ءومىر بولعان سوڭ ءسۇيىنىشى دە, كۇيىنىشى دە بولارى تالاسسىز زاڭدىلىق.تاۋەلسىزدىك جىلدارىندا قيىندىقتار از كەزدەسپەگەندىگى بەلگىلى. الايدا سولاردىڭ بارىنەن دە جاڭاوزەندەگى وقيعا جانىمىزعا اسا باتىپ, قاتتى قامىقتىرعانىن اشىپ ايتپاسقا بولمايدى. بۇكىل حالقىمىزعا ورتاق مەرەيلى مەرەكە شىرقىن بۇزىپ, شەكتەن شىققان تارتىپسىزدىككە ۇلاسقان ارەكەت جۇرەگىمىزگە ينەدەي قادالعانىن قالايشا بۇگەرسىڭ. قىلاۋىمىزعا قىل تۇسپەگەن بىرلىك پەن تاتۋلىققا اۋىر جارا سالعان باسبۇزارلىق كوڭىلىمىزدى سىزداتتى. ءوندىرىس ورنىمەن اراداعى ەڭبەك داۋ-شارىنا ءۇش قايناسا سورپاسى قوسىلمايتىن مۇنداي ورەسكەل قىلىقتىڭ اياق استىنان ورىن الۋى قينادى ءبارىمىزدى.
جاسىراتىنى جوق, ءبىزدىڭ ايماقتا دا جۇمىس بەرۋشىلەر مەن جۇمىس ىستەۋشىلەر اراسىندا ەڭبەكاقىعا بايلانىستى داۋلى ءماسەلەلەر جوق ەمەس. ماسەلەن, تەمىرتاۋلىق مەتاللۋرگتەر «ارسەلور ميتتال تەمىرتاۋ» كومپانياسى تاراپىنان ونى كوتەرۋ ءجونىندە تالاپتار قويىپ وتىرعانىن, ول كومبيناتتاعى كاسىپوداق ۇيىمى ارقىلى كاسىپورىن باسشىلىعىنا ءمالىم ەتىلىپ, كەلىسسوزدەر جۇرگىزىلىپ جاتقانىن بىلەمىز. ەكىجاقتى ءتۇسىنىستىك اڭگىمە تاياۋ ارادا ەڭبەككەرلەر مۇددەسىنە ساي شەشىم تابۋعا ءتيىس. «كەڭەستە كەڭدىك كوپ» دەگەندەي, دوڭگەلەك ۇستەل باسىنداعى بايىپتى كەڭەس وسىنداي ناتيجەگە اسەر ەتپەك. ايتا كەتۋ كەرەك, جوعارىدا اتالعان وقيعاعا وراي قابىلدانعان مەتاللۋرگتەر ءمالىمدەسىندە ەڭبەك كيكىلجىڭىنىڭ تەك كەلىسسوزدەر ارقىلى شەشىلۋى كەرەكتىگى اتالدى. مەن جەتەكشىلىك ەتەتىن شارۋاشىلىقتا ەڭبەك ەتۋشىلەردىڭ دە وكپە-رەنىشتەرى بولماي تۇرمايدى. ۇلكەنىمىز بولسىن, كىشىمىز بولسىن سىيلاستىققا سىنا قاقپاۋعا سابىر ساقتاپ, كەڭىنەن اقىلداسىپ, زاننىڭ شەڭبەرىندە ءمامىلەگە كەلۋگە توقتالامىز.
ورىن العان وقيعا قوعامىمىزعا, حالقىمىزدىڭ تابيعاتىنا جات ارەكەت بارشامىزدى ويلاندىرارلىق جايت. تىنىشتىق, بىرلىك, تۇسىنىستىك بەرەكەمىزدىڭ كەپىلى, دامۋىمىزدىڭ نەگىزى ەكەنىن اسىرەسە, ءالى اقىل توقتاتا قويماعان جاستار جۇرەگىنە بەرىك تۇتقانى ءلازىم. ءوزگەلەر قىزىعار, قىزعانار ءبۇگىنگى تۇرمىسىمىزدىڭ قادىرىن قاستەرلەي بىلەيىك.
قانات وتارباەۆ, «وتقانجار» جشس جەتەكشىسى.
قاراعاندى وبلىسى, نۇرا اۋدانى.
