كەشە باس پروكۋرور اسحات داۋىلباەۆتىڭ توراعالىق ەتۋىمەن اعىمداعى جىلدىڭ جۇمىس قورىتىندىلارىن جانە الداعى كەزەڭدەگى قىزمەتتىڭ باسىم باعىتتارىن قاراپ, تالقىلاعان باس پروكۋراتۋرانىڭ كەڭەيتىلگەن القا ءماجىلىسى بولدى. ونىڭ جۇمىسىنا بەينەكونفەرەنتسيالىق بايلانىس ارقىلى وبلىس پروكۋرورلارى جانە ولارعا تەڭەستىرىلگەن پروكۋرورلار, وبلىستىق, قالالىق جانە اۋداندىق دەڭگەيدەگى پروكۋراتۋرالاردىڭ قىزمەتكەرلەرى قاتىستى.
باس پروكۋرور اتاپ وتكەندەي, اعىمداعى جىلى پروكۋراتۋرا ورگاندارى پروكۋراتۋرانىڭ قۇقىق قورعاۋشىلىق ءرولىن كۇشەيتۋگە جانە تيىمدىلىگىن ودان ءارى ارتتىرۋعا باعىتتالعان مەملەكەت باسشىسىنىڭ تاپسىرمالارىن جۇزەگە اسىرۋ باعىتىندا جۇمىس ىستەدى. وسى ماقساتتاردا زەينەتاقىمەن قامتاماسىز ەتۋ, ەڭبەك قاتىناستارى جانە الەۋمەتتىك قورعاۋ, ءبىلىم جانە عىلىم, باسەكەلەستىكتى دامىتۋ, يندۋستريا جانە ساۋدا ماسەلەلەرى بويىنشا, سونداي-اق وزگە دە ماڭىزدى سالالاردا تەكسەرۋلەر جۇرگىزىلدى. تەكسەرۋلەر ءناتيجەلەرى بويىنشا 380 مىڭ زاڭدىلىقتى بۇزۋشىلىق جويىلدى. 500 مىڭعا جۋىق ادامنىڭ كونستيتۋتسيالىق قۇقىقتارى قالپىنا كەلتىرىلدى. 44 مىڭ زاڭسىز قۇقىقتىق اكتىلەردىڭ كۇشى جويىلدى. 40 ملرد. تەڭگە شىعىننىڭ 27 ميللياردى بيۋدجەتكە قايتارىلدى.
ازاماتتاردىڭ ەڭبەك ققۇقىقتارىن قامتاماسىز ەتۋ سالاسىنداعى ماقساتتى جۇمىس باسىم باعىتتاردىڭ ءبىرى بولىپ قالا بەرەدى. پروكۋرورلىق ىقپال ەتۋ شارالارى بويىنشا 155 مىڭ جۇمىسشىنىڭ جالپى سوماسى 8,7 ملرد. تەڭگەنى قۇرايتىن مەرزىمىنەن كەشىكتىرىلگەن جالاقىلارى ءتولەندى, بۇل قارىز كولەمىن ەكى ەسەگە ازايتۋعا مۇمكىندىك بەردى.
مەملەكەت باسشىسىنىڭ قۇقىق قورعاۋ قىزمەتىنىڭ تيىمدىلىگىن ارتتىرۋعا باعىتتالعان جاڭا تالاپتارىنا ساي قىلمىستىق قۇقىق سالاسىندا قىلمىستاردى جاسىرۋ پروبلەمالارىن شەشۋ بويىنشا كوپ جۇمىس اتقارىلدى. كوزدەلگەن شارالار قىلمىستىلىقتىڭ شىنايى كورىنىسىن قامتاماسىز ەتۋگە جانە زارداپ شەككەندەردىڭ قۇقىقتارىنا كەپىلدىك الۋعا مۇمكىندىك بەرەدى. وسى شارالار ناتيجەسىندە بيزنەستىڭ ءىس-ارەكەتىنە اكىمشىلىك كەدەرگى كەلتىرەتىن بىرقاتار پروبلەمالار شەشىلدى, اۋىلشارۋاشىلىق ءونىمدەرىن يمپورتتاۋ ءۇشىن ەداۋىر كەدەرگى بولىپ كەلگەن زاڭ نورمالارى قايتا قارالدى.
القا جۇمىسىنىڭ قورىتىندىسى بويىنشا باس پروكۋرور ازاماتتاردىڭ, كامەلەتكە جاسى تولماعانداردىڭ كونستيتۋتسيالىق قۇقىقتارىن قامتاماسىز ەتۋ, كاسىپكەرلىكتى قورعاۋ, ۇيىمداسقان قىلمىسپەن, سىبايلاس جەمقورلىقپەن, ەكسترەميزم جانە تەرروريزممەن كۇرەس ءتارىزدى پروكۋرورلىق قاداعالاۋدىڭ باسىم باعىتتارى بويىنشا بىرقاتار تاپسىرمالار بەردى, دەپ حابارلادى باس پروكۋراتۋرانىڭ ءباسپاسوز قىزمەتى.
