ەنەرگەتيكا مينيسترلىگىنىڭ دەرەكتەرىنە سايكەس, جالپى ەنەرگيا كاسىپورىندارىنىڭ كۇزگى-قىسقى كەزەڭگە دايىندىعى ۇيىمداستىرىلعان تۇردە, كەستەگە سايكەس وتۋدە.
«2018/19 جىلدارداعى جىلىتۋ كەزەڭىن تۇراقتى وتكىزۋ ءۇشىن ينۆەستيتسيالار جانە دامۋ مينيسترلىگىمەن بىرلەسكەن بۇيرىقپەن جىلىتۋ ماۋسىمىنا دايىندىق, وتكىزۋ, ەلەكتر ستانتسيالارى مەن كوممۋنالدىق–تۇرمىستىق سەكتورلاردى جانە حالىقتى كومىرمەن قامتاماسىز ەتۋگە مونيتورينگ جاساۋ جونىندەگى شتاب قۇرىلدى. شتاب قۇرامىنا مينيسترلىكتەردىڭ جانە اكىمدىكتەردىڭ جاۋاپتى قىزمەتكەرلەرى كىردى. وتكەن اپتادا وبلىستارمەن سەلەكتورلىق كەڭەس وتكىزىلىپ, ءتيىستى ماسەلەلەر قارالدى», دەدى مينيستر ق. بوزىمباەۆ.
ق. بوزىمباەۆتىڭ ايتۋىنشا, بۇگىندە 4 ەنەرگوبلوكتىڭ جوندەۋ جۇمىستارى اياقتالدى. بۇل جىلدىق كولەمنىڭ 50% قۇرايدى. سونىمەن قاتار, 20 قازاندىق جوندەلدى. بۇل جىلدىق كولەمنىڭ 36% قۇرايدى. سونداي-اق, 20 تۋربينا نەمەسە جىلدىق كولەمنىڭ 44% قايتا جوندەۋدەن ءوتتى. قازىرگى تاڭدا ءار ءتۇرلى دەڭگەدە 4 ەنەرگوبلوكتا, 31 قازاندا جانە 25 تۋربينادا جوندەۋ جۇمىستارى جۇرگىزىلۋدە.
21 مىڭ كم ەلەكتر جەلىلەرى جوندەلگەن, بۇل جىلدىق جوسپاردىڭ 75% جانە 497 قوسالقى ستانتسيالار جوندەلدى, بۇل جىلدىق جوسپاردىڭ 77% قۇرايدى. ورتالىقتاندىرىلعان جىلۋمەن جابدىقتاۋ ايماعىنداعى 568 قازاندىقتىڭ 413-ءشى جوندەلگەن.
سونىمەن قاتار, ەلەكتر ستانتسيالارىندا 2,8 ملن توننا كومىر جانە 81 مىڭ توننا مازۋت قورى ازىرلەندى.
«ورتالىقتاندىرىلعان جىلۋمەن قامتاماسىز ەتۋ ايماعىنداعى قازاندىقتاردا 979 مىڭ توننا كومىر جيناقتالعان, نەمەسە جوسپاردىڭ 66% جانە 32 مىڭ توننا مازۋت جيناقتالعان, بۇل جوسپاردىڭ 22% قۇرايدى», دەدى ق. بوزىمباەۆ.
سونداي-اق, ەنەرگەتيكا ءمينيسترى قىسقى ماكسيمالدى جۇكتەمە 14 800 مۆت كولەمىندە بولادى دەپ كۇتىلەتىنىن ايتتى. بۇل وتكەن جىلمەن سالىستىرعاندا 185 مۆت-قا جوعارى.
ءوز كەزەگىندە ينۆەستيتسيالار جانە دامۋ ءمينيسترى ج. قاسىمبەك وسى جىلدىڭ 7 ايىندا 60 ملن توننا كومىر وندىرىلگەنىن, بۇل وتكەن جىلدىڭ سايكەس كەزەڭىمەن سالىستىرعاندا 103,9%-دى قۇرايتىنىن نەمەسە 2,3 ملن تونناعا ارتىق ەكەنىن جەتكىزدى.
قر يدم دەرەكتەرى بويىنشا, قۇرىلعان شتاب اياسىندا كۇندەلىكتى كۇزگى-قىسقى كەزەڭنىڭ دايىندىعى مەن وتۋىنە, ەلىمىزدىڭ ەلەكتر ستانتسيالارىنداعى نورماتيۆتىك وتىن قورىن جيناۋعا مونيتورينگ جۇرگىزىلەدى.
