جۋىردا قازاقستاننىڭ حالىق اقىنى مۇحتار شاحانوۆتىڭ شىعارماشىلىق ءۇيى ءوزى تۋعان تۇركىستان وبلىسى, وتىرار اۋدانى, جاڭا شىلىك اۋىلىندا اشىلعان بولاتىن. ەكى قاباتتى عيماراتتا اقىننىڭ بالالىق شاعىنان بۇگىنگە دەيىنگى ءومىر جولىنان ءتۇرلى سۋرەتتەر مەن قۇجاتتار ورنالاستىرىلعان. سونداي-اق اقىننىڭ شىعارماشىلىقپەن اينالىساتىن جۇمىس كابينەتتەرى مەن كىتاپحانا, دەمالىس جانە قوناق قابىلدايتىن بولمەلەر زامان تالابىنا ساي جابدىقتالعان.
ەندى ورداباسى اۋدانى, جاڭاتۇرمىس اۋىلىندا جازۋشى, دراماتۋرگ, قوعام قايراتكەرى دۋلات يسابەكوۆتىڭ كىتاپحاناسى اشىلدى. كىتاپحانانىڭ اشىلۋ سالتاناتىندا جازۋشىلار وداعىنىڭ مۇشەلەرى, ەلىمىزگە تانىمال اقىن-جازۋشىلار مەن زيالى قاۋىم وكىلدەرى, اتاپ ايتساق ەركىنبەك تۇرىسوۆ, بەكسۇلتان نۇرجەكەەۆ, مارحابات بايعۇت, قۇلبەك ەرگوبەك, قاسىمحان بەگمانوۆ, قازىبەك يسا ءسوز سويلەپ, قالامگەردى قۋانىشىمەن قۇتتىقتادى. سونداي-اق تۇركىستان وبلىسى اكىمىنىڭ ورىنباسارى ۇلاسبەك سادىبەكوۆ وبلىس اكىمى جانسەيىت تۇيمەباەۆتىڭ سىيلىعىن تاپسىرىپ, قۇتتىقتاۋ حاتىن وقىپ بەردى. ء«سىزدىڭ شىعارمالارىڭىز ءومىردىڭ وزىنەن الىنعان. اينالاداعى كۇندە كورىپ جۇرگەن قۇبىلىستار وزىندىك قۇنارلى دا قاراپايىم تىلىمەن الەۋمەتتىك دەڭگەيگە دەيىن كوتەرىلگەن شىنشىل تۋىندىلار. ۇلتىنىڭ كوكەيىندەگى ويىن ايتىپ, جوعىن ىزدەۋدەن تانبايتىن, تەرەڭ ويلارى مەن قالام قازىناسىن قاتار ۇستاپ, ۇنەمى سەرگەك جۇرەتىن ايگىلى جازۋشى ادەبي ورتا مەن جالپى وقىرمان ىقىلاسىنا بولەنگەن باقىتتى جازۋشى دەپ سەنىممەن ايتا الامىز. الداعى ۋاقىتتا دا ەلىمىزدىڭ ءوسىپ-وركەندەۋىنە قوساتىن ۇلەسىڭىز ەسەلەنە تۇسەدى دەپ بىلەمىن» دەلىنگەن ءوڭىر باسشىسىنىڭ قۇتتىقتاۋ حاتىندا.
كىتاپحانا ءارى مۇراجاي رەتىندە سالىنعان ۇيدە دۋلات يسابەكوۆتىڭ كىتاپتارى مەن ءتۇرلى ماراپاتتارى, ءومىرى مەن شىعارماشىلىعىنان سىر شەرتەتىن زاتتار قويىلعان. جازۋشىنىڭ جۇمىس ىستەيتىن جانە دەمالاتىن بولمەلەرى دە تالاپقا ساي جابدىقتالعان. سونىمەن قاتار قازاق جانە الەم جازۋشىلارى مەن اقىندارىنىڭ كىتاپتارى بار. جالپى سانى 2500 كىتاپتى جازۋشىنىڭ ءوزى تارتۋ ەتىپتى. ەلباسى ن.نازارباەۆتىڭ «رۋحاني جاڭعىرۋ» باعدارلاماسى شەڭبەرىندە قولعا الىنعان ءىس-شاراعا اۋىلداعى ەل اعالارى مەن وقىرمان قاۋىم ريزاشىلىعىن ءبىلدىردى.
ءوز كەزەگىندە دۋلات يسابەكوۆ قۇرمەت كورسەتكەن جەرلەستەرى مەن وقىرمان قاۋىمعا, وبلىس باسشىلىعىنا العىسىن ايتىپ, شىعارماشىلىق ۇيىندە ءتۇرلى تاقىرىپتاعى ەڭبەكتەرىن جالعاستىراتىنىن جەتكىزدى.
عالىمجان ەلشىباي,
«ەگەمەن قازاقستان»
