سۋرەتتەردى تۇسىرگەن ەرلان ومار
مادەنيەت جانە سپورت مينيسترلىگىنىڭ ءتىل ساياساتى كوميتەتى جانە شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعى ۇيىمداستارعان ايتۋلى شاراعا قويعام قايراتكەرلەرى, شىعارماشىلىق زيالى قاۋىم وكىلدەرى, عالىمدار قاتىستى. «وتكەن جىلى ەلباسى نۇرسۇلتان نازارباەۆ «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» جارلىققا قول قويدى. ونى ىسكە اسىرۋ ءۇشىن ۇكىمەت جانىنان ۇلتتىق كوميسسيا قۇرىلدى. ۇكىمەت 2025 جىلعا دەيىن لاتىن گرافيكاسىنا كەزەڭ كەزەڭمەن كوشىرۋدىڭ جوسپارىن بەكىتتى. ءبىز ء«تىل-قازىنا» عىلىمي-پراكتيكالىق ورتالىعىن قۇردىق. قازىر رەسپۋبليكامىزدا لاتىن گرافيكاسىنا نەگىزدەلگەن جاڭا ەملە ەرەجەسى اپروباتسيادان وتۋدە. بۇل ءبارىمىز جۇمىلا كىرىسەتىن ۇلتتىق جۇمىس» دەدى, مادەنيەت جانە سپورت مينيستر ارىستانبەك مۇحامەدي ۇلى.
ءتىل مەرەكەسىنىڭ 5 قىركۇيەك بولىپ بەلگىلەنۋىنىڭ دە وزىندىك سەبەبى بار. بۇل كۇن – «ۇلتتىڭ ساقتالۋىنا دا, جوعالۋىنا دا سەبەپ بولاتىن نارسەنىڭ قۋاتتىسى – ءتىل» دەپ ۇلاعاتتى ءسوز قالدىرعان, قازاق حالقىنىڭ تاعدىرى, ءتىلى ءۇشىن كۇرەسكەن الاش ارىسى, ۇلت ۇستازى احمەت بايتۇرسىن ۇلىنىڭ تۋعان كۇنى. قازاقتىڭ ادەبيەت زەرتتەۋشى عالىمى, تۇركىتانۋشى, پۋبليتسيست, پەداگوگ, اۋدارماشى, قوعام قايراتكەرى احمەت بايتۇرسىن ۇلى 1872 جىلى 5 قىركۇيەكتە قازىرگى قوستاناي وبلىسى, جانگەلدين اۋدانى, سارىتۇبەك ەلدى مەكەنىندە دۇنيەگە كەلگەن بولاتىن.
ال رەسپۋبليكالىق جاس اقىندار بايقاۋىنا 36 اۆتوردان 70-كە جۋىق ماتەريال كەلىپ تۇسكەن. «ەلباسى جانە ەلوردا» جىر جيناعىنا 36 اۆتوردىڭ 66 ولەڭى ەنگىزىلدى. ەرەجەگە سايكەس قالامگەرلەر ولەڭدەرىنە قازاقستاننىڭ دامۋ جولىندا ەلباسىنىڭ سىڭىرگەن ەڭبەگى مەن ارقا توسىندەگى جاس استانانىڭ 20 جىلدىق مەرەيتويىن ارقاۋ ەتكەن.
مۇشايراعا ۇسىنىلعان شىعارمالاردى ەلىمىزگە بەلگىلى اقىندار مەن فيلولوگ عالىمداردان قۇرىلعان ارنايى قازىلار القاسى ساراپتاپ, جەڭىمپاز بەن جۇلدەگەرلەردى انىقتاعان.
باعاشار تۇرسىنباي ۇلى,
«ەگەمەن قازاقستان»
