كوميتەت تاراتقان مالىمەتتەرگە قاراعاندا, التىندى قازاقستاندىق بايداركا ەسۋشى يننا كليموۆا جەڭىپ الدى. ونىڭ جارىستاعى ناتيجەسى - 42.045. يننا قىتايلىق قارسىلاسىنان 0.462 سەكۋندقا وزىپ كەتتى. قولا جۇلدە جاپونيالىق سپورتشىنىڭ ەنشىسىندە. «مەن جەڭىسكە جەتەمىن دەگەن ماقسات قويدىم. ويتكەنى, بۇل ەلىمىز ءۇشىن ماڭىزدى دودا.
سوندىقتان, پسيحولوگيالىق تۇرعىدان ازداپ قيىندىق تۋدى. بارلىعى وسىلاي اياقتالعانىنا ريزامىن. ەندى ءتورت ادامدىق جارىستا بارىمدى سالامىن. قولداۋلارىڭىزعا راحمەت! بۇل جەڭىسىمدى بارشا قازاقستان حالقىنا جانە دەنيس تەننىڭ رۋحىنا ارنايمىن», - دەدى كلينوۆا. سونداي-اق بايداركامەن 200 مەترگە جارىستا سەرگەي توكارنيتسكي كۇمىس جۇلدەگەر اتاندى. سەرگەيدىڭ ۋاقىت كورسەتكىشى - 35.745 سەكۋند. جەڭىمپاز اتانعان قىتايلىق سپورتشىنىڭ ناتيجەسى - 35.373. قولا جۇلدە سينگاپۋر وكىلىنە بۇيىردى.
«وكىنىشكە قاراي, كۇمىس جۇلدە... بىراق ەش مويىمايمىن. الداعى ازيا ويىندارىندا نەمەسە باسقا دا ءىرى جارىستاردا التىن الۋعا تىرىسامىن. بارلىق قازاقستان حالقىنا قولداۋ كورسەتكەنى ءۇشىن العىسىم شەكسىز», - دەدى توكارنيتسكي. قازاقستاندىقتاردىڭ ابىرويىن وسى جولى ترياتلونشىلار دا اسقاقتاتتى. قازاقستاندىقتار اسا ۇلكەن ءۇمىت ارتا قويماعانىمەن اتالمىش سپورت تۇرىنەن ەل نامىسىن قورعاعان ايان بەيسەنباەۆ كۇمىس جۇلدە الدى. ول ءجۇزۋ, ۆەلوجارىس جانە جۇگىرۋدى 1:50:38 ۋاقىت كورسەتكىشىمەن اياقتادى. ايان ازيا ويىندارىنىڭ چەمپيونى اتانعان جاپوندىق دجامپەي فۋرۋيادان 55 سەكۋندقا ۇتىلدى. ءۇشىنشى ورىندا قىتايلىق مينگسيۋ لي تۇر.
ال 200 مەترگە كانوەمەن جارىستا باسەكەگە تۇسكەن مەرەي مەدەتوۆ پەن تيمۋر حايداروۆ جۇبى قولا جۇلدەنى ەنشىلەدى. قازاقستاندىقتار بۇل سىندا قىتاي مەن وزبەكستان سپورتشىلارىنا جول بەردى. مەدەتوۆ پەن حايداروۆتىڭ ۋاقىت كورسەتكىشى - 37.371. «جارىس جوعارى دەڭگەيدە ءوتتى. قولدان كەلگەنشە ايانىپ قالعان جوقپىز. ەڭ باستىسى - ءوز ناتيجەمىزگە كوڭىلىمىز تولادى. قارسىلاستاردىڭ ءبىر باس جوعارى بولعانىن مويىندايمىز. قولداۋ كورسەتكەن جانكۇيەرلەرگە كوپ راحمەت!», - دەيدى تيمۋر حايداروۆ.
