2-8 قىركۇيەك ارالىعىندا قىرعىزستاننىڭ شولپان اتا قالاسىندا وتەتىن ءىىى دۇنيەجۇزىلىك كوشپەندىلەر ويىندارىنا قازاقستان قۇراماسى ساقاداي دايىن. بۇگىن «تاراز-ارەنا» سپورت كەشەنىندە سپورتشىلاردى شىعارىپ سالۋ ءراسىمى ءوتتى. شاراعا سپورت جانە دەنەشىنىقتىرۋ كوميتەتى توراعاسىنىڭ ورىنباسارى بەكبولات بايجانوۆ, جامبىل وبلىستىق سپورت باسقارماسىنىڭ باسشىسى نۇربول جۇنىسبەكوۆ, سونداي-اق بەلگىلى قازاقستاندىق سپورتشى اقجۇرەك تاڭاتاروۆ قاتىستى. ب. بايجانوۆتىڭ ايتۋىنشا, قازاقستان قۇراماسى وقۋ-جاتتىعۋ جيىندارىن وتكىزگەن, سايىستارعا ساقاداي ساي تۇر.
وليمپيادا ويىندارىنىڭ قولا جۇلدەگەرى اقجۇرەك تاڭاتاروۆ قازاقستان رەسپۋبليكاسىنىڭ مەملەكەتتىك تۋىن اۋدارىسپاقتان ازيانىڭ ءۇش دۇركىن چەمپيونى سىرىم ىزباساروۆقا سالتاناتتى تۇردە تاپسىردى.
37 ۇلتتىق سپورت تۇرىنەن وتەتىن ءدۇبىرلى دودادا الەمنىڭ 80 ەلىنەن جينالعان ءۇش مىڭعا جۋىق سپورتشى قاتىسادى. قازاقستاننان ەكى جۇزگە جۋىق سپورتشى بارادى.
قازاقستان دۇنيەجۇزىلىك كوشپەندىلەر ويىندارىنا العاش رەت وتكىزىلگەن 2014 جىلدان بەرى قاتىسىپ كەلەدى. سول جولى قازاقستاندىقتار 11 التىن, جالپى 28 مەدال الىپ, 18 ەلدىڭ اراسىندا ەكىنشى ورىندى يەلەنگەن بولاتىن.
2016 جىلى ۇيىمداستىرىلعان ءىى دۇنيەجۇزىلىك كوشپەندىلەر ويىندارىنا 63 ەلدەن مىڭنان استام سپورتشى قاتىستى. قازاقستان سپورتتىڭ 22 تۇرىنەن 13 التىن, جالپى 39 مەدال الىپ, جالپى ەسەپتە ءۇشىنشى ورىندى يەلەندى.
