ەستەرىڭىزگە سالا كەتسەك, «وزەن» كوركەم ءفيلمى فەستيۆالدىڭ «كوكجيەكتەر» (گوريزونتى) اتتى كونكۋرستىق باعدارلاماسىنا قاتىسۋدا. ايتا كەتسەك, بۇل بايقاۋدا بارلىعى 19 كينوتۋىندى باق سىنايدى. ءفيلمدى 1000-عا جۋىق كورەرمەن تاماشالادى.
كورسەتىلىمنەن كەيىن ءفيلمنىڭ رەجيسسەرى مەن اكتەرلەر كورەرمەندەرمەن تىلدەستى. ءفيلمدى ءتۇسىرۋ يدەياسىنىڭ پايدا بولۋى تۋرالى ەمير بايعازين سۇلەيمەن پاتشانىڭ «ادامنىڭ پەيىلى تەرەڭ سۋ ءتارىزدى» دەگەن سوزدەرىن كەلتىرە وتىرىپ, نيەت بولسا, الدىڭنان شىعاتىن قيىندىقتارعا قاراماستان, ءومىردىڭ باقىتىن سەزىنۋگە بولاتىنىن ايتتى.
فيلمدە باستى رولدەردى سومداعان اكتەرلەر دە ءوز ويلارىمەن ءبولىسىپ, كەيبىر قيىندىقتار مەن الدارىنا قويىلعان قاتاڭ تالاپتارعا قاراماستان, ءتۇسىرۋ الاڭى ۇناعاندارى تۋرالى جانە وسى فيلمگە تۇسكەندەرىنە قۋانىشتى ەكەنىن جەتكىزدى. جينالعان كورەرمەندەر اكتەرلەردىڭ جاقسى تاڭدالعانى جانە ولاردىڭ شەبەرلىگى تۋرالى ءسوز قوزعادى.
باتىستىڭ الەمگە ايگىلى باسىلىمدارى «وزەن» ءفيلمى تۋرالى جارىسا جازىپ, وڭ پىكىرلەرىن ءبىلدىرىپ جاتىر:
Hollywood Reporter:
فەستيۆالدەردە ۇلكەن تابىسقا يە بولعان ەمير بايعازيننىڭ «اسلاننىڭ ساباقتارى» جانە ء«تورت وقيعا» فيلمدەرىنەن كەيىن, جازۋشى-رەجيسسەر تۇسىرگەن جاڭا فيلم اسلان تۋرالى تريلوگيانىڭ سوڭعى ءبولىمى. بۇل كينوتۋىندى ەرەكشە ءتارتىپ پەن ايقىندىقتى سۋرەتتەي بىلگەن رەجيسسەرلىك شەبەرلىكتىڭ شىڭدالۋىنىڭ ايقىن دالەلى. كەيبىرەۋلەر بۇل فيلم ەستەتيزاتسياعا تولى دەپ ايتۋى مۇمكىن, الايدا بۇل تۋىندى سەزىمگە تولى, ادامدى قىزىقتىرىپ, مەلانحوليكالىق سەزىمگە دۋالاي الاتىن جۇمىس.
Screen International:
بايعازيننىڭ جۇمىستارىندا ارقاشان كوزگە كورىنەتىن ءبىر نارسە بار. ول جەكە بوستاندىق جانە جاۋاپكەرشىلىك, قىزىقتىرۋشىلىق جانە وتباسى قاتىناستارى تۋرالى سۇراقتاردى زەرتتەگەندە, ونىڭ ەركىن ءستيلى ويلاي الاتىن سۋبستانتسيامەن تولىقتىرىلادى. اتالعان تاقىرىپتاردىڭ كورىنىسى باسقا دا كينەماتوگرافيستەردىڭ جۇمىستارىندا بايقالادى - كلەر دەنيدەن باستاپ, ميكلوش يانسكونىڭ اللەگوريالىق شىعارمالارىندا, جواۋ پەدرو رودريگەستىڭ يكوناعا سىيىناتىندارعا قارسى ويلارىندا دا كەڭىنەن قولدانىلادى.تەرەڭ ويلى, ءارى قيىن تاقىرىپتا تۇسىرىلگەن بۇل جۇمىس ادامنىڭ نازارىن وزىنە بىردەن اۋدارا الادى.
«وزەن» ءفيلمى وركەنيەتتەن الىس جەردە تۇراتىن, قالادان كەلگەن قوناقتان كەيىن ومىرلەرى كۇرت وزگەرە باستاعان بەس اعايىندى تۋرالى باياندايدى. ءفيلمنىڭ ءتۇسىرۋ جۇمىستارى وڭتۇستىك قازاقستان وبلىسىندا جۇرگىزىلدى.
