15 قىركۇيەكتە لاس-ۆەگاستەگى T-Mobile ارەناسىندا وتەتىن GGG مەن كانەلو اراسىنداعى جەكپە-جەككە بيلەتتەر سانى از قالدى. Golden Boy Promotions كومپانياسىنىڭ پرەزيدەنتى ەريك گومەستىڭ ايتۋىنشا, ساتىلىمدا نەبارى 2000-نان استام بيلەت قالعان. ۇيىمداستىرۋشىلار ايقاسقا ەكى اي قالعاندا بارلىق بيلەتتەرى تۇگەلدەي ساتىلىپ كەتكەن ءبىرىنشى كەزدەسۋمەن سالىستىرا وتىرىپ, اندەركارد قۇرامى بەلگىلى بولعان بويدا رەماتچتىڭ بيلەتتەرىن قىركۇيەكتىڭ باسىنا دەيىن ساتىپ جىبەرۋگە ۇمىتتەنىپ وتىر.
«بيلەتتەر وتە جاقسى ساتىلىپ جاتىر, ەكى مىڭنان استام بيلەتىمىز عانا قالدى. قازىر تەك جارنامالاۋ كەزەڭى ءجۇرىپ جاتىر, سوندىقتان بارلىق بيلەتتەردى وسى ايدىڭ اياعىنا دەيىن نەمەسە كەلەسى ايدىڭ باسىنا دەيىن ساتۋدى جوسپارلاپ وتىرمىز. بىزگە كوپ سايىستارمەن باسەكەگە تۇسۋگە تۋرا كەپ تۇر. جاقىندا عانا الەم چەمپيوناتى (فۋتبولدان - اۆت.) اياقتالدى, الدا ءالى ۇفل, بەيسبولدان مەيدجەر ليگا جانە باسقالارى بار. بيلەتتەر ايقاسقا 1 اي قالعاندا بەلسەندى تۇردە ساتىلا باستايدى. ءبىز 17 500-دەن استام بيلەت ساتىپ ۇلگەردىك», - دەدى گومەس ESPN Deportes ارناسىنا بەرگەن سۇحباتىندا.
گولوۆكين مەن الۆارەستىڭ العاشقى كەزدەسۋىنەن تۇسكەن تابىس بيلەتتەردىڭ ساتىلۋ تاريحىندا ءۇشىنشى بولدى. جەكپە-جەككە ساتىلعان 19 318 بيلەتتەن 27 ميلليون دوللار تۇسكەن. بۇعان دەيىن فلويد مەيۆەزەردىڭ مەنني پاكياومەن وتكەن كەزدەسۋىنە 16 219 بيلەت ساتىلىپ, 72 ميلليون قارجى تۇسكەن ەدى. ودان كەيىن بوكسشىنىڭ كونور ماكگرەگورمەن جەكپە-جەگىنە 13 094 بيلەت ساتىلىپ, 55 ميلليون ءوندىرىلدى.