«2018–2019 جىلدار كەزەڭىندە تۇرعىندارعا, كوممۋنالدىق-تۇرمىستىق كاسىپورىندارعا جانە بيۋدجەتتىك ۇيىمدارعا رەسپۋبليكا بويىنشا كومىر جەتكىزۋدىڭ جالپى سۇرانىسى 9,8 ملن توننانى قۇرايدى, ونىڭ 2,3 ملن تونناسى كوممۋنالدىق-تۇرمىستىق كاسىپورىندار مەن بيۋدجەتتىك ۇيىمدارعا, ال 7,5 ملن تونناسى تۇرعىنداردىڭ تۇتىنۋىنا جوسپارلانعان», دەدى ج.قاسىمبەك.
بيىل جىلۋ بەرۋ ماۋسىمىنا دايىندىق باستالعالى (1 مامىردان 16 تامىزعا دەيىن) تەمىر جول كولىگىمەن 18 621,2 مىڭ توننا كومىر تاسىمالداندى. بۇل 2017 جىلدىڭ سايكەس كەزەڭىمەن سالىستىرعاندا 753,9 مىڭ تونناعا (4,2%-عا) ارتىق.
«تاسىمالدانعان 18,6 ملن توننا كومىردىڭ 2,8 ملن تونناسى – كوممۋنالدىق-تۇرمىستىق قاجەتتىلىككە تيەسىلى. ول 2017 جىلدىڭ سايكەس كەزەڭىمەن سالىستىرعاندا 600 مىڭ تونناعا ارتىق. جالپى رەسپۋبليكاىشىلىك قاتىناستا كومىر تيەۋ 91% ورىندالدى. قازىرگى تاڭدا تاسىمالداۋعا قتج پاركىنىڭ شامامەن 9 مىڭ ۆاگونى جۇمىلدىرىلعان. تاسىمالداۋ كولەمى ۇلعايعان جاعدايدا باسقا تەمىرجول اكىمشىلىكتەرىنەن 1000 ۆاگون تارتىلاتىن بولادى», دەپ ج. قاسىمبەك, قر يدم «قتج» ۇك» اق-مەن بىرلەسە وتىرىپ, ىشكى بايلانىستى كومىر تيەۋمەن قامتاماسىز ەتۋ بويىنشا جۇمىس جۇرگىزىپ جاتقاتىن ايتتى.
بۇدان وزگە, تۇرعىن ۇي–كوممۋنالدىق شارۋاشىلىق نىساندارىن الداعى جىلۋ بەرۋ ماۋسىمىنا دايىنداۋ اياسىندا 2018-2019 جىلدارعا ارنالعان جۇمىس جوسپارى بەكىتىلدى. جوسپارعا سايكەس وبلىستاردىڭ, استانا مەن الماتى قالالارىنىڭ اكىمدىكتەرىنە 1 قىركۇيەككە قاراي ءبىلىم بەرۋ نىساندارىنىڭ 100% دايىندىعىن قامتاماسىز ەتۋ, 15 قازانعا دەيىن بارلىق نىسانداردىڭ دايىندىعىن اياقتاۋ, ونىڭ ىشىندە, اۆتونومدىق قازاندىق جانە ينجەنەرلىك جەلىلەر, سونىمەن قاتار, بارلىق اۆتونومدىق جىلىتۋ كوزدەرىن وتىننىڭ نورماتيۆتىك قورىمەن قامتاماسىز ەتۋ قاجەت.
«قازىرگى تاڭدا جەرگىلىكتى اتقارۋشى ورگانداردىڭ دەرەكتەرى بويىنشا 10 232 ءبىلىم بەرۋ نىسانى نەمەسە جوسپاردىڭ 94%-ى دايىن. 6 298 دەنساۋلىق ساقتاۋ نىسانىن دايىنداۋ جوسپارلانعان بولاتىن. قازىر 5 971 نىسان نەمەسە 95% دايىن. جوندەۋگە جوسپارلانعان 45 503 تۇرعىن ءۇيدىڭ 35 551 نەمەسە 79% جوندەلدى», دەدى ج. قاسىمبەك.
اكىمدىكتەر 10 558 اۆتونومدىق قازاندىقتى جوندەۋدى جوسپارلاعان بولاتىن. قازىرگى ۋاقىتتا 9 521 (91%) قازاندىق دايىن. جوسپارلانعان 5 661,8 كم سۋمەن جابدىقتاۋ جەلىلەرىنىڭ 4 394,5 كم نەمەسە 78 % جوندەلدى.
اۆتونومدى قازاندىقتارعا الداعى جىلۋ بەرۋ ماۋسىمىنا وتىننىڭ قاجەتتىلىگى — 1 852 مىڭ توننا كومىر جانە 168 مىڭ توننا مازۋت.
