سايىس قورىتىندىسى بويىنشا قازاقستان رەسپۋبليكاسى قارۋلى كۇشتەرىنىڭ قۇراماسى جالپى كوماندالىق ءۇشىنشى ورىندى يەلەندى, ءبىرىنشى ورىنعا رەسەي فەدەراتسياسىنىڭ كومانداسى, ال ەكىنشى ورىنعا قىتاي حالىق رەسپۋبليكاسىنىڭ اسكەري قىزمەتشىلەرى قول جەتكىزدى. جۇلدەگەرلەردى ماراپاتتاۋ راسىمىنە قازاقستاننىڭ قورعانىس ءمينيسترى نۇرلان ەرمەكباەۆ قاتىستى.
ۇزدىك ۇشتىكتى تۇيىندەدى
قازاقستاننىڭ اسكەريلەر كومانداسىنىڭ دايارلىعىن ۇيىمداستىرۋشىلار جوعارى باعالادى. اتاپ ايتقاندا, ويىننىڭ تورەشىلەر القاسىنىڭ مۇشەلەرى قازاقستان قارۋلى كۇشتەرى اسكەري قىزمەتشىلەرىنىڭ دايىندىق دەڭگەيى, كاسىبي شەبەرلىگى مەن جاۋىنگەرلىك ماشىقتارى جوعارى ەكەنىن ەرەكشە اتاپ ءوتتى. ارميالىق ويىنداردا «استانا», «وڭتۇستىك», «باتىس», «شىعىس» وڭىرلىك قولباسشىلىقتارىنىڭ 300-گە جۋىق اسكەري قىزمەتشىسى باقتارىن سىناعان ەدى. سايىستاردىڭ قورىتىندىسى بويىنشا قازاقستان قۇراماسى 4 التىن, 4 كۇمىس جانە 4 قولا مەدال يەلەندى.
ارحو سايىسىنىڭ جابىلۋى شەڭبەرىندە قورعانىس ءمينيسترى ن.ەرمەكباەۆ رەسەي قورعانىس ۆەدومستۆوسىنىڭ باسشىسى, ارميا گەنەرالى س.شويگۋمەن كەزدەسۋ وتكىزدى. كەزدەسۋ بارىسىندا تاراپتار ەكىجاقتى اسكەري ىنتىماقتاستىقتىڭ بۇدان كەيىنگى ماسەلەلەرىن تالقىلادى.
اتالعان كەزدەسۋدە س.شويگۋ قازاقستان كومانداسىنىڭ ارميا حالىقارالىق ويىندارىنداعى جەڭىستەرى قازاق اسكەريلەرىنىڭ جوعارى دايىندىق دەڭگەيىن پاش ەتكەندىگىن جانە بۇل سايىس ەكى مەملەكەتتىڭ اسكەري-تەحنيكالىق قارىم-قاتىناستارىن تالقىلايتىن تاپتىرماس الاڭعا اينالعاندىعىن اتاپ ءوتتى.
– سىزدەردىڭ كوماندالارىڭىز جاقسى ونەر كورسەتتى, جۇلدەگەرلەر قاتارىنان كورىندى, ءتىپتى جەكەلەگەن سايىستاردا ءبىرىنشى ورىندى يەلەندى. بۇل قازاقستان ارمياسىنىڭ جوعارى دەڭگەيدە جاراقتاندىرىلىپ, وقىتۋ-ۇيرەتۋ ماشىقتارىنىڭ ارتقاندىعىنىڭ بەلگىسى, – دەدى رەسەي قورعانىس ءمينيسترى.
ءوز كەزەگىندە نۇرلان ەرمەكباەۆ رەسەيدىڭ قازاقستان ءۇشىن ەڭ جاقىن اسكەري سەرىكتەس ەكەندىگىنە توقتالىپ, ىنتىماقتاستىق ارتا بەرەتىندىگىنە سەنىم ءبىلدىردى.
وتاردا وعلاندارىمىز وزدى
حالىقارالىق ويىنداردىڭ قازاقستان اۋماعىندا وتكەن كەزەڭىنىڭ جابىلۋ راسىمىنە قورعانىس ءمينيسترىنىڭ ءبىرىنشى ورىنباسارى – قازاقستان قارۋلى كۇشتەرى باس شتابىنىڭ باستىعى, گەنەرال-لەيتەنانت مۇرات مايكەەۆ قاتىستى.
ارميا ويىندارىنىڭ شەڭبەرىندە «وتار» 40-شى اسكەري بازاسىنىڭ اۋماعىندا وتكەن بايقاۋلاردىڭ بارلىق كەزەڭدەرىندە قازاقستان قارۋلى كۇشتەرىنىڭ اسكەري قىزمەتشىلەرى ءبىرىنشى بولدى.
