قول قويۋ ءراسىمى استانادا وتكەن «اۋعانستان ايەلدەرىنىڭ قۇقىقتارى مەن مۇمكىندىكتەرىن كەڭەيتۋ» اتتى وڭىرلىك كونفەرەنتسيا اياسىندا جۇزەگە استى.
«اتامەكەن» قر ۇكپ ىسكەر ايەلدەر كەڭەسىنىڭ ءتورايىمى لاززات رامازانوۆا مەموراندۋمعا قول قويۋ بارىسىندا بۇل وقيعا ەكى ەلدىڭ كاسىپكەر ايەلدەرى اراسىندا تىكەلەي ىسكەر بايلانىستاردى ورناتۋ ۇدەرىسىندە ماڭىزدى ءارى كەلەشەكتى قادام ەكەنىن اتاپ ءوتتى.
«مەملەكەت باسشىسى كوتەرگەن وڭىرلىك باستامانى «اتامەكەن» قر ۇكپ ىسكەر ايەلدەر كەڭەسى تاراپىنان قولداپ وتىر. جەكەلەگەن مەملەكەتتەگى تىنىشتىق پەن ەكونوميكالىق قاۋىپسىزدىك – وڭىرلىك تۇراقتىلىقتىڭ كەپىلى ەكەنىن ايتقىم كەلەدى. بۇگىن ۋافەك حانىم (مانيجا ۋافەك – اۋعانستان ايەلدەرى ساۋدا-ونەركاسىپتىك پالاتاسىنىڭ پرەزيدەنتى) ەكەۋمىز قول قويعان مەموراندۋم ىسكەرلىك بايلانىستاردى ورناتۋدا سۇبەلى ۇلەس قوساتىنىنا سەنىمدىمىز. كونفەرەنتسيادا ەكى ەلدىڭ ەر ازاماتتارى اراسىندا عانا ىسكەرلىك بايلانىس ورناعان دەگەن وي ايتىلدى. بۇگىنگى مەموراندۋم بۇل جايتتى تۇزەيدى دەپ سەنەمىن», – دەدى لاززات رامازانوۆا.
مەموراندۋم اياسىندا قازاقستاننىڭ ىسكەر ايەلدەرى اۋعان ارىپتەستەرمەن بيزنەستەگى جەتەكشى تاجىريبەمەن ءبولىسۋ, مەملەكەتتەر اراسىنداعى ساۋدا قاتىناستارىن دامىتۋ ماقساتىندا اقپاراتتىق جانە ءبىلىم بەرەتىن ءىس-شارالاردى, تەحنيكالىق ترەنينگتەردى وتكىزۋگە دايىن. باستى نازار اۋىل-ايماقتاعى ىنتىماقتاستىققا جانە اۋىل شارۋاشىلىعى ءونىمىن وتكىزۋگە اۋدارىلادى. بۇعان قوسا قازاقستان شاعىن يندۋستريالىق پاركتتەردى قۇرۋ بويىنشا تاجىريبە الماسۋعا قىزىعۋشىلىق تانىتىپ وتىر, ويتكەنى اۋعانستان وسىنداي پاركتى ايەلدەرگە ارناپ قۇرۋدى باستاپ كەتتى.
«ىنتىماقتاستىق ورناتقاندارى ءۇشىن قازاقستاندىق ارىپتەستەرىمىزگە العىس ايتامىز. شىنىمەن, ەلدەرىمىز اراسىندا ەر-ازاماتتار عانا ىنتاماقتاستىق ورناتقانىنا ۇيرەنىپ قالدىق. ال ايەلدەر اراسىندا وسىنداي ىسكەرلىك بايلانىس بولعان ەمەس. الايدا بۇل جايت ەلىمىزدە ايەلدەر كاسىپكەرلىگى جوق دەگەندى بىلدىرمەيدى. اۋعانستان ايەلدەرى ساۋدا-ونەركاسىپتىك پالاتاسىنىنىڭ قۇرىلۋى – ەلىمىزدەگى ايەلدەر كاسىپكەرلىگى دامىپ, قارقىن الىپ جاتقانىن بىلدىرەدى. ەكى ەل اراسىنداعى مەموراندۋم – جاقسى ناتيجەگە اكەلەتىن العاشقى تاجىريبە بولماق», – دەدى اۋعانستان ايەلدەرى ساۋدا-ونەركاسىپتىك پالاتاسىنىڭ پرەزيدەنتى مانيجا ۋافەك.
ءدال وسى كۇنى اۋعانستان ايەلدەرى ساۋدا-ونەركاسىپتىك پالاتاسى «قازاقستان ىسكەر ايەلدەرى قاۋىمداستىعى» قوعامدىق بىرلەستىگىمەن ىنتىماقتاستىق تۋرالى مەموراندۋمعا قول قويدى. مەموراندۋم ماقساتى – شىعارىلاتىن ءونىمنىڭ وتكىزۋ نارىعىن كەڭەيتۋ.
كونفەرەنتسيا بارىسىندا «ايماقتىق ىنتىماقتاستىق ارقىلى ايەلدەردىڭ ەكونوميكالىق مۇمكىندىكتەرىن كەڭەيتۋ» اتتى پانەلدىك سەسسيا لاززات رامازانوۆانىڭ جەتەكشىلىگىمەن ءوتتى.
ءىس-شاراعا قازاقستان, وزبەكستان, تاجىكستان مەن اقش-تىڭ ساياسي جانە قوعام قايراتكەرلەرى قاتىستى. كونفەرەنتسيادا ورتا ازيا مەملەكەتتەرىندە ايەلدەردىڭ ىسكەرلىك داعدىلارىن دامىتۋ ءۇشىن قولايلى قۇقىقتىق جانە الەۋمەتتىك ورتا قالىپتاسىپ جاتقانى جانە ايەلدەر كاسىپكەرلىك پەن قوعامدىق قىزمەتكە بەلسەندى جۇمىلىپ جاتقانى تۋرالى بىرنەشە رەت ايتىلدى.
