تاۋەلسىزدىك الۋىمىزبەن بىرگە قازاققا قايتقان قۇندىلىقتىڭ ءبىرى – ناۋرىز مەرەكەسى. ولاي دەيتىنىمىز, عاسىرلار بويى ىرىسى مەن تىنىسى بولعان بۇل مەرەكەمىزدەن كەڭەس كەزەڭى كەزىندە كوز جازىپ قالعانىمىز وزىمىزگە بەلگىلى. ءايتسە دە ۇلت جاناشىرلارى سول توتاليتارلىق جۇيە كەزىندە دە بۇل مەرەكەنىڭ ۇلت ساناسىنان وشپەۋىنە وزىندىك ۇلەسىن قوسقانى دا ەستە. ايتالىق, سوناۋ 70-80 جىلداردا «لەنينشىل جاس» گازەتى 22 ناۋرىز كۇنى جاسىل بوياۋمەن شىعاتىن. سول گازەتتى قولعا العاندا جاڭا جىل دەپ اشىپ ايتپاسا دا كوكتەمنىڭ, جاڭا كۇننىڭ, جاڭا ءۇمىتتىڭ لەبى ەسىپ قويا بەرەتىن دەيدى بۇگىندە اعا ۇرپاق وكىلدەرى. ولاي بولسا, حالقىمىز ءۇشىن رۋحاني قۇندىلىعى مول وسىناۋ مەرەكەنى ءبىز تاۋەلسىزدىك تۇسىندا عانا ەمىن-ەركىن تويلاۋ مۇمكىندىگىنە يە بولدىق. الايدا ءومىرىمىزگە ەندى عانا ورنىعىپ, ەندى عانا ءوز بيىگىنە دىتتەگەن بۇل مەرەكە تۋرالى دا ءارتۇرلى الىپ-قاشپا ءسوز كوپ. ولاي بولاتىنى, ونىڭ شىعۋ تەگى عىلىمي تۇرعىدان نەگىزدەلمەگەندىگىنەن دەپ بىلەمىز. ەندى, مىنە, سول ولقىلىقتىڭ ورنى تولعانداي دەسەك, جۋىردا عانا باسپادان شىققان «ناۋ مەن ىرىس» اتتى كىتاپتىڭ جۇرت كوكەيىندەگى بىرقاتار سۇراققا جاۋاپ بەرەتىنى انىق. بۇل ەڭبەكتىڭ اۆتورى تۇركىتانۋ اكادەمياسىنىڭ قىزمەتكەرى, مادەنيەتتانۋشى سەرىك ەرعالي دەگەن ازامات. ول بۇل ەڭبەگىندە ناۋرىز مەرەكەسىن جان-جاقتى زەرتتەي وتىرىپ, ونىڭ تۇركىلىك مەرەكە ەكەنىن عىلىمي تۇرعىدان نەگىزدەپ بەرەدى. اۆتور ءوز پايىمىن وسىلاي بولۋعا ءتيىس دەگەن وزىندىك كوزقاراسىمەن عانا ەمەس, تاريحي-مادەني مۇرالار, ارحەولوگيالىق جادىگەرلەردى زەرتتەۋدەن تۋعان ورنىقتى ويمەن قورىتىندىلاپ وتىرعان. سونداي-اق ول كەزىندە بارشا تۇركى حالقىن اق تىلەۋلەر اعىسىمەن قۋانتقان بۇل مەرەكەنىڭ ءالى دە ءوز بيىگىنە كوتەرىلە الماي وتىرۋ سەبەپتەرىنە دە توقتالا كەتەدى. ياعني, ونىڭ ايتۋىنشا, ۇلتتىق مەرەكەلەر تىڭعىلىقتى زەرتتەۋ نىسانىنا اينالا قويماعاندىقتان دا, «ازاماتتىق مەرەكەلىك مازمۇنعا يە بولا الماي وتىر»...
ورايى كەلگەندە, كىتاپتىڭ العىسوزىن فيلولوگيا عىلىمدارىنىڭ دوكتورى ديحان قامزابەك ۇلىنىڭ جازعانىن, بايلانىس جانە اقپارات مينيسترلىگىنىڭ قارجىلاندىرۋىمەن «قازىعۇرت» باسپاسىنان 2000 دانامەن شىققانىن دا تىلگە تيەك ەتە كەتسەك دەيمىز.
قورىتا ايتقاندا, حالقىمىزدىڭ رۋحىن كوتەرىپ, رۋحاني قاجەتتىلىگىن وتەۋگە مول سەپتىگى بار مەرەكە تۋرالى بۇل كىتاپ ءوز وقىرمانىن تابادى دەگەن ويدامىز.
سەرىكقازى كاكىبالانوۆ.