«وتار» اسكەري بازاسىندا ارميا حالىقارالىق ويىندارى شەڭبەرىندە «ارتيللەريالىق وق اتۋ شەبەرلەرى», «سۇڭقار اڭشىلىعى» جانە «سەنىمدى قابىلداۋ» حالىقارالىق بايقاۋلارى وتكەن بولاتىن.
«ارتيللەريالىق وق اتۋ شەبەرلەرى» بايقاۋىنىڭ قورىتىندىسى بويىنشا قۇراما كوماندالار اراسىندا قازاقستاندىق اسكەري قىزمەتشىلەر ءبىرىنشى ورىنعا, بەلارۋس پەن وزبەكستاننىڭ قاتىسۋشىلارى ەكىنشى ورىنعا, ازەربايجان مەن رەسەيدىڭ ارتيللەرياشىلارى ءۇشىنشى ورىنعا يە بولدى.
«سۇڭقار اڭشىلىعى» بايقاۋىنىڭ ناتيجەلەرى بويىنشا قازاقستاننىڭ اسكەري قىزمەتشىلەرى – ءبىرىنشى, رەسەي كومانداسى – ەكىنشى جانە بەلارۋس كومانداسى ءۇشىنشى ورىنداردى ەنشىلەدى.
ال «سەنىمدى قابىلداۋ» بايقاۋىنىڭ قورىتىندىسى بويىنشا قازاقستاندىق ارميانىڭ اسكەري بايلانىسشىلارى ابسوليۋتتىك جەڭىمپاز اتاندى. ويىنعا بارلىعى 12 مەملەكەتتەن, ياعني, ازەربايجان, بەلارۋس, ۆەنەسۋەلا, زيمبابۆە, يران, قازاقستان, قىتاي, قىرعىزستان, رەسەي, تاجىكستان, وزبەكستان جانە سيريادان 18 كوماندا قاتىستى.
سايىستاردىڭ قورىتىندىسى بويىنشا جۇلدەگەرلەر كۋبوكتارمەن, ديپلومدار جانە باعالى سىيلىقتارمەن ماراپاتتالدى.
«دوستاستىق جاۋىنگەرلەرىن» كۇتىپ الدى
ەلورداداعى «نۇرسۇلتان نازارباەۆ» اۋەجايىندا اعىمداعى جىلعى شىلدەنىڭ 28-ءى مەن تامىزدىڭ 3-ءى ارالىعىندا ارمەنيا رەسپۋبليكاسىندا وتكەن «دوستاستىق جاۋىنگەرى» حالىقارالىق بايقاۋىندا ءبىرىنشى ورىن العان قازاقستاندىق كوماندانى قارۋلى كۇشتەرىنىڭ باسشىلىعى, اسكەري قىزمەتشىلەردىڭ قارۋلاستارى مەن جاقىن تۋىستارى كۇتىپ الدى.
بۇل جەردە قازاقستان قارۋلى كۇشتەرى باس شتابى باستىعىنىڭ ورىنباسارى, گەنەرال-مايور مۇحامەدجان تالاسوۆ حالىقارالىق ارەنادا قازاقستاندىق ارميانىڭ نامىسىن قورعاعان اسكەري قىزمەتشىلەردى ماقتان تۇتاتىنىن ايتتى. قازاقستاندىق ارميانىڭ قۇراما كومانداسى «دوستاستىق جاۋىنگەرى» بايقاۋى بەس كەزەڭىنىڭ قورىتىندىسى بويىنشا ابسوليۋتتىك جەڭىمپاز اتانعانىن ەستەرىڭىزگە سالا كەتەيىك.
قازاقستاندىق ارمياشىلار, سونداي-اق «ەلبرۋس ساقيناسى» بايقاۋىندا كوشباسشىلار ۇشتىگىنە ىلىككەن بولاتىن.
14 تارتىستى, كۇردەلى جانە ءارتۇرلى ارنايى تاپسىرمالاردان كەيىن قازاقستاننىڭ كومانداسى 10837 ۇپاي جيناپ, ءۇشىنشى ورىندى يەلەندى. ءبىرىنشى ورىندا – رەسەيدىڭ تاۋلى بولىمشەلەرى جانە ەكىنشى ورىندا قىتاي اسكەريلەرى.
سايىس قۇزعا ورمەلەۋ, تاۋدا باعدارلاۋ, تاۋلى كەدەرگىلەر جولاعىن ەڭسەرۋ, وق اتۋ, وزەن وتكەلدەرى جانە دەسانتتىق ءتۇسىرۋدى قامتىدى. بايقاۋدىڭ شەشۋشى كەزەڭى (2300 م) 100 شاقىرىمدىق مارشرۋتتان ءوتۋ بولدى. قاباردا-بالقار رەسپۋبليكاسىندا وتكەن «ەلبرۋس ساقيناسى» بايقاۋىنا الەمنىڭ 7 ەلىنىڭ تاۋلى بولىمشەلەرى قاتىسقان ەدى.
سەرىك ابدىبەك,
«ەگەمەن قازاقستان»
