مەرەيتويلىق شارالار لەگى ورتالىق الاڭدا ۇلى اباي ەسكەرتكىشىنىڭ اشىلۋىنان باستالدى. اۋدان باسشىسى جارقىنبەك بايسابىروۆتىڭ باستاماسىمەن شىڭعىستاۋدىڭ ءار تاراپتا جۇرگەن ازاماتتارى مەن دەمەۋشىلەر قارجىسىنا بوي كوتەرگەن, قولادان جاسالعان ەڭسەلى ەسكەرتكىشتىڭ اۆتورى – جاس ءمۇسىنشى نۇربول قاليەۆ.
ەسكەرتكىشتىڭ اشىلۋىنا شىعىس قازاقستان وبلىسىنىڭ اكىمى دانيال احمەتوۆ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, قوعام قايراتكەرى حافيز ماتاەۆ, جازۋشى مەدەۋ سəرسەكە, تالعات كەڭەسباەۆ, ءانشى كەنجەعالي مىرجىقباي, ءداستۇرلى ءانشى گۇلميرا سارينا باستاعان قۇرمەتتى قوناقتار قاتىستى. بۇدان كەيىن وبلىس اكىمى اۋداندىق كىتاپحاناعا بارىپ, «رۋحاني جاڭعىرۋ» باعدارلاماسى اياسىندا «اباي الەمى» سەرياسىمەن جارىق كورگەن اباي, شاكارىم, مۇحتار شىعارمالارى جانە امىرە قاشاۋباەۆ تۋرالى عۇمىرنامالىق ەڭبەكتەردى كىتاپحانا ۇجىمىنا تارتۋ ەتتى.
مەرەيتويعا كەلگەن قۇرمەتتى قوناقتار قاراۋىلداعى اقىن ەسكەرتكىشىنە گۇل شوقتارىن قويىپ, تاعزىم جاسادى. ەرەكشە اتاپ وتەرلىگى, بۇل كۇنى ونەرىمەن, سپورتىمەن اتى شىققان اۋدان ورتالىعىندا كۇنىنە 40 ادام سپورتپەن شۇعىلدانا الاتىن, ۇزىندىعى 25, ەنى 8 مەتر, بەس جولاقتى باسسەين اشىلدى. ررتالىق ستاديوندا ش.قۇدايبەردى ۇلىنىڭ 160 جىلدىق مەرەيتويى سالتاناتتى تۇردە اشىلىپ, «اباي ەلى - رۋحانيات مەكەسى» اتتى تەاترلاندىرىلعان مۋزىكالىق كورىنىس قويىلدى.
«بيىلعى جىل - عۇلاما شاكارىمنىڭ 160 جىلدىعىمەن ماڭىزدى. ازاتتىقتىڭ ارقاسىندا «اق جولدان اينىماي, ار ساقتاۋدى» وسيەت قالعان اقىننىڭ ار ءىلىمى ءبىزدىڭ باعا جەتپەس قۇندى مۇرامىزعا اينالدى. شاكارىم - اقىل مەن پاراسات, اسقاق رۋح پەن ادال ەڭبەكتىڭ ايناسى», دەدى سالتاناتتى شارادا قۇتتىقتاۋ ءسوز سويلەگەن د.احمەتوۆ.
وبلىس اكىمىنەن كەيىن ءسوز العان استانادان ارنايى كەلگەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ مەملەكەتتىك حاتشى گۇلشارا ابدىحالىقوۆانىڭ قۇتتىقتاۋىن وقىپ بەردى. مەرەيتويلىق شارالار ءتۇس اۋا قاراۋىل توبەدە ۇلتتىق ويىندارمەن جالعاسادى.
ازامات قاسىم,
«ەگەمەن قازاقستان»
شىعىس قازاقستان وبلىسى,
اباي اۋدانى,
قاراۋىل اۋىلى
سۋرەتتەردى تۇسىرگەن - اۆتور
