قاراعاندى شاحتالارىن باسقاراتىن «ارسەلورميتتال تەمىرتاۋ» اق بيىلعى جىلدىڭ باسىنان بەرى ەڭبەككەرلەردىڭ جالاقىسىن 33,55%-كە ارتتىرعان.
قازاقستان رەسپۋبليكاسى پرەزيدەنتىنىڭ تاپسىرماسىمەن «ارسەلورميتتال تەمىرتاۋ» اكتسيونەرلىك قوعامىن دامىتۋدىڭ 2018-2020 جىلدارعا ارنالعان جول كارتاسى جاسالىپ, بۇل قۇجاتقا قازاقستان رەسپۋبليكاسىنىڭ ينۆەستيتسيا جانە دامۋ جونىندەگى ءمينيسترى جەڭىس قاسىمبەك, قاراعاندى وبلىسىنىڭ اكىمى ەرلان قوشانوۆ جانە اتالعان كومپانيانىڭ باس ديرەكتورى پارامجيت كالون قول قويعان بولاتىن. جول كارتاسىنا سايكەس, «ارسەلورميتتال تەمىرتاۋ» ءۇش جىل ىشىندە بولات, كومىر جانە كەن دەپارتامەنتتەرىنىڭ وندىرىستىك نىساندارىنا 305 ملرد. تەڭگە ينۆەستيتسيالايدى. جىلدارعا شاققاندا, كومپانيا بيىل 100 ملرد. تەڭگە, 2019 جىلى 105 ملرد. تەڭگە جانە 2020 جىلى تاعى 100 ملرد. تەڭگە قۇيماق. ايتا كەتۋ كەرەك, بىلتىر كومپانيا تەك 50 ملرد. تەڭگە ينۆەستيتسيالاعان بولاتىن.
وسى قاراجاتتاردىڭ ەسەبىنەن ءوندىرىس وشاقتارى جەتىلدىرىلىپ, ماتەريالدىق-تەحنيكالىق تۇرعىدان جاقسارتىلىپ, شاحتەرلەر ەڭبەگىن قاۋىپسىزدەندىرۋ شارالارى جۇزەگە اسىرىلادى. يندۋستريانىڭ 4.0 ستاندارتتارى قولدانىلادى. الداعى ۋاقىتتا اسىرەسە ەكولوگيا ماسەلەلەرىنە باسا كوڭىل بولىنبەك.
قايرات ءابىلدا,
«ەگەمەن قازاقستان»
قاراعاندى
