«نۇر اقتوبە» شاعىن اۋدانىندا «قازاقستاندىق يپوتەكالىق كومپانيا» ارقىلى 566 پاتەرگە ارنالعان تۇرعىن ءۇي كەشەنى پايدالانۋعا بەرىلدى. ولاردىڭ ىشىندە 90 پاتەر كەزەكتە تۇرعان كوپ بالالى جانە جەتىم, اتا-انا قامقورلىعىنسىز قالعاندار, تولىق ەمەس وتباسى, مۇگەدەك بالالارى بار وتباسىلارعا, بيۋدجەتتىك سالا قىزمەتكەرلەرىنە ۇلەستىرىلدى.
وبلىس اكىمى بەردىبەك ساپارباەۆ جاڭادان قونىستانۋشىلاردى ومىرىندەگى ماڭىزدى وقيعامەن قۇتتىقتادى.
ء«ار ادام ءۇشىن ءۇيدىڭ ەرەكشە ءمانى بار. تاۋەلسىزدىك جىلدارى ءبىزدىڭ ەلىمىزدە ەلباسىنىڭ باسشىلىعىمەن قازاقستاندىقتاردى تۇرعىن ۇيمەن قامتاماسىز ەتۋ بويىنشا ۇلكەن جۇمىستار اتقارىلدى. سونىڭ ىشىندە وسى اۋدان دالەل - بىرنەشە جىل بۇرىن مۇندا اشىق دالا بولاتىن, ال قازىر جاڭا تۇرعىن اۋدانى سالىنعان. پرەزيدەنتتىڭ بەس الەۋمەتتىك باستاماسى بويىنشا جاريالانعان باستى ماقساتتاردىڭ ءبىرى تۇرعىن ۇيمەن قامتاماسىز ەتۋگە باعىتتالعان. وتكەن جىلى 790 مىڭ شارشى مەتر تۇرعىن ءۇي پايدالانۋعا بەرىلدى, بيىل ءبىز كەم دەگەندە 900 مىڭ شارشى مەتر پايدالانۋعا بەرەمىز» - دەدى ايماق باسشىسى.
پاتەر كىلتىن العانداردىڭ ءبىرى – كوز اۋرۋ بويىنشا مۇگەدەك شايزادا جازىلباەۆا. ول كوپ جىلدار بويى تۇرعىن ءۇيدى جالعا العانىن ايتتى.
«مەن كەزەكتە 11 جىل قاتارىنان تۇردىم. التى ادامنان تۇراتىن ءبىزدىڭ وتباسىمىز ۇزاق ۋاقىت بويى ءۇيدى جالعا الدىق. جاقىندا بىزگە ەكى بولمەلى پاتەر الاتىنىمىزدى حابارلادى. مەن ءالى كۇنگە دەيىن تولقىپ ءجۇرمىن», - دەدى ول.
جىل باسىنان بەرى اقتوبەدە 280 مىڭنان استام شارشى مەتر تۇرعىن ءۇي سالىندى. جىل سوڭىنا دەيىن وبلىستا 900 مىڭ شارشى مەتر تۇرعىن ءۇي پايدالانۋعا بەرىلەدى.
بۇگىنگى كۇنى اقتوبە وبلىسىندا كونستيتۋتسيا كۇنىن اۋقىمدى اتاپ وتىلۋدە. وبلىس ورتالىعىندا جانە اۋدانداردا جالپى قۇنى 6 ملرد تەڭگە بولاتىن 25 الەۋمەتتىك, وندىرىستىك جانە كوممەرتسيالىق نىساندار تاپسىرىلادى.
