلىكتىڭ بەسىگى بولعان – ءتىل عاسىرلار كوشىنىڭ ەڭ باعالى قازىناسى، اردا اسىلى بولىپ ەلمەن بىرگە ماڭگى جاساسىن!» - دەدى شارانىڭ بەتاشارىندا  وبلىستىق تىلدەردى دامىتۋ جونىندەگى باسقارما باسشىسى ايدار باشباەۆ.

فورۋم اياسىندا مەملەكەتتىك ءتىلدىڭ دامۋىنا وزىندىك ۇلەسىن قوسىپ جۇرگەن وبلىسىمىزداعى ءتىل جاناشىرلارىنا قازاقستان رەسپۋبليكاسى مادەنيەت جانە سپورت مينيسترلىگى جانە ءتىل ساياساتى كوميتەتىنىڭ، الماتى وبلىسى اكىمىنىڭ، سونداي-اق، باسقارما تاراپىنان قۇرمەت گراموتاسى مەن العىس حاتتارى تابىستالدى. تىلدەر مەرەكەسى قارساڭىندا الماتى وبلىسىنىڭ تىلدەردى دامىتۋ جونىندەگى باسقارماسى ءتىل ايلىعىن وتكىزگەن بولاتىن. اتالمىش ايلىقتىڭ اياسىندا ەتنوس وكىلدەرىنىڭ قاتىسۋىمەن ء«تىلدارىن»، ء«تىل – شەبەرى»، «سلاۆيان جازۋى» بايقاۋلارى مەن ء«تىل – تاتۋلىق تىرەگى» دوڭگەلەك ۇستەلى ۇيىمداستىرىلعاندىعىن اتاپ وتكەن ءجون. تاتۋلىقتى دارىپتەيتىن ايتۋلى سايىستار زور ماڭىزعا يە. كۇنى كەشە عانا وتكەن وبلىستىق ء«تىل – پاراسات» بايقاۋى دا ءسوزىمىزدىڭ ايقىن دالەلى. شارا بارىسىندا بىرلىك پەن ىنتىماقتىڭ جىعىلماس تۋىن قالقان ەتكەن بايقاۋدا بابى مەن باعى شاپقان جەڭىمپازدار ماراپاتتالدى.

سونىمەن قاتار، ايماقتا ءبىر جىل بۇرىن «بۋككروسسينگ» – ەركىن كىتاپ الماسۋ جوباسى قولعا الىنعان بولاتىن. قاي ۋاقىتتا بولماسىن سەنىمدى دوس سانالاتىن كىتاپ بۇگىندە رۋحاني جاڭعىرۋ قۇرالى. ءتىل بايلىعىن دامىتاتىن، ويىڭا وي قوساتىن دا كىتاپ بولعاندىقتان،  وسى ارالىقتا كوشپەلى كىتاپحانا حالىقتىڭ كىتاپقا دەگەن قىزىعۋشىلىعىن وياتۋعا ايتارلىقتاي ۇلەس قوستى. تالدىقورعان قالاسى مەن وبلىستىڭ اۋدان، قالالارىندا ارنايى كىتاپ سورەلەرى قويىلدى. جىلجىمالى كىتاپحانا سورەلەرىنە قويىلعان 5000-نان استام كىتاپتىڭ 1000-عا جۋىعىن وقىرماندار ۇيدەگى كىتاپتارىن الىپ كەلىپ، اۋىستىرىپ السا، 875-تەن اسا كىتاپ وقىرماندارعا بەرىلدى. سىيعا تارتقان كىتاپتاردىڭ سانى دا ولشەۋسىز.

سونداي-اق، جىل بويى جالعاسىن تاپقان كەزەكتى جوبالاردىڭ ءبىرى – «جەتىسۋدىڭ جىر كەرۋەنى» اتتى چەللەندج بولاتىن. اتالعان جوبانىڭ ماقساتى جەتىسۋ جەرىنە كىندىك قانى تامعان، دۇنيەدەن وزعان اقىن-جازۋشىلاردى دارىپتەۋ، شىعارمالارىن الەۋمەتتىك جەلىلەر ارقىلى ەل اراسىنا كەڭىنەن ناسيحاتتاۋ. چەللەندج تالاپتارىنا سايكەس ءار قاتىسۋشى قالتا تەلەفونىنا بەلگىلى ءبىر اۆتوردىڭ ولەڭىن مانەرگە كەلتىرە وقىپ، بەينەجازباعا ءتۇسىرىپ، ارنايى حەشتەگ ارقىلى الەۋمەتتىك جەلىگە جۇكتەدى. اتالمىش اكتسيالاردا بەلسەندىلىك تانىتقان قاتىسۋشىلارعا ارنايى جۇلدە تاعايىندالىپ، فورۋم بارىسىندا سالتاناتتى تۇردە ماراپاتتادى.

قالماحانبەت مۇقامەتقالي،

«ەگەمەن قازاقستان»

الماتى وبلىسى

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار