جيىندا ءسوز العان ينۆەستيتسيالار جانە دامۋ مينيسترلىگى اۆتوموبيل جولدارى كوميتەتى توراعاسىنىڭ ورىنباسارى امانگەلدى بەكوۆ مەملەكەت باسشىسىنىڭ تاپسىرماسىنا سايكەس 2015 جىلدان باستاپ حالىقتىڭ ءال-اۋقاتىن جاقسارتۋعا, ەل ەكونوميكاسى مەن ينفراقۇرىلىمىن جاڭا دەڭگەيگە كوتەرۋگە باعىتتالعان «نۇرلى جول» مەملەكەتتىك باعدارلاماسىنىڭ جۇزەگە اسىرىلۋ بارىسىن تىلگە تيەك ەتتى. ونىڭ ايتۋىنشا, 2015-2017 جىلدار كەزەڭىندە «نۇرلى جول» اياسىندا رەسپۋبليكالىق ماڭىزى بار 1,8 مىڭ شاقىرىمعا جۋىق اۆتوجول سالىندى جانە رەكونسترۋكتسيالاندى. ال بيىل 4,2 مىڭ شاقىرىم جول جوندەلىپ, 23 اۆتوجول جوباسىندا قۇرىلىس جۇمىستارى جوعارى قارقىنمەن جۇرگىزىلۋدە. ونىڭ ىشىندە 22 جوبا وتپەلى, جالپى ۇزاقتىعى 2900 شاقىرىم بولاتىن 10 جوبا حالىقارالىق قارجى ينستيتۋتتارىنىڭ زايمدارى ەسەبىنەن ىسكە اسۋدا. وسىنىڭ ناتيجەسىندە جىل سوڭىندا 528 شاقىرىمدىق جول قولدانىسقا بەرىلمەك.
جالپى «نۇرلى جول» جوبالارىن ىسكە اسىرۋعا جەرگىلىكتى جەلى اۆتوجولدارىن قوسقاندا 100 مىڭ ادام جۇمىلدىرىلعان. بۇعان قوسا, جول قۇرىلىستارىنا تولىقتاي وتاندىق ماتەريالدار قولدانىلادى.
جيىندا بەلگىلى بولعانداي, اتالعان باعدارلاما بويىنشا 4 مىڭ شاقىرىمنان استام جولدى جوندەۋگە رەسپۋبليكالىق جانە جەرگىلىكتى بيۋدجەتتەن 60 ملرد تەڭگە كولەمىندە قوسىمشا قارجى بولىنگەن. ال ەلىمىزدەگى جولداردى 2025 جىلعا دەيىن 85 پروتسەنتكە جاڭارتىپ, تاقتايداي تەگىستەپ وتىرۋ ءۇشىن جىل سايىن بيۋدجەتتەن 150 ملرد تەڭگە ءبولۋ كوزدەلگەن.
بۇعان قوسا, «نۇرلى جول» باعدارلاماسى نەگىزىندە جول بويىنداعى قىزمەت كورسەتۋ نىساندارىن دامىتۋعا ەرەكشە نازار اۋدارىلدى. بۇگىندە ەلىمىزدە 1 859 جول بويىندا قىزمەت كورسەتۋ نىسانى ورنالاسقان. ونىڭ 780-ءى, ياعني 42 پروتسەنتى ۇلتتىق ستاندارتقا سايكەس كەلەدى. الداعى ۋاقىتتا قولدانىستاعى نىسانداردى جاقسارتۋمەن قاتار, جاڭا نىساندار سالۋ جانە ۇلتتىق ستاندارت تالاپتارىنا ساي كەلەتىن «KazWay» ءمودۋلدى پاۆيلوندارىن ورناتۋ جوسپارلانعان.
ەركەجان ايتقازى,
«ەگەمەن قازاقستان»
