ەۋروپاداعى تاريحى تەرەڭنەن تامىر تارتاتىن كونە فەستيۆالدەردىڭ ءبىرى, بيىل وسىمەن 75-ءشى مارتە ۇيىمداستىرىلىپ وتىرعان ۆەنەتسيا حالىقارالىق كينوفەستيۆالىنىڭ ءوتۋ مەرزىمىمەن (Mostra Internazionale d’Arte Cinematografica) تۇسپا-تۇس كەلگەن ايتۋلى ءىس-شارا قازاق كينو مادەنيەتىن الەمدىك ونەر كەڭىستىگىندە تانىتۋعا ۇلكەن جول اشپاق.
– بۇل شارا ءبىزدىڭ كينومىز بەن مادەنيەتىمىزدىڭ دامۋىنا اسەر ەتەتىندىكتەن, قازاق كينەماتوگرافيستەرى مەن مادەنيەت قايراتكەرلەرى ءۇشىن وتە ماڭىزدى وقيعا بولىپ وتىر. وسىعان وراي, كوركەم ونەردى باعالاي بىلەتىن ۆەنەتسيا قالاسىنا شاقىرىپ, ءبىزدىڭ كينەماتوگرافيامىزدى تانىستىرۋعا مۇمكىندىك بەرگەنى ءۇشىن يتالياندىق ANICA حالىقارالىق دەپارتامەنتىنىڭ باسشىسى روبەرتو ستابيلەگە العىسىمدى بىلدىرەمىن. ءبىزدىڭ شارامىز تاريحى تەرەڭ جانە بەدەلدى ۆەنەتسيا كينوفەستيۆالى ءوتىپ جاتقان ۋاقىتتا ۇيىمداستىرىلعانى كوڭىل قۋانتادى, – دەپ حالىقارالىق «ەۋرازيا» كينوفەستيۆالىنىڭ پرەزيدەنتى ايمان مۇساقوجاەۆا مادەني جوبا جايىندا ءوز پىكىرىن ءبىلدىردى.
قازاقستان مەن يتاليا اراسىنداعى مادەني, رۋحاني دوستىق قارىم-قاتىناستىڭ ايقىن ۇلگىسىن تانىتار ايتۋلى شارا اياسىندا سوڭعى جىلدارى تۇسىرىلگەن وتاندىق كينوفيلمدەر ەۋروپالىق كورەرمەن نازارىنا ۇسىنىلادى. اتاپ ايتار بولساق, رەجيسسەر ە.بايعازيننىڭ «وزەن», ح.احمەتوۆتىڭ «ارۋاق», دج.ۆەسپانىڭ «امىرە», ب.قالىمبەتوۆتىڭ «تالان», ر.ابدىراشەۆتىڭ «الماس قىلىش», س.قۇرمانبەكوۆتىڭ «ورالمان», ت.تەمەنوۆتىڭ ء«بىزدىڭ قالانىڭ كىشكەنتاي حانزاداسى», ج.جەتىرۋوۆتىڭ «شىڭىراۋ», ە.تۇرسىنوۆتىڭ «جات», ا.ساتاەۆتىڭ «اناعا اپارار جول» جانە «ول» اتتى قوس بىردەي كينوكارتيناسىمەن قاتار, انيماتسيالىق تۋىندىلاردان: ا.ءابىلدينوۆتىڭ «كۇلتەگىن», ا.بەيسەمباەۆتىڭ «Jumper», ت.مايدان, ت.تولەۋعازىنىڭ «مۇزبالاق» فيلمدەرىنىڭ رەسمي ترەيلەرلەرى كورسەتىلەدى.
سونداي-اق شارا بارىسىندا مادەنيەت جانە سپورت مينيسترلىگى قۇرىلتايشىسى بولىپ تابىلاتىن ورتالىق ازياداعى ەڭ ءىرى كينوفورۋمداردىڭ ءبىرى – «ەۋرازيا» كينوفەستيۆالىنىڭ الەمدىك دەڭگەيدەگى تانىستىرىلىمى وتەدى. ۆەنەتسياعا باراتىن دەلەگاتسيا قۇرامىندا بولات قالىمبەتوۆ, توقتار قارساقباەۆ, تالعات تەمەنوۆ باستاعان رەجيسسەرلەر مەن اكتەر سانجار ماديەۆ جانە وزگە دە كينو سالاسىنىڭ ماماندارى بار. ونەر قايراتكەرلەرى يتالياندىق كينوسۇيەر قاۋىمعا قازاق ونەرى مەن مادەنيەتىن كەڭ اۋقىمدا تانىستىرىپ, ۇلتتىق قۇندىلىقتارىمىز جايىندا تۇششىمدى ءارى جان-جاقتى اقپارات بەرەتىن بولادى.
جوعارىدا اتاپ وتكەنىمىزدەي, ايتۋلى ونەر ساپارىنىڭ تاعى ءبىر قۋانىشتى جاڭالىعى – ءدال وسى ۋاقىتتا وتەتىن 75-ءى ۆەنەتسيا كينوفەستيۆالىنىڭ «كوكجيەك» اتتى كونكۋرستىق باعدارلاماسىندا قازاقستان اتىنان ەمير بايعازيننىڭ «وزەن» كارتيناسى باق سىناسا, «قىسقا مەتراجدى فيلمدەر» اتالىمىندا رەجيسسەر ەلدار شيبانوۆتىڭ 19 مينۋتتىق تۋىندىسى سايىسقا تۇسەتىن بولادى. يتاليانىڭ ەڭ كونە دە اۋقىمدى كينوفەستيۆالىنە قاتىسۋعا جولداما العان قوس ءفيلمنىڭ دە جۇلدىزى جانىپ, جۇلدەگەرلەر قاتارىنان كورىنەتىنىنە حالىقارالىق «ەۋرازيا» كينوفەستيۆالىنىڭ پرەزيدەنتى ايمان مۇساقوجاەۆا زور سەنىم ءبىلدىردى.
نازەركە جۇماباي,
«ەگەمەن قازاقستان»
