بۇدان بولەك دۋلاتتىڭ 12 جىلدان بەرى تۇراقتى تۇردە اينالىساتىن ماۋسىمدىق كاسىبى بار. ول الا جازداي لاي قۇيىپ, سامان كىرپىش قۇيادى.
دۋلات ءۇشىن جۇمىس كەستەسى تاڭعى ساعات 4-5-تە باستالادى. تاڭمەن تالاسا تۇراتىن جىگىت ءبىر جازدا 10-12 مىڭ كىرپىش قۇيادى. كىرپىشى كەۋىپ بولماي كليەنت تابىلادى. جىمپيتىلىقتار دۋلاتتىڭ سامان كىرپىشىن ارنايى تاپسىرىسپەن تالاسا ساتىپ الادى. ءبىر كىرپىشتىڭ باعاسى – 55-60 تەڭگە.
دۋلاتتىڭ ايتۋىنشا, بۇگىندە قۇرىلىسقا پايدالانىلاتىن ماتەريال ءتۇرى كوبەيگەنىمەن, سامان كىرپىشكە سۇرانىس ءالى بار كورىنەدى.
– كىرپىش قۇيۋ ءۇشىن قارا كۇش ەمەس, ەپ پەن ىڭعاي كەرەك. ارينە ەل اۋىر جۇمىس دەپ جاتادى. اۋىرى اۋىر عوي, بىراق ۇيرەنىپ قالعاندىقتان با, مەن ءۇشىن اسا قيىن ەمەس. وسى كاسىپتىڭ ءوزى وتباسىما كادىمگىدەي قارجىلاي كومەك بولىپ تۇر, – دەيدى ەڭبەكقور اۋىل جىگىتى.
ەپتى جىگىت قوسىمشا كاسىپ رەتىندە جىمپيتىدا ينتەرنەت ساۋدانى دامىتسام دەپ تە نيەتتەنىپ ءجۇر. الداعى ۋاقىتتا ناۋبايحانا جانە شاشتاراز اشىپ, حالىققا قىزمەت كورسەتۋمەن دە اينالىسقىسى كەلەدى. قازىر جابدىقتار الۋ جاعىن ويلاستىرىپ جاتىر. ويىنىڭ جۇزەگە اسۋىنا ءبىر كومەگى بولار دەپ, سىرىم اۋداندىق حالىقتى جۇمىسپەن قامتۋ ورتالىعى جانىنان ۇيىمداستىرىلعان «باستاۋ» بيزنەس جوباسى اياسىندا كاسىپكەرلىك نەگىزدەرىنە وقىپ العان.
ايتپاقشى, دۋلات باقىت الەۋمەتتىك جەلىلەردە وزىنە ءتان ورنەگى بار ولەڭدەرىمەن دە تانىمال. سول ولەڭنىڭ ارقاسىندا بىلتىر سىرىم اۋدانىنان جولداما الىپ, «تانىلماعان تالانت» جوباسىنىڭ وبلىستىق كەزەڭىنە قاتىستى.
امان ءجۇر, دۇنيەنىڭ ءبىر كەتىگىنە كىرپىش سىندى قالانىپ جۇرگەن اۋىل اقىنى!
باۋىرجان شيرمەدين ۇلى
باتىس قازاقستان وبلىسى,
سىرىم اۋدانى
