ءبىلىم جانە عىلىم مينيسترلىگى وبلىستاردىڭ, استانا, الماتى جانە شىمكەنت قالالارىنىڭ اكىمدىكتەرىمەن بىرلەسىپ ءبىلىم بەرۋ ۇيىمدارىن جاڭا وقۋ جىلىنىڭ باستالۋىنا دايىنداۋ جۇمىستارىن جۇيەلى نەگىزدە جۇرگىزىپ جاتىر.
ماسەلەن, رەسپۋبليكادا 898,4 مىڭ بالانى قامتيتىن 10 311 مەكتەپكە دەيىنگى بىلىم بەرۋ ۇيىمى بار, ونىڭ 6727-ءسى – مەملەكەتتىك, 3584-ءى – جەكە مەنشىك. كۇردەلى جوندەۋ 99 بالاباقشادا جۇرگىزىلۋدە, ونىڭ ىشىندە: جىلىتۋ جۇيەسى – 2, شاتىر – 15, جالپى قۇرىلىس جۇمىستارى – 78, قازاندىق – 4.
«99 بالاباقشانىڭ 72-ىندە كۇردەلى جوندەۋ جۇمىستارى اياقتالدى. قالعان بالاباقشادا جوندەۋ جۇمىستارىن 31 تامىزدا اياقتاۋ جوسپارلانعان. جالپى جەرگىلىكتى بيۋدجەت قاراجاتى ەسەبىنەن 1,3 ملرد تگ سوماسىنا 1662 بالاباقشادا جوندەۋ جۇمىستارى جۇرگىزىلدى», دەپ باياندادى مينيستر ە. ساعاديەۆ.
جەرگىلىكتى اتقارۋشى ورگانداردىڭ اقپاراتى بويىنشا 3 ملن-نان استام بالا 7024 مەملەكەتتىك مەكتەپكە بارادى. 350 مىڭعا جۋىق بالا ءبىرىنشى سىنىپقا باراتىنى بولجانعان. جاز كەزىندە 21 مەكتەپ اشىلدى. رەسپۋبليكالىق بيۋدجەت قاراجاتى ەسەبىنەن 110 مەكتەپ سالىنىپ جاتىر, ونىڭ ىشىندە 72-ءسى بيىل پايدالانۋعا بەرىلەدى. جەرگىلىكتى بيۋدجەت ەسەبىنەن 94 مەكتەپ, 29 مەكتەپكە قوسالقى قۇرىلىس سالىنىپ جاتىر. ونىڭ 17 مەكتەبى مەن 15 قوسالقى قۇرىلىسى پايدالانۋعا بەرىلگەن. سونىمەن قاتار, 166 مەكتەپتە جوندەۋ جۇمىستارى جۇرگىزىلگەن.
مەكتەپتەردىڭ ورتكە قارسى قاۋىپسىزدىگى جايىندا ايتار بولساق, جالپى 4 ملرد تگ استام سوماعا وتتان قورعاۋ, ءورت سوندىرگىشتى تولتىرۋ, اۆتوماتتاندىرىلعان ءورت ءسوندىرۋ جۇيەسىن جوندەۋ جۇمىستارى جۇرگىزىلدى.
3, 6, 8 سىنىپ وقۋشىلارىنا وقۋلىقتار ساتىپ الۋ ءۇشىن 28,6 ملن تەڭگە بولىنگەن. مينيسترلىك وقۋشىلاردىڭ جەتكىزىلۋىنە كۇن سايىن مونيتورينگ جاسايدى. 20 تامىزداعى جاعداي بويىنشا باسپالاردان وقۋلىقتاردى جەتكىزۋ 82,7% قۇرادى. سونىمەن قاتار, تەگىن ىستىق تاماقپەن 275 876 ادامدى قامتاماسىز ەتۋ جوسپارلانعان. بۇل جەكەلەگەن ءبىلىم الۋشى ساناتتارىنىڭ 95,2%-ىن قۇرايدى.
