گەرمانيانىڭ Transfermarkt سايتى ۇسىنعان مالىمەتكە سەنسەك, ك توبىنداعىلار اراسىنداعى ەڭ اۋقاتتىسى – «رەنن». فرانتسيالىق كلۋبتىڭ ساپىنداعى ويىنشىلاردىڭ جالپى قۇنى 119 ميلليون 50 مىڭ ەۋرونى قۇرايدى. سول سايىپقىراندار اراسىندا يسمايل سارردى بولە-جارا اتاپ وتۋگە بولادى. 20 جاستاعى سەنەگالدىق جارتىلاي قورعاۋشىنىڭ ترانسفەرلىك قۇنى 14 ميلليون شاماسىندا.
ەكىنشى ورىندا – «دينامو». ۋكراينانىڭ استاناسىندا ىرگەتاسى قالانعان داڭقتى كوماندانىڭ فۋتبولشىلارى بۇگىنگى تاڭدا 67 ميلليون ەۋروعا باعالانىپ وتىر. سولاردىڭ قاتارىندا ەڭ قۇندى ويىنشى رەتىندە ۆيكتور تسىگانكوۆتىڭ ەسىمى اتالۋدا. 20 جاستاعى جارتىلاي قورعاۋشىنىڭ باعاسى 8 ميلليوندى قۇرايدى.
ءۇشىنشى ساتىعا «استانا» جايعاستى. قازاقستاندىق كلۋبتىڭ نامىسىن قورعاپ جۇرگەن تەڭبىل دوپ شەبەرلەرىنىڭ جالپى قۇنى – 24 ميلليون 150 مىڭ ەۋرو. سولاردىڭ اراسىنداعى ەڭ باعاسى جوعارى پەدرو ەنريكە. 28 جاستاعى برازيليانىڭ شابۋىلشىسىنىڭ قۇنى – 3 ميلليون شاماسىندا.
ال ەڭ سوڭعى ورىندا – «يابلونەتس». چەحيالىق كوماندا 12 ميلليون 250 مىڭ ەۋروعا باعالانىپ وتىر. ولاردىڭ ەڭ قۇندى ويىنشىسى, 24 جاستاعى جارتىلاي قورعاۋشى ميحال تراۆنيك 1 ميلليونعا باعالانۋدا.
عالىم سۇلەيمەن,
«ەگەمەن قازاقستان»
