اعىمداعى جىلدىڭ قاڭتارىنان باستاپ شىلدە ايىنا دەيىن جەردى پايدالانۋ جانە قورعاۋدى باقىلاۋ باسقارماسى 220 سۋبەكتىنىڭ پايدالانۋىنداعى 161 مىڭ گەكتاردان استام جەردى تەكسەردى. تەكسەرۋ ناتيجەسىندە 37 شارۋا قوجالىعى انىقتالعان بۇزۋشىلىقتاردى جويۋ جانە جەردى اينالىمعا شىعارۋ تۋرالى نۇسقاۋلار الدى.
سونىمەن قاتار, باسقارما باسشىسى ابدۋاحات ءمىرزاليننىڭ مالىمەتىنشە ەسەپتى كەزەڭدە ءتارتىپ بۇزۋشىلار ەرىكتى تۇردە مەملەكەتتىك مەنشىككە 47 مىڭ گەكتاردان استام اۋىل شارۋاشىلىعى جەرلەرىن قايتاردى.
كوممەرتسيالىق ماقساتتاعى جەر ۋچاسكەلەرى تۇراقتى باقىلاۋدا. وسىلايشا, سوت شەشىمدەرىنىڭ نەگىزىندە 22,8 گەكتار اۋماقتاعى 12 ۋچاستوك قايتارىپ الىندى.
وبلىس اكىمى ەسەپتى تىڭداپ, قايتارىپ الىنعان جەرلەردى ءتيىمدى اينالىمعا ەنگىزۋ ءۇشىن بارلىق قاجەتتى شارالاردى قابىلداۋعا تاپسىرما بەردى.
- بۇل باستى مىندەت. جەر وبلىس تۇرعىندارىنىڭ پايداسىنا جۇمىس ىستەۋى كەرەك, - دەپ اتاپ ءوتتى بەردىبەك ساپارباەۆ.
سونداي-اق ول جتۇق ءۇشىن جەر ۋچاسكەلەرىن الۋ ءۇشىن كەزەك تىزىمدەرىنىڭ ەلەكتروندى دەرەكتەر بازاسىن جاڭارتۋدى تالاپ ەتتى. ەستەرىڭىزگە سالا كەتەيىك, بيىلعى جىلى وبلىستا 14 مىڭنان استام تۇرعىن ءۇي سالۋعا 10 گەكتار جەر بەرۋ جوسپارلانعان.
تەمىر قۇسايىن
