ماسەلەن, قاماۋدا ۇستاۋ ورىندارىنان سوتتالعاندارعا كورسەتىلەتىن قاتىگەز قارىم-قاتىناسقا قاتىستى ءجيى تۇسەتىن شاعىمدارعا بايلانىستى قازاقستان رەسپۋبليكاسىنداعى ادام قۇقىقتارى جونىندەگى ۋاكىلدىڭ تاپسىرماسى بويىنشا ازاپتاۋلاردى بولدىرماۋ جونىندەگى ۇلتتىق الدىن الۋ تەتىگىنىڭ ايماقتىق توبى الماتى وبلىسىنداعى بىرقاتار پەنيتەنتسيارلىق مەكەمەلەرگە مونيتورينگ جۇرگىزىپ, بىرقاتار كەلەڭسىز جاعداياتتارعا كوز جەتكىزگەن.
ناقتىلاي ايتقاندا, قۇرامىندا بىلىكتى ماماندار مەن مەديتسينا ساراپشىلارى بار ۇلتتىق الدىن الۋ تەتىگىنىڭ ايماقتىق توبى سوتتالعاندارعا قاتىگەز قارىم-قاتىناس كورسەتۋ فاكتىلەرىن انىقتاعان. بۇل فاكتىلەر ءتيىستى قۇجاتتارمەن دايەكتەلگەن. ءتىپتى, سوتتالعانداردىڭ ءبىرى العان جاراقاتتارىنان كوز جۇمعان كورىنەدى.
جالپى, ۇلتتىق الدىن الۋ تەتىگىنىڭ ۇيلەستىرۋ كەڭەسى باس بوستاندىعىنان ايىرۋ ورىندارىنداعى وكىلەتتىكتەردى تەرىس پايدالانۋ ءىسىن بىرنەشە رەت قاراستىرعان. بۇل ماسەلە ۇيلەستىرۋ كەڭەسىنىڭ نازارىندا تۇرعان تۇيتكىلدەردىڭ ءبىرى بولىپ وتىر. وسى جاعداياتقا بايلانىستى اتالعان قۇرىلىم ۋاكىلەتتى مەملەكەتتىك ورگاندارعا ءتيىستى شاعىمدار مەن ۇسىنىمدار جىبەرگەن. دەگەنمەن, جوعارىدا اتالعان پروبلەمالار ءالى وزەكتىلىگىن جويعان جوق, ياعني ايتىلعان ماسەلەلەر شەشىمىن تابار ەمەس.
وسى ارادا اتالعان تۇيتكىلدەرگە بايلانىستى ادام قۇقىقتارى جونىندەگى ۋاكىل مەكەمەسى ناقتى فاكتىلەردى كەلتىرە وتىرىپ, باس پروكۋراتۋراعا قاداعالاۋ تارتىبىمەن قاراۋعا جانە ءتيىستى جۇيەلىك شارالاردى قابىلداۋ ءۇشىن جۇگىنگەنىن دە ايتا كەتكەنىمىز ورىندى.
نەگىزىندە, سوتتالعاندارمەن دۇرىس قارىم-قاتىناس جاساماۋ, پەنيتەنتسيارلىق جۇيەدەگى مادەنيەتتىڭ تومەندىگى جانە بىلىكتى مامانداردىڭ ازدىعى سوتتالعانداردى قايتا الەۋمەتتەندىرۋ, رەتسيديۆتى قىلمىستىڭ ءوسۋىن بولدىرماۋ شارالارىنا كەرى اسەرىن تيگىزبەي قويمايدى. قالاي دەسەك تە, پەنيتەنتسيارلىق جۇيەدەگى كەلەڭسىز جاعدايلار قازاقستان رەسپۋبليكاسى پرەزيدەنتىنىڭ قۇقىق قورعاۋ ورگاندارىن رەفورمالاۋ بويىنشا تاپسىرماسىن ورىنداۋعا تەرىس ىقپالىن تيگىزەتىن فاكتور بولىپ تابىلادى. سوندىقتان جوعارىدا ايتىلعان ماسەلەلەرگە بارلىق ءتيىستى مەملەكەتتىك قۇرىلىمداردىڭ نازار اۋدارۋى قاجەت-اق.
مەملەكەت باسشىسى القالى جيىنداردا, ءتۇرلى باسقوسۋلاردا حالىق سەنىمىن ارتتىرۋ قاجەتتىگىنە, ەل سەنىمى بارىنەن دە قىمبات ەكەنىنە ۇنەمى نازار اۋدارىپ وتىراتىنى بەلگىلى. وسى ورايدا قۇقىق قورعاۋ ورگاندارى قىزمەتىنىڭ ەل كوڭىلىنەن شىعۋى حالىق سەنىمىن نىعايتۋ ىسىندە اسا ماڭىزدى رولگە يە ەكەنى ايتپاسا دا تۇسىنىكتى.
جولدىباي بازار,
«ەگەمەن قازاقستان»
