ء«نولىنشى سىنىپتارعا قابىلدانۋ ءۇشىن ەشقانداي ەمتيحاندار تاپسىرۋ قاجەت ەمەس. ەگەر بالا 5 جاسقا تولسا جانە وقۋعا قۇلشىنىسى بولسا, وندا ءبىلىم الۋ ءۇشىن ەشقانداي دە كەدەرگى بولماۋى كەرەك», — دەدى ا. ايماعامبەتوۆ.
ۆيتسە-مينيستر ءنولىنشى سىنىپتارعا قابىلداۋ كەزىندە وزەكتى بولىپ وتىرعان ماسەلە — ۇسىنىلاتىن قۇجاتتار پاكەتى ەكەنىن ايتتى, مۇندا كەيدە زاڭسىز تۇردە اتا-انالاردىڭ جۇمىس ورنىنان انىقتامالار سۇرايتىن جاعدايلار دا ورىن الۋدا.
«مەكتەپتەردىڭ نەگىزسىز تۇردە جۇمىس ورنىنان سۇراتاتىن انىقتامالارى – زاڭسىز. قانداي قۇجاتتار قاجەت ەكەنى تۋرالى ناقتى جازىلعان ستاندارت بار, وندا جۇمىس ورنىنان تالاپ ەتىلەتىن انىقتاما تۋرالى جازىلماعان», — دەپ ءتۇسىندىردى قر بعم وكىلى.
سونداي-اق, جۋرناليستەردىڭ سۇراقتارىنا جاۋاپ بەرە وتىرىپ, ۆيتسە-مينيستر مينيسترلىك مەكتەپتەرگە وقۋشىلاردى قابىلداۋدىڭ جاڭا تيپتىك ەرەجەلەرى بەكىتىلگەنىن ايتتى.
«بۇگىندە كەيبىر مەكتەپتەردە ءالى كۇنگە دەيىن وقۋشىلار سانى شامادان تىس. قازاقستان بويىنشا 118 مەكتەپ ءۇش اۋىسىمدا ساباق بەرەدى. اسىرەسە, ەلوردا مەكتەپتەرىنە وقۋشىلاردى قابىلداۋ ماسەلەسى وزەكتى بولىپ وتىر, مۇندا جىل سايىن ءبىرىنشى سىنىپ وقۋشىلارىنىڭ سانى 15 مىڭ بالاعا ۇلعايۋدا», — دەدى ول.
سونىمەن قاتار, ا. ايماعامبەتوۆ ۇبت مەن كەشەندى تەستىلەۋدى بىرىكتىرۋدىڭ ىقتيمال كەلەشەگى تۋرالى ايتىپ بەردى.
«2017 جىلعا دەيىن ۇبت ەكى فۋنكتسيانى اتقاردى – مەكتەپتەگى وقۋدى اياقتايتىن قورىتىندى ەمتيحان جانە جوعارى وقۋ ورىندارىنا ءتۇسۋ ەمتيحانى. بۇگىندە ۇبت ەكى بولىككە بولىنگەننەن كەيىن, بالا اتتەستات الۋ ءۇشىن مەكتەپتە ەمتيحان تاپسىرادى جانە بۇدان بولەك بىرىڭعاي ۇلتتىق تەستىلەۋدەن وتەدى. كت دا وسىنداي فۋنكتسيا اتقارادى, الايدا 2 اپتادان كەيىن وتەدى. ەگەر ەكى تەست تە بىردەي فۋنكتسيانى اتقارسا جانە ولارعا ءبىر ادامدار قاتىسا الاتىن بولسا, الداعى ۋاقىتتا كەشەندى تەستىلەۋدى وتكىزۋدىڭ قاجەتتىگى جوق دەۋگە بولادى.
بۇل مەملەكەت ءۇشىن وتە ۇلكەن شىعىن, ويتكەنى ءبىز كوميسسيانى ءبىر رەت جىبەرىپ, كەيىن قايتا جىبەرۋىمىز كەرەك. بۇل بەلگىلى ءبىر كۇشتەردى, اۋديتوريانى جانە ت.ب. جۇمىلدىرۋدى قاجەت ەتەدى. جالپى العاندا, ۇبت-عا قاتىستى ۇسىنىستاردى قوسا العاندا, بارلىق وزەكتى ماسەلەلەر مۇعالىمدەردىڭ تامىز جيىنىندا تالقىلاناتىن بولادى. ارىپتەستەرىمىزدىڭ پىكىرىن تىڭدايمىز جانە بەلگىلى ءبىر داۋلى ماسەلەلەر بويىنشا كەلىسىمگە كەلەمىز», — دەدى ا. ايماعامبەتوۆ.
ەسكە سالا كەتەيىك, بۇگىن قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا قر ءبىلىم جانە عىلىم ءمينيسترى ەرلان ساعاديەۆ پەداگوگتەر قاۋىمى مەن اتا-انالار تاراپىنان تۇسكەن ۇبت مەن كت پروتسەسىن جەتىلدىرۋگە قاتىستى ۇسىنىستاردى جەتكىزدى. وسىلايشا, ۇبت مەن كت-نى بىرىكتىرۋ, ۇبت وتكىزۋ پروتسەسىنەن مەكتەپ مۇعالىمدەرىن بوساتۋ, مەكتەپتەردە سىناما تەستىلەرىن وتكىزبەۋ, مەملەكەتتىك ءبىلىم گرانتتارىن وقۋ تىلدەرىنە بولمەي تاعايىنداۋ جانە ت.ب. ماسەلەلەر قارالىپ جاتىر.
