اتالعان دوداعا قازاقستان اتىنان نازارباەۆ ۋنيۆەرسيتەتتىڭ 3-كۋرس ستۋدەنتى ەكاتەرينا شەستاكوۆا قاتىستى. ول عيماراتتاردا ەنەرگيا تيىمدىلىگىن ارتتىراتىن ماتەريالدار تاقىرىبىنداعى جۇمىسىن تانىستىردى. جۇلدەلى ەكىنشى ورىن مەن وعان تاعايىندالعان 300 ەۋرو اقشالاي سىيلىق شۆەيتساريادان كەلگەن قاتىسۋشى ماكسيميليان كيسسكە بۇيىردى. ونىڭ قورعاعان تاقىرىبى – اۋەدە ەركىن قۇلاۋدىڭ فيزيكاسى. بىرىككەن اراب امىرلىكتەرىنەن كەلگەن قاتىسۋشى موحاممەد فاۋزاان شايحتىڭ «يادرولىق رەاكتور» تاقىرىبىندا دايىنداعان جوباسى ۇزدىك دەپ تانىلدى. ءبىرىنشى ورىندى ەنشىلەگەن وعان ۇيىمداستىرۋشىلار تاراپىنان 400 ەۋرو اقشالاي سىيلىق بەرىلدى. بۇعان قوسا جوبا جەڭىمپازى قاراشا ايىندا لوندوندا وتەتىن فينالدىق كەزەڭگە قاتىسۋعا جولداما الدى. وندا ءتورت قۇرلىقتان ۇزدىك دەپ تانىلعان 5 قاتىسۋشى جارىسقا تۇسەدى.
اتالعان جوبانىڭ ۇيىمداستىرۋشىلارى The IET (Institution of Engineering and Technology) – الەمنىڭ ەڭ ۇلكەن ينجەنەريالىق ۇيىمدارىنىڭ ءبىرى. دۇنيە ءجۇزى بويىنشا 150 مەملەكەتتەن 168 مىڭنان اسا مۇشەسى بار. جوبانى ۇيىمداستىرۋداعى نەگىزگى ماقسات – الەمدىك ينجەنەريا قوعامىن اقپاراتتاندىرۋ جانە ىنتالاندىرۋ.
ايتا كەتەرلىگى, اتالعان جوبانىڭ العاشقى تولقىنى ۇلتتىق دەڭگەيدە ۇيىمداستىرىلادى. ءساۋىر ايىندا نازارباەۆ ۋنيۆەرسيتەتتەگى ينجەنەر جانە تەحنولوگ ستۋدەنتتەردەن قۇرالعان توپ PATW (Present Around The World) جارىسىن وتكىزدى. بۇل جارىسقا 30 جاسقا دەيىنگى كەز كەلگەن ستۋدەنت, عالىم, ينجەنەر قاتىسۋعا مۇمكىندىك الدى. ءبىرىنشى كەزەڭدە 8 قاتىسۋشى ىرىكتەلىپ, ارالارىنان جەڭىمپاز اتانعانى كەلەسى كەزەڭگە قاتىسۋعا جولداما الدى. ەكىنشى ايماقتىق كەزەڭ ەۋروپا, افريكا جانە تاياۋ شىعىس ەلدەرىن قامتيدى. بيىل ۇيىمداستىرۋشىلار ايتۋلى شارانى استانادا وتكىزۋگە نيەت بىلدىرگەن. بىلتىرعى ايماقتىق كەزەڭ دۋبايدا وتكەن بولاتىن.
ەركەجان ايتقازى,
«ەگەمەن قازاقستان»
