وسى ماقساتتا, 2015 جىلدان بەرى اۆتوموبيل جولدارىن سالۋ جانە رەكونسترۋكتسيالاۋ جۇمىستارىن قارقىندى دامىتۋدى كوزدەيتىن «نۇرلى جول» مەملەكەتتىك ينفراقۇرىلىمدى دامىتۋ باعدارلاماسى جۇزەگە اسىرىلۋدا. اتالعان مەملەكەتتىك باعدارلاما اياسىندا شىعىس قازاقستان وبلىسىنىڭ اۆتوجولدارىن دامىتۋعا باعىتتالعان اۋقىمدى جوبالار ىسكە اسىرىلىپ كەلەدى. اتاپ ايتار بولساق, رەسپۋبليكالىق جەلىنىڭ نەگىزگى دالىزدەرى بولىپ تابىلاتىن «قالباتاۋ – مايقاپشاعاي» (415 كم), «تاسكەسكەن – باقتى» (20 كم), «پاۆلودار – سەمەي – قالباتاۋ» (125 كم), «وسين اسۋى» (32 كم), «تالدىقورعان – وسكەمەن» (449 كم) باعىتتارىنداعى اۆتوجولداردى رەكونسترۋكتسيالاۋ جوبالارى جۇزەگە اسىرىلۋدا.
بيىل شىعىس قازاقستان وبلىسىنىڭ رەسپۋبليكالىق ماڭىزى بار اۆتوموبيل جولدارىن دامىتۋ جانە جوندەۋ جۇمىستارىنا 34,7 ملرد تەڭگە كولەمىندە قاراجات ءبولىندى, سونىڭ ىشىندە 27,1 ملرد تەڭگە رەسپۋبليكالىق ماڭىزى بار اۆتوجولدارعا جانە 7,6 ملرد تەڭگە جەرگىلىكتى ماڭىزداعى اۆتوجولدارعا باعىتتالعان. اتالعان جوبالار اياقتالعاننان كەيىن شىعىس ءوڭىرىنىڭ تۇرعىندارىن وبلىس ورتالىقتارمەن جانە ماڭىزدى اكىمشىلىك ورتالىقتارمەن بايلانىستىراتىن ساپالى اۆتوموبيل جولدارىمەن قامتاماسىز ەتۋگە تولىق مۇمكىندىك بولادى.
جوعارىدا اتالعان «نۇرلى جول» مەملەكەتتىك باعدارلاماسىندا «سەمەي-قاينار» اۆتوموبيل جولىن رەكونسترۋكتسيالاۋ جۇمىستارى قاراستىرىلماعان. سول سەبەپتى, «سەمەي-قاينار» اۆتوموبيل جولىنىڭ تەحنيكالىق جاي-كۇيى جىل سايىنعى بولىنەتىن قاراجات ەسەبىنەن اعىمداعى جوندەۋ جانە كۇتىپ ۇستاۋ جۇمىستارى شەڭبەرىندە ساقتالۋدا. وتكەن جىلى «سەمەي-قاينار» اۆتوجولىنداعى اششىسۋ وزەنى ارقىلى وتەتىن كوپىر كۇردەلى جوندەۋدەن ءوتتى. وعان رەسپۋبليكالىق بيۋدجەتتەن 168 ملن تەڭگە قارجى بولىنگەن بولاتىن. سونداي-اق وسى اۆتوجولدىڭ ۇزاقتىعى 13 كم ۋچاسكەسىنە رەسايكلينگ ءادىسىن قولدانۋ ارقىلى ورتاشا جوندەۋ جۇمىستارى جۇرگىزىلدى. وعان 213 ملن تەڭگە ءبولىندى.
2018 جىلعى جوندەۋ جۇمىستارىنىڭ جوسپار جوباسىن قۇرۋ كەزىندە «سەمەي-قاينار» اۆتوجولىنىڭ 38 شاقىرىمىنا جوندەۋ جۇمىستارىن جۇرگىزۋ قاراستىرىلعان بولاتىن. الايدا بيۋدجەتتەن بولىنگەن قاراجاتتىڭ شەكتەۋلى بولۋىنا بايلانىستى شىعىس قازاقستان وبلىسىنىڭ رەسپۋبليكالىق ماڭىزى بار باسىم اۆتوجول ۋچاسكەلەرى انىقتالىپ, «سەمەي-قاينار» اۆتوجولى جوندەۋ جوسپارىنا قوسىلعان جوق. دەگەنمەن جىل سايىنعى كۇتىپ ۇستاۋ جۇمىستارى شەڭبەرىندە اۆتوجولدىڭ تەحنيكالىق جاي-كۇيىن ساقتاۋعا باعىتتالعان جول شۇڭقىرلارىن جوندەۋ, شاعىل تاس جابىندى ۋچاسكەلەردى تەگىستەۋ سياقتى جۇمىستار جۇرگىزىلەدى. مىسالى, وتكەن جىلى اتالعان اۆتوجولدىڭ اۋدانى 65 مىڭ م2 ۋچاسكەسىنە جول شۇڭقىرلارىن جوندەۋ جۇمىستارى جۇرگىزىلگەن بولسا, بيىل 81 مىڭ م2 جول شۇڭقىرلارىن جوندەۋ, 21 مىڭ م2 مارشرۋتتى تاسىلمەن جوندەۋ, 119 مىڭ م2 شاعىل تاستى جابىندىنى تەگىستەۋ جۇمىستارى جۇرگىزىلۋدە.
الداعى ۋاقىتتا بيۋدجەتتىك قاراجاتتىڭ ءبولىنۋ مۇمكىندىگىنە قاراي «سەمەي – قاينار» اۆتوجولىن جوندەۋ ماسەلەسى قارالاتىن بولادى.
جول جوندەۋ جۇمىستارى جۇرگىزىلگەنگە دەيىن, اۆتوجولداردىڭ تەحنيكالىق جاي-كۇيى كۇتىپ ۇستاۋ ەسەبىنەن ساقتالىپ, اۆتوكولىك قۇرالدارىنىڭ قاۋىپسىز جانە ۇزدىكسىز قوزعالىسىن قامتاماسىز ەتەدى, دەلىنگەن اتالعان رەسمي جاۋاپ حاتتا.
