قوس وقيعانىڭ ورىن الۋىنا قۇقىق قورعاۋ سالاسىنىڭ ارداگەرى, قابيرا سالىقوۆانىڭ ۇلى عينيات سالىقوۆ مۇرىندىق بولىپ, مۋزەيدىڭ اشىلۋىنا 1,5 ملن تەڭگە قاراجاتىن بەرىپ, بيۋست جاساتىپ, مۋزەيگە جادىگەرلەر تارتۋ ەتتى. سونىمەن قاتار مۋزەيدىڭ جوندەۋ جۇمىستارىنا اۋىلدىڭ ازاماتتارى دا اتسالىسقان بولاتىن.
قابيرا سالىققىزىنا ارنالعان ءبيۋستىڭ اشىلۋ سالتاناتىنا اۋدان اكىمى ابات شىنىبەكوۆ, اپامىزدىڭ ۇلى عينيات سالىقوۆ جانە اۋىل تۇرعىندارى قاتىستى.
شارادا ءسوز العان اۋدان باسشىسى بوستاندىقتىق اعايىندى كونستيتۋتسيا كۇنىمەن قۇتتىقتاپ, يگى ءىس باستاعان عينيات اعامىزعا ەلدىڭ اتىنان العىس ءبىلدىردى.
قوعام قايراتكەرىنىڭ بيۋستىنە گۇل شوقتارىن قويعاننان كەيىن, جينالعان كوپشىلىك مۋزەيدىڭ اشىلۋ سالتاناتىنا قاتىستى. ايتا كەتۋ كەرەك, بۇل مۋزەيدە ءبىر زال تۇگەلىمەن قابيرا سالىققىزىنا ارنالعان. سول كىسىنىڭ وتىرعان ۇستەلىنەن باستاپ, قولدانعان زاتتارى وسى زالدا قويىلعان. سونداي-اق زالدا اپامىزدىڭ ءومىرى عانا ەمەس, قازاق زيالىلارىنىڭ ومىرىنەن مول ماعلۇمات بەرەتىن فوتوسۋرەتتەر كورمەسى بار. مۋزەيدە قابيرا سالىققىزىنىڭ جەكە كىتاپحاناسىنان الىنعان كىتاپتاردى دا كورۋگە بولادى.
شارۋانىڭ باسى-قاسىندا جۇرگەن اۋىلدىق وكرۋگ اكىمى ماناربەك سۇندەتوۆ: – جاڭادان اشىلعان مۋزەيگە اۋىل تاريحىن باياندايتىن ەكسپوناتتار جيناقتالۋ ۇستىندە, قوسىمشا تاعى ەكى زال اشامىز, دەگەن جوسپارىمەن ءبولىستى.
قايرات جاقىپ,
باتىس قازاقستان وبلىسى,
قازتالوۆ اۋدانى
