«شامامەن 70 جىل بۇرىن, 1949 جىلعى 29 تامىزدا, كەڭەس وداعى سەمەي پوليگونىندا ءوزىنىڭ ءبىرىنشى يادرولىق جارىلعىش قۇرىلعىسىن جاردى. كەلەسى قىرىق جىل ىشىندە سەمەيدە ادامدار, سونىمەن قاتار ولاردىڭ قورشاعان ورتاسى ءۇشىن جان تۇرشىگەرلىك سالدارى بار 456 يادرولىق سىناق وتكىزىلدى. 1991 جىلعى 29 تامىزدا, پرەزيدەنت نۇرسۇلتان نازارباەۆ سەمەي يادرولىق پوليگونىن ءبىرجولا جاپتى. سونىمەن قاتار, قازاقستان بارلىعىنا ۇلگى كورسەتىپ, الەمدەگى كولەمى بويىنشا يادرولىق قارۋدىڭ ءتورتىنشى ارسەنالىنان ەركىن تۇردە باس تارتتى. قازاقستاننىڭ ارقاسىندا 29 تامىز كۇنى يادرولىق سىناقتارعا قارسى ءىس-قيمىلدىڭ حالىقارالىق كۇنى رەتىندە اتاپ وتىلۋدە», - دەدى ۇيىم باسشىسى.
ل. زەربو ياسجتشۇ-نىڭ يادرولىق سىناقتاردى بولدىرماۋ ماقساتىندا كۇندەلىكتى تىنباي جۇمىس جاساۋدا ەكەندىگىنە سەندىردى. ول استانا كونفەرەنتسياسىنىڭ بىرەگەي ەكەندىگىن دە اتاپ ءوتتى, سەبەبى, كونفەرەنتسيا العاش رەت جاستار توبىنىڭ جانە ياسجتشۇ بەدەلدى قايراتكەرلەرى توبىنىڭ باسىن قوستى. وسى توپتار بىرلەسىپ, ياسجتشۇ كۇشىنە ەنۋىنە جاردەمدەسۋ جانە قاۋىپسىزدىكتىڭ جاپپاي جاھاندىق ارحيتەكتۋراسىن قامتاماسىز ەتۋ ءۇشىن ءوز كۇش-جىگەرلەرىن قالاي بىرىكتىرۋگە بولاتىنىن تالقىلايدى.
«پرەزيدەنت ن.نازارباەۆ ايتقانداي, يادرولىق قارۋدىڭ جانە يادرولىق سىناقتاردىڭ سالدارى ۋاقىتتا, كەڭىستىكتە بولماسىن, شەكتەلۋى مۇمكىن ەمەس. بۇل – جاھاندىق ىنتىماقتاستىقتى جانە ۇرپاقتار اراسىنداعى ءوزارا ءىس-قيمىلدى تالاپ ەتەتىن جاھاندىق ماسەلە», - دەدى اتقارۋشى حاتشى.
ل. زەربو استانا كونفەرەنتسياسىنىڭ ياسجتش-تى ودان ءارى ىلگەرىلەتۋدە ماڭىزدى سەرپىن بەرەتىنىنە سەنىم ءبىلدىردى.
«كونفەرەنتسيا يادرولىق قارۋدى تاراتپاۋ شارتىن قولدانۋدى قاراستىرۋ جونىندەگى 2020 جىلعى كونفەرەنتسيا ءۇشىن 2019 جىلدىڭ دايىنداۋشى كوميتەتى جانە كورەي تۇبەگىندەگى جاعداي سياقتى وزەكتى ماسەلەلەرگە ارنالعان. سونىمەن قاتار, ءبىز قازاقستاننىڭ يادرولىق سىناقتارعا تىيىم سالۋدى ىلگەرىلەتۋدەگى جەتەكشى ءرولى تۋرالى ايتاتىن بولامىز», - دەدى ول.
كونفەرەنتسيا باعدارلاماسى ياسجتشۇ دەلەگاتسياسىنىڭ قر ۇلتتىق يادرولىق ورتالىعىنا, گەوفيزيكالىق زەرتتەۋلەر ينستيتۋتىنا جانە كۋرچاتوۆ قالاسىنداعى باسقا دا نىسانداردى ارالاۋمەن جالعاسادى.
