بۇل قىزمەتكە قر پرەمەر-ءمينيسترى كەڭسەسىنىڭ جوبالاۋدى باسقارۋ ورتالىعىنىڭ مەڭگەرۋشىسى بولعان اسەت يرعاليەۆ تاعايىندالدى.
«مينيستر جاڭا ورىنباساردىڭ جيناقتاعان تاجىريبەسىن, ءبىلىمى مەن كاسىبي داعدىسىن قويىلعان مىندەتتەرگە قول جەتكىزۋ ءۇشىن قولداناتىندىعىنا سەنىم ءبىلدىردى. سونداي-اق, جاڭا ورىنباساردىڭ الدىندا حالىقارالىق ەكونوميكالىق ينتەگراتسيا جانە حالىقارالىق ىنتىماقتاستىق, ساۋدا جانە سىرتقى ساۋدا قىزمەتى ماسەلەسىنە جەتەكشىلىك ەتۋ تۇرعانىن حابارلادى», - دەلىنگەن حابارلامادا.
اسەت يرعاليەۆ قازاقستاندىق مەنەدجمەنت, ەكونوميكا جانە بولجامداۋ ينستيتۋتىندا (كيمەپ) مەملەكەتتىك ساياسات ەكونوميكا سالاسى بويىنشا ءبىلىم العان (الماتى, قازاقستان). حالىقارالىق يونكوپينگ بيزنەس مەكتەبىن حالىقارالىق ەكونوميكا سالاسىندا عىلىم باكالاۆرى دارەجەسىمەن (Jönköping University, شۆەتسيا), يورك ۋنيۆەرسيتەتىن ەكونوميكاداعى عىلىم ماگيسترى دارەجەسىمەن (University of York, ۇلىبريتانيا) جانە نوتتينگەم ۋنيۆەرسيتەتىن ەكونوميكاداعى فيلوسوفيا ماگيسترى دارەجەسىمەن (The University of Nottingham, ۇلىبريتانيا) اياقتاعان.
سونداي-اق, اسەت يرعاليەۆ لوندون ەكونوميكا جانە ساياسي عىلىمدار مەكتەبىنىڭ PhD دوكتورى دارەجەسىن يەلەنگەن (لوندون, ۇلىبريتانيا). ەڭبەك جولىن ءا. يرعاليەۆ لوندونداعى ەۋروپالىق دامۋ جانە قايتا قۇرۋ بانكىنىڭ (ەدقب) شىعىس ەۋروپا, كاۆكاز جانە ورتالىق ازيا بويىنشا ەكونوميكا دەپارتامەنتىنىڭ اۋماقتىق ەكونوميسى رەتىندە باستاعان.
2013 جىلعى قاڭتاردان باستاپ 2016 جىلعى ماۋسىم ارالىعىندا «ەكونوميكالىق زەرتتەۋلەر ينستيتۋتى» اق كاسىپكەرلىكتى دامىتۋ ورتالىعىنىڭ ديرەكتورى, باسقارما توراعاسىنىڭ ورىنباسارى, باسقارما توراعاسى لاۋازىمدارىن اتقارعان.
2016 جىلعى جەلتوقساننان باستاپ 2017 جىلعى شىلدە ايىنا دەيىن قازاقستان رەسپۋبليكاسى پرەمەر-ءمينيسترىنىڭ كەڭەسشىسى بولىپ قىزمەت ىستەگەن. 2017 جىلعى تامىزدان باستاپ قازاقستان رەسپۋبليكاسى پرەمەر-ءمينيسترى كەڭسەسىنىڭ جوبالاۋدى باسقارۋ ورتالىعىندا جۇمىس ىستەدى.