«جالپى جىلۋ بەرۋ ماۋسىمىنا دايىندىق بەكىتىلگەن جوسپارعا سايكەس جۇرگىزىلۋدە جانە تۇراقتى باقىلاۋعا الىنعان. جىلۋ بەرۋ ماۋسىمىنىڭ باستالۋىنا بارلىق تۇرعىن ءۇي-كوممۋنالدىق شارۋاشىلىق جانە الەۋمەتتىك سالا نىساندارىنىڭ دايىندىعىن اياقتاۋ كەرەك. سونىمەن قاتار, اۆتونومدىق قازاندىقتاردى قاجەتتى وتىن قورىمەن قامتاماسىز ەتە وتىرىپ, وبلىستاردىڭ جانە استانا, الماتى قالالارىنىڭ اكىمدىكتەرىنە جىلۋ بەرۋ ماۋسىمىنا دايىندىق ماسەلەلەرىن تۇراقتى باقىلاۋدا ۇستاۋ قاجەت», دەدى ج. قاسىمبەك.
وڭىرلەردەگى جىلىتۋ ماۋسىمىنا دايىندىق تۋرالى اقمولا وبلىسىنىڭ اكىمى م. مىرزالين, اقتوبە وبلىسىنىڭ اكىمى ب. ساپارباەۆ, قوستاناي وبلىسىنىڭ اكىمى ا. مۇحامبەتوۆ, پاۆلودار وبلىسىنىڭ اكىمى ب. باقاۋوۆ, سولتۇستىك قازاقستان وبلىسىنىڭ اكىمى ق. اقساقالوۆ, استانا اكىمى ءا. يسەكەشەۆ, سونداي-اق شىعىس قازاقستان وبلىسى اكىمىنىڭ ورىنباسارى ە. ايمۇقاشەۆ, قاراعاندى وبلىسى اكىمىنىڭ ورىنباسارى ا. ايداروۆ باياندادى.
ماسەلەنى قاراۋ قورىتىندىسى بويىنشا پرەمەر-مينيستر باقىتجان ساعىنتاەۆ جىلىتۋ ماۋسىمىنا دايىندىق جۇمىستارى جالپى جۇرگىزىلىپ جاتقانىن, الايدا جۇمىس قارقىنىن كۇشەيتۋ قاجەتتىگىن ايتتى.
«اكىمدەرگە الەۋمەتتىك سالا وبەكتىلەرى مەن تۇرعىن ۇيلەردى جىلۋمەن, ەنەرگيامەن ۋاقىتىلى جانە ساپالى قامتاماسىز ەتۋگە سىزدەردىڭ جاۋاپتى ەكەندەرىڭىزدى ەستەرىڭىزگە سالامىن. تۇتىنۋشىلاردى, اسىرەسە, حالىقتى كومىرمەن قامتاماسىز ەتۋگە ەرەكشە نازار اۋدارۋ قاجەت», دەدى ب. ساعىنتاەۆ.
ۇكىمەت ىشكى نارىقتى كومىرمەن ۇزدىكسىز جابدىقتاۋ ءۇشىن بارلىق قاجەتتى شارالاردى قابىلدادى. سونداي-اق, ۆاگون تاپشىلىعى بويىنشا ماسەلەلەر شەشىلدى, بۇگىنگى كۇنى كومىردى جونەلتۋگە قاتىستى پروبلەمالار جوق.
«حالىقتى ساپالى كومىرمەن قاجەتتى كولەمدە ۋاقىتىلى قامتاماسىز ەتۋ جانە وعان باعا بەلگىلەۋگە وڭىرلەردىڭ اكىمدەرى تىكەلەي جاۋاپتى. كومىردىڭ ىشكى نارىعىندا وتكەن جىلعىداي جاعدايعا جول بەرمەۋ ءۇشىن وڭىرلەر اكىمدەرى ەكى اپتا مەرزىمدە كومىردى دايارلاۋ جانە ساتۋ پۋنكتتەرىنىڭ جاي-كۇيىنە, كومىردى جەتكىزۋ كەستەلەرىنە, كومىر باعاسىنىڭ نەگىزدىلىگى مەن ساپاسىنا تەكسەرۋ جۇرگىزۋى كەرەك. قاجەت بولعان جاعدايدا بۇل جۇمىسقا ورتالىق مەملەكەتتىك ورگانداردىڭ ءتيىستى اۋماقتىق بولىمشەلەرى مەن "اتامەكەن" ۇكپ وكىلدەرىن قاتىستىرۋ قاجەت», دەپ تۇيىندەدى ب.ساعىنتاەۆ.
باقىلاۋ جۇمىستارى قر پرەمەر-ءمينيسترىنىڭ ءبىرىنشى ورىنباسارى اسقار مامينگە جۇكتەلدى.
