ەلىمىز ءۇشىن بيىلعى جىلى وتكەن وتە ماڭىزدى مادەني وقيعالاردىڭ ءبىرى – ەلوردانىڭ 20 جىلدىق مەرەيتويى. بۇل شارا شىلدە ايىنىڭ باسىندا رەسپۋبليكا كولەمىندە اتاپ وتىلگەن ەدى. دەي تۇرعانمەن, جوعارىداعى مارتەبەلى مەرەكە ءالى دە جالعاسىن تابۋدا. سونىڭ ءبىرى – الداعى تامىز ايىنىڭ 30-31-ءى كۇندەرى ەلوردا ىرگەسىندەگى «قازانات» اتشابارىندا جامبى اتۋدان وتەتىن ءىى حالىقارالىق «التىن جەبە» ءتۋرنيرى.
بۇل تۋرنير العاش رەت وتكەن جىلى جالاۋىن كوتەرىپ, باس جۇلدە رۋمىنيالىق مەرگەن ميحاي كۋزميدىڭ قانجىعاسىندا كەتكەن بولاتىن. ال بيىلعى ءتۋرنيردى ۇيىمداستىرۋشى مادەنيەت جانە سپورت مينيسترلىگى ۇلتتىق جانە ات سپورتى تۇرلەرى ورتالىعى ديرەكتورىنىڭ ورىنباسارى ءارى ءتۋرنيردىڭ باس تورەشىسى نۇركەن بايبوريەۆ بەرگەن مالىمەتكە جۇگىنسەك, بۇل جولعى مەرگەندەر سايىسىنا ەلىمىز ساداقشىلارىمەن قاتار, تۇركيا, مالايزيا, كۋۆەيت, وڭتۇستىك افريكا, رۋمىنيا, ۆەنگريا, موڭعوليا, رەسەي, قىرعىزستان قاتارلى ەلدەردىڭ مەرگەندەرى قاتىسپاقشى.
وتكەن جىلعى سايىستان بيىلعى ءتۋرنيردىڭ نەگىزگى ەرەكشەلىگى, جارىس تۇرىك, ازيا جانە قازاق ءستيلى بويىنشا ءۇش كەزەڭمەن وتەدى. جۇلدە قورى دا قوماقتى – 4 ميلليون تەڭگە. ناقتىراق ايتقاندا, ء بىرىنشى ورىنعا – 1,8 ملن, ەكىنشى ورىنعا – 1 ملن, ءۇشىنشى ورىنعا – 800 مىڭ تەڭگە بۇيىرماق. ونىڭ سىرتىندا 4-5-ءشى ورىندارعا دا قوماقتى سىيلىقتار بار. سونىمەن قاتار جارىسقا قاتىسۋشى مەرگەنگە اعاشتان, بامبۋكتەن جاسالعان نەمەسە سپورتتىق كاربون جەبەنى قولدانۋعا رۇقسات بەرىلەدى دەيدى ۇيىمداستىرۋشىلار.
بەكەن قايرات ۇلى,
«ەگەمەن قازاقستان»
