مەملەكەتتىك حاتشى ەكى ەل كوشباسشىلارىنىڭ تىعىز ءارى ءوزارا سەنىمگە نەگىزدەلگەن ديالوگىنىڭ ارقاسىندا قازاقستان مەن يران اراسىنداعى قارىم-قاتىناستار جاڭا ساپالى دەڭگەيگە كوتەرىلگەنىن, سونداي-اق مەملەكەتتەر باسشىلارىنىڭ كەزەكتى كەزدەسۋى وسى اپتادا 5-ءشى كاسپي ءسامميتى اياسىندا وتەتىنىن ايتتى.
– ءبىز يرانمەن ساۋدا-ەكونوميكالىق ىنتىماقتاستىعىمىزدى كەڭەيتۋگە جانە نىعايتۋعا زور ءمان بەرەمىز, – دەدى گ.ابدىقالىقوۆا.
مەملەكەتتىك حاتشى قازاقستان پرەزيدەنتى نۇرسۇلتان نازارباەۆتىڭ 2016 جىلى تەگەران قالاسىنا ساپارى اياسىندا قابىلدانعان يندۋستريالىق-يننوۆاتسيالىق جانە ساۋدا-ەكونوميكالىق ىنتىماقتاستىق باعدارلاماسىنىڭ ىسكە اسىرىلۋ ناتيجەلەرىنە ارنايى توقتالدى. ول اۋىل شارۋاشىلىعى, ترانزيت جانە لوگيستيكا, جەر قويناۋىن پايدالانۋ جانە ونەركاسىپ سياقتى سالالاردى قامتيتىن, قۇنى 1,38 ميلليارد دوللار بولاتىن 48 جوبادان تۇرادى.
– 2018 جىلعى قاڭتار-مامىر ارالىعىنداعى ساۋدا اينالىمى 251,4 ميلليون دوللارعا جەتتى. بۇل كورسەتكىش بىلتىردىڭ وسى كەزەڭىمەن سالىستىرعاندا (177,4 ميلليون) 41,7 پايىزعا جوعارى. ەكسپورت 36,1 پايىزعا ءوسىپ, 207,2 ميلليون دوللارعا ارتسا, يمپورت 76 پايىزعا ۇلعايىپ, 44,2 ميليون دوللار بولدى, – دەدى گۇلشارا ابدىقالىقوۆا.
مەملەكەتتىك حاتشى ەۋرازيالىق ەكونوميكالىق وداق پەن يران اراسىندا ەركىن ساۋدا ايماعىن جاساۋعا ىقپال ەتەتىن ۋاقىتشا كەلىسىمگە قول قويىلعانىن اتاپ ءوتتى. ول پرەفەرەنتسيالىق ساۋدا رەجىمىن ورناتۋعا باعىتتالعان جانە دۇنيەجۇزىلىك ساۋدا ۇيىمى مەن حالىقارالىق قۇقىق نورمالارىنا ساي نەگىزدەلگەن. بۇل قازاقستان مەن يران اراسىنداعى ءوزارا ساۋدا-ساتتىقتىڭ تۇراقتى شارتتارى مەن ەرەجەلەرىن قالىپتاستىرادى.
– ءبىز ترانزيتتىك-تاسىمالداۋ, اۋىل شارۋاشىلىعى, سونىمەن قاتار جەر قويناۋىن پايدالانۋ سالاسىنداعى ىنتىماقتاستىقتى دامىتۋ ءۇشىن زور مۇمكىندىك بار ەكەنىن كورىپ وتىرمىز, – دەدى گ.ابدىقالىقوۆا.
كەزدەسۋ سوڭىندا مەملەكەتتىك حاتشى گۇلشارا ابدىقالىقوۆا ەلىمىزدەگى ديپلوماتيالىق ميسسياسىن اياقتاعالى وتىرعان يران يسلام رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى م.داميرچيلۋگە دوستاس مەملەكەتتەر اراسىنداعى ءوزارا ءتيىمدى ىنتىماقتاستىقتى نىعايتۋعا زور ۇلەس قوسقانى ءۇشىن ريزاشىلىعىن ءبىلدىرىپ, جاڭا لاۋازىمداعى قىزمەتىنە ساتتىلىك تىلەدى.
