جالپى, ايماققا ينۆەستيتسيا سالۋشىلاردىڭ قاتارى جىل سايىن كوبەيىپ, ولاردىڭ دەنى اۋىل شارۋاشىلىعى ونەركاسىبى باعىتىندا بىرلەسىپ جۇمىس ىستەۋگە بەيىل ەكەندىكتەرىن بىلدىرگەن. ونى سوڭعى ءبىر-ەكى جىل كولەمىندە وبلىس ەكونوميكاسىنا قۇيىلعان شەتەل ينۆەستيتسياسىنىڭ كولەمىنە قاراپ باعامداۋعا بولادى. مىسالعا, 2017 جىلى وبلىسقا 527 ملرد تەڭگە ينۆەستيتسيا تارتىلىپ, ءوڭىر رەسپۋبليكا بويىنشا العاشقى تورتتىككە ەنگەن بولاتىن. ياعني, الماتى وبلىسىنىڭ ينۆەستيتسيالىق تارتىمدىلىعى سىرتقى نارىققا قارجى سالۋشىلاردىڭ ىنتاسىن ارتتىرعانى انىق. سولاردىڭ قاتارىندا يتاليالىق Areas More كومپانياسى دا بار. جاقىندا الماتى وبلىسىنا وسى كومپانيانىڭ پرەزيدەنتى سيلۆيا پەسسيني ارنايى ساپارمەن كەلىپ, جەرگىلىكتى كاسىپكەرلەرمەن كەزدەستى.
Areas More كومپانياسى تەك يتاليا عانا ەمەس, كارى قۇرلىق نارىعىنداعى وزىندىك ورىن بار ءىرى ساۋدا-ساتتىق ءارى وڭدەۋشى كەشەن رەتىندە تانىمال. نەگىزىنەن اگروونەركاسىپ تاۋارلارىن وڭدەۋ, قايتا وڭدەۋ ءارى ساتۋمەن اينالىسادى. Areas ءMoreنىڭ ساۋدا ساياساتىنداعى باستى ەرەكشەلىك رەتىندە اشىق ارىپتەستىك پەن تەڭ سەرىكتەستىك ۇستانۋىندا بولسا كەرەك. قازىرگى كەزدە كومپانيانىڭ دۇنيە ءجۇزى بويىنشا ءىرى 50 سەرىكتەسى جانە جۇزدەن اساتىن ارىپتەس كومپانياسى بار ەكەن. سيلۆيا پەسسينيدى جەتىسۋ توپىراعىنا وسى ءۇمىت, قازاقستان اۋماعىنان سەرىكتەس بولاتىنداي ىڭعايلى كاسىپورىن ىزدەۋ ماقساتى جەتەلەپ كەلسە كەرەك. يتاليا كاسىپكەرىنىڭ بۇل ماقساتى ورىندالعانداي دا. ويتكەنى, الماتى وبلىسىنىڭ كاسىپكەر پالاتاسىندا بولعان ەكىجاقتى كەزدەسۋدە بىرقاتار كەلىسىمنىڭ باسى اشىلىپ, ىڭعايلى تالاپتار تۋراسىندا ءسوز بولدى.
الماتى وبلىستىق كاسىپكەرلەر پالاتاسى ىسكەر ايەلدەر كەڭەسىنىڭ جەتەكشىسى ريمما سالىقوۆامەن كەزدەسكەن Areas More كومپانيانىڭ پرەزيدەنتى سيلۆيا پەسسيني جەتىسۋ جەرىندە اۋىل شارۋاشىلىعى سالاسىنىڭ جاقسى دامىعانىن تىلگە تيەك ەتتى. بۇل شەتەلدىك ينۆەستورلار ءۇشىن وتە تارتىمدى جانە قايتارىمى مول بيزنەس كوزى رەتىندە قارجى سالۋعا جول اشادى. وسى كەزدەسۋدە پەسسيني حانىم ايماقتاعى بيزنەس – احۋالمەن ءجىتى تانىسقاننان كەيىن, وڭىردە بىرنەشە وڭدەۋ كاسىپورىندارىن سالۋعا بەل بۋعانىن ايتتى. بۇيىرسا, بيىل الماتى وبلىسىنىڭ اۋماعىندا اگروونەركاسىپ ونىمدەرىن وڭدەيتىن جانە قايتا وڭدەيتىن 5 شاعىن زاۋىت سالىنادى. بىرلەسكەن كاسىپورىنداردى يتاليا تاراپى تولىقتاي جابدىقتاپ, ىسكە قوسادى. ال شيكىزاتپەن قامتۋ, دايىن ءونىمدى جونەلتۋ ىسىمەن جەرگىلىكتى سەرىكتەس كومپانيا اينالىسادى.
- الماتى وبلىسىنىڭ اۋماعىندا وڭدەۋشى كاسىپورىن قۇرۋعا قول جەتكىزۋ ءبىز ءۇشىن ءتيىمدى جوبا بولىپ وتىر. جالپى, يتاليا تاراپى قازاقستاننىڭ اگروسەكتورىنا ينۆەستيتسيا سالۋعا مۇددەلى. ويتكەنى, ەلدىڭ اۋلى شارۋاشلىعى سالاسىنىڭ مۇمكىندىگى مول. تابيعي ءونىم الۋعا, ونى وڭدەۋگە سۇرانىس بار. ءبىز بۇل جاقتا جاڭا باعىتتاعى كاسىپورىندار اشىپ, ولاردىڭ دامۋىنا كوڭىل بولەمىز. يتاليا بانكتەرى مەن قورلار بۇل جوبالاردى قارجىلاندىرۋعا دايىن. اسىرەسە, سويا, الما جانە باسقا دا اۋىل شارۋاشىلىعى ونىمدەرىن قايتا وڭدەۋ, سونىمەن بىرگە اگروتەحنيكانى شىعارۋعا قىزىعۋشىلىق جوعارى, - دەيدى سيلۆيا پەسسيني.
قالماحانبەت مۇقامەتقالي,
«ەگەمەن قازاقستان»
الماتى وبلىسى
