وردالى وتىز جاسىندا كەز كەلگەن سۋرەتشىنىڭ ءتىسى باتا بەرمەيتىن تىڭ تاقىرىپتارعا بوي الدىرعان قىلقالام يەسى ونەردى ءومىرىم دەپ بىلەدى. كيەلى ونەردىڭ كيەسىن كەتىرمەۋ, تۇنىعىن لايلاماۋ سۋرەتشىنىڭ باستى ۇرانى. ونىڭ ءا.قاستەەۆ اتىنداعى مەملەكەتتىك ونەر مۋزەيىندە سالتانات قۇرعان ء«بىرتۇتاس» اتتى جەكە كورمەسى كورەرمەندى بەيجاي قالدىرمايدى.
جاس سۋرەتشىنىڭ قىرىقتان استام كەسكىندەمەلىك شىعارماسى قويىلعان كورمە جىلدار جىلجىپ, عاسىرلار الماسسا دا وتباسىنداعى جاراسىم مەن جىلىلىق, ساعىنىش پەن قامقورلىق سىندى ىزگى سەزىمدەر ءوز بيىگىندە قالا بەرەتىنىن دالەلدەيدى. كوز الدىڭداعى جانسىز بەينەدەن الدەقاشان ومىردەن وتكەن اتاڭ مەن اجەڭدى كورەسىڭ... وسى زامانعى ونەر تىلىنە ساي وتكىر دە ءوتىمدى تۋىندىلار قىلقالام شەبەرىنىڭ ۇنەمى ىزدەنىس ۇستىندە جۇرەتىنىن اڭعارتادى. ونەرتانۋشىلار ورالبەك سۋرەتتەرى ونەگە مەن كيەنى ءوزارا ۇندەستىرىپ, ۋاقىت پەن زامان تىنىسىنا ساي بەرە بىلۋىمەن ەرەكشەلەنەدى, دەيدى.
– سۋرەتشى ءوز كارتينالارىنا تاقىرىپ ىزدەپ, قيادان اسىپ, ەل شەتىنە شىعىپ كەتپەيدى. ءومىر مەن بولمىستىڭ زاڭدىلىقتارىن اتا داستۇردەن, ۇلتتىق تۇرمىستىڭ عاسىرلار بويى سىنىنان ءوتىپ, دالەلدەنگەن قارىم-قاتىناسىنان, جان-دۇنيەنىڭ قوڭىر قوبىزدىڭ سارىنىنداي مىڭ قۇبىلىسى بار يىرىمدەرىنەن ىزدەيدى. ورالبەكتىڭ وسى كورمەگە دايىندىعىنىڭ تاعى ءبىر ەرەكشەلىگى, ونىڭ تاقىرىپتىق, كوپ بەينەلى كارتينالار شىعارماشىلىعىنىڭ نەگىزگى ارقاۋى ەكەندىگىندە, – دەيدى ونەرتانۋشى سامال مامىتوۆا.
مىنا ءبىر سۋرەتتەگى داستارقان باسىنا جايعاسقان جاراسىمدى وتباسى كىشكەنتاي مەملەكەت ىسپەتتى. ۇرپاعىنا اڭىزىن شەرتىپ, ونەگەسىن ءوربىتىپ وتىرعان قازىنالى قاريا قاسيەتتىڭ التىن دىڭگەگىندەي كورىنەدى. قاريانىڭ تۋ سىرتىنا سايالى بايتەرەكتىڭ بەينەلەنۋى اكە مارتەبەسىن بارىنشا اسقاقتاتىپ تۇر. ءار وتباسى مۇشەسىنىڭ داستارقان باسىنان ءوز جولىنا ساي ورىن الۋى قازاق وتباسىنداعى ىزەت پەن قۇرمەتتىڭ, كىسىلىك پەن كىشىلىكتىڭ جارقىن ۇلگىسىن كورسەتەدى.
جىلىلىق ۇيالاعان جاراسىمدى وتباسى...
ارمان وكتيابر,
«ەگەمەن قازاقستان»
الماتى
