ونىڭ ايتۋىنشا, جىلۋ بەرۋ ماۋسىمى قارساڭىندا كومىر نارىعىندا باعانىڭ دەڭگەيىن جاساندى تۇردە ءوسىرۋ بايقالادى. ءبىرىنشى كەزەكتە بۇل جاعداي كومىر وندىرۋشىلەر مەن تۇتىنۋشىلار اراسىندا بىرقاتار دەلدال ۇيىمداردىڭ باعانى شەكتەن تىس اسىرۋىنا بايلانىستى. ەسكەرەتىنى, كومىر باعاسىن بەكىتۋ, ساۋدالىق قىزمەتتى رەتتەۋ جانە دەلدالدىق قۇرىلىمداردى جويۋ ەنەرگەتيكا مينيسترلىگىنىڭ قۇزىرىنا جاتپايدى. بۇل ماسەلەنى رەتتەۋ ۇلتتىق ەكونوميكا مينيسترلىگىنىڭ قۇزىرىندا. اتالعان مينيسترلىك بيىلعى جىلۋ ماۋسىمىندا كوتەرىلگەن ماسەلەنى شەشۋ ءۇشىن ناقتى قادامدار جاساپ وتىرعان جوق. تەك ۇكىمەتتىڭ تاپسىرماسى بويىنشا بيرجالىق ساۋدا مەحانيزمىن جەتىلدىرۋ, كومىر نارىعىنا قاتىسۋشىلارعا تالاپتاردى ورناتۋ جانە كومىر ساۋداسى نارىعىنىڭ اشىقتىعىن قامتاماسىز ەتۋ بويىنشا ءتيىستى زاڭ جوباسىن ازىرلەۋ قاراستىرعان. بىراق ونىڭ ناقتى قاشان جۇزەگە اساتىنى ءالى بەلگىسىز.
ق.ساۋىرباەۆ كەلتىرگەن مالىمەتكە سۇيەنسەك, بيىلعى 7 ايدا كومپانيا 56 ملن توننا كومىردى تاسىپ ۇلگەرگەن. بۇل كورسەتكىش وتكەن جىلعى سايكەس كەزەڭمەن سالىستىرعاندا ارتىق بولىپ وتىر. كوممۋنالدىق-تۇرمىستىق قاجەتتىلىكتەر بويىنشا تۇتىنۋشىلار ءۇشىن 4,5 ملن توننا كومىر جەتكىزىلىپ, بۇل كورسەتكىش بىلتىرعا قاراعاندا 10 پايىزعا جوعارى. سونداي-اق, جىل سوڭىنا دەيىن 106,5 ملن توننا كومىر تاسىمالداۋ جوسپارلانىپ وتىر. ونىڭ ىشىندە قازاقستاندىق تۇتىنۋشىلارعا 75,9 ملن توننا جەتكىزىلمەك. جۇك تاسىمالدايتىن كومپانيادا اتالعان جۇككە ارنالعان 54 مىڭ اشىق ۆاگون بار, سونىڭ 29 مىڭى كومىر تاسىمالىنا جۇمىلدىرىلعان. سايكەسىنشە, بۇل كورسەتكىش بىلتىرمەن سالىستىرعاندا 4 مىڭ ۆاگونعا ارتىق.
− كوممۋنالدىق-تۇرمىستىق كومىردى تاسىمالداۋعا 9 مىڭنان استام اشىق ۆاگون تارتىلدى. جىلجىمالى قۇرامنىڭ تاپشىلىعىن بولدىرماۋ ماقساتىندا اشىق ۆاگونداردى كومىر رازرەزدەرىنە بەكىتۋ شارالارى ىسكە اسىرىلدى, -دەدى ق.ساۋىرباەۆ.
ايتا كەتەرلىگى, بىلتىر جىلىتۋ ماۋسىمى كەزىندە ەلدە كومىر تاپشىلىعى تۋىنداپ, اتالعان وتىن تۇرىنە سۇراقتىڭ جوعارى بولۋىنان باعا شارىقتاپ كەتكەن بولاتىن. اتالعان سالا ماماندارى جەرگىلىكتى اتقارۋ ورگاندارىنىڭ الدىن الا قامدانباعانى جانە كومىر جەتكىزۋشىلەردىڭ جوسپارلى تۇردە جۇمىس جاساماعانى سالدارىنان كومىر تاپشىلىعى سەزىلگەنىن ايتادى. بۇل ماسەلە بيىل قايتادان قايتالانباس ءۇشىن ەنەرگەتيكا مينيسترلىگى
جەرگىلىكتى اتقارۋشى ورگاندارعا 2018-2019 جىلدارعا ارنالعان كوممۋنالدى-تۇرمىستىق قاجەتتىلىكتەرگە جانە تۇرعىنداردىڭ كومىرگە سۇرانىسى بويىنشا جوسپار قۇرىلدى تاپسىرىپ وتىر.
ەركەجان ايتقازى,
«ەگەمەن قازاقستان»
