ەلباسى جولداۋىنداعى «تسيفرلىق قازاقستان» باعدارلاماسى اياسىندا جۇزەگە اسقان جوبا اتىراۋ وبلىستىق دەنساۋلىق ساقتاۋ باسقارماسىنىڭ قولداۋىمەن اتىراۋ قان ورتالىعىنا ەنگىزىلدى. «ينفو-دونور» ىسكە قوسىلعان 1 اي كولەمىندە 656 ادام ەلەكتروندى تىركەۋدەن ءوتىپ, دونور بولۋعا نيەتتى ەكەندەرىن بىلدىرگەن. ونىڭ 473-ءى قان تاپسىرۋعا جارامدى بولعان.
«ينفو-دونور» باعدارلاماسى تەك جەكە كۋالىك ارقىلى دونوردىڭ ورتالىقتاعى مارشرۋتتارىن اۆتوماتتى تۇردە انىقتاپ, رەتتەپ وتىرادى. ياعني, تىركەۋ ءبولىمى – الدىن-الا تەكسەرۋ زەرتحاناسى – تەراپەۆت قابىلداۋ – قان تاپسىراتىن زال. دونور وسى باعىتتار بويىنشا ءجۇرىپ, بارلىق بولىمدەرگە دونور تىركەۋدەن وتكەننەن كەيىن ول تۋرالى اقپارات جەدەل ەلەكتروندى تۇردە جەتەدى.
-اتالعان باعدارلاما ىسكە قوسىلعالى جۇمىسىمىز جەڭىلدەدى. ماماندار جەدەل تۇردە كەزەكتەگى دونوردى قابىلداپ, اناليزدەرىن انىقتاپ, قان تاپسىرۋعا جىبەرەدى. دونوردىڭ ساراپتاما ناتيجەلەرى, جۇمىستىڭ ورىندالۋ بارىسى جۇيەدە باقىلاۋدا بولادى. تۇرعىنداردىڭ دا ۋاقىتىن ۇنەمدەۋىنە قولايلى,-دەيدى قان ورتالىعىنىڭ ديرەكتورى جاڭگىرحان باحونوۆ.
باعدارلاما ارقىلى اتىراۋ وبلىسىندا تىركەۋدە تۇرعان دونور جەكە كۋالىگى ارقىلى جۇيە ىسكە قوسىلعان قازاقستاننىڭ باسقا قالالارىندا دا تەكسەرىلىپ, دونور بولا الادى.