«جەرگىلىكتى بيۋدجەتتەردىڭ جانە دەمەۋشىلىك كومەك ەسەبىنەن تەگىن ىستىق تاماقتاندىرۋمەن 495 086 مەكتەپ وقۋشىسى نەمەسە وقۋشىلاردىڭ 17,6% جانە 9535 بالا, ونىڭ ىشىندە الەۋمەتتىك تۇرعىدان ءالسىز وتباسىلاردان شىققان بالالار مەن باستاۋىش سىنىپ وقۋشىلارى تەگىن بۋفەتتىك تاماقپەن قامتاماسىز ەتىلەدى. قالعان وقۋشىلاردىڭ مەكتەپتە تاماقتاندىرىلۋىن جەرگىلىكتى اتقارۋشى ورگاندار اتا-انالار ەسەبىنەن ۇيىمداستىرادى. رەسپۋبليكانىڭ ءۇش ايماعىندا اكىمدەردىڭ باستاماسىمەن تەگىن ىستىق تاماقتاندىرۋ باستاۋىش سىنىپتاردىڭ بارلىق وقۋشىلارى ءۇشىن ۇيىمداستىرىلعان», دەدى ە. ساعاديەۆ.
مەكتەپتەرى جوق اۋىلدى ەلدى مەكەندەردە تۇراتىن مەكتەپ جاسىنداعى بالالار ءۇشىن تاسىمالداۋ 24 048 (98%) بالاعا ۇيىمداستىرىلعان, ونىڭ ىشىندە 20 640 بالا مەكتەپكە دەيىن جانە كەرى قاراي كۇندەلىكتى تەگىن جەتكىزۋمەن قامتىلدى, 3408-ءى مەكتەپ جانىنداعى ينتەرناتتاردا تۇرادى.
ءبىلىم جانە عىلىم مينيسترلىگىنىڭ دەرەكتەرى بويىنشا, رەسپۋبليكادا 824 كوللەدج جۇمىس جاسايدى, كوللەدجدەردىڭ كونتينگەنتى — 489,2 مىڭ ادام. بيىل 8 كوللەدج اشۋ كوزدەلگەن (5 — مەملەكەتتىك جانە 3 — جەكەمەنشىك). مەملەكەتتىك تاپسىرىسپەن قابىلداۋ جوسپارى 100 مىڭ ورىندى قۇرايدى, ونىڭ 70% تەحنيكالىق, تەحنولوگيالىق جانە اۋىل شارۋاشىلىعى ماماندىقتارىنا بولىنگەن.
قازاقستاندا 131 جوعارى وقۋ ورنى جۇمىس ىستەيدى: 10 — ۇلتتىق, 31 — مەملەكەتتىك, 18 — اكتسيونەرلىك, 14 — ازاماتتىق ەمەس, 1 — دبۇ, 1 — حالىقارالىق, 56 — جەكە مەنشىك. 2017–2018 وقۋ جىلىندا ءبىلىم الۋشىلاردىڭ سانى — 534 421 ادام.
مەكتەپتەردە كۇردەلى جوندەۋ جۇمىستارىن جۇرگىزۋ, مەكتەپتە تاماقتاندىرۋدى ۇيىمداستىرۋ جانە بالالاردى مەكتەپكە جەتكىزۋ جاعدايلارى تۋرالى الماتى وبلىسىنىڭ اكىمى ا. باتالوۆ جانە تۇركىستان وبلىسىنىڭ اكىمى ج. تۇيمەباەۆ باياندادى.
ماسەلەنى قاراۋ قورىتىندىسى بويىنشا پرەمەر-مينيستر باقىتجان ساعىنتاەۆ جاڭا وقۋ جىلىنىڭ باستالۋىنا ءبىر اپتا ۋاقىت قالعانىن اتاپ ءوتتى. بۇل ماسەلەلەردىڭ بارلىعىن 1 قىركۇيەككە دەيىن شەشۋ قاجەت.
وسىعان وراي, اكىمدەرگە ءبىلىم بەرۋ ۇيىمدارىنىڭ جاڭا وقۋ جىلىنا دايارلىعىن, جوندەۋ جۇمىستارىن ۋاقىتىلى اياقتاۋ ماسەلەلەرىن جەكە باقىلاۋعا الۋدى تاپسىردى.
ءبىلىم جانە عىلىم مينيسترلىگىنە جاڭا وقۋ جىلىنا مەكتەپتەردىڭ ساپالى دايارلىعىن باقىلاۋدى جالعاستىرۋ قاجەت. مەكتەپتەردى وقۋلىقتارمەن قامتۋدى ەرەكشە باقىلاۋعا الۋ تاپسىرىلدى.
باقىلاۋ جۇمىستارى قر پرەمەر-ءمينيسترىنىڭ ورىنباسارى ەربولات دوساەۆقا جۇكتەلدى.
