زارداپ شەككەن تاراپتىڭ ءوتىنىشى بويىنشا ساراپتامالىق زەرتتەۋلەرگە رەسەي فەدەراتسياسىنىڭ, قىرعىز رەسپۋبليكاسىنىڭ جانە گرۋزيانىڭ جەكە جانە مەملەكەتتىك ساراپشىلارى تارتىلدى. سونداي-اق, ماماندار رەتىندە ناقتى مامانداندىرىلعان بالالار دارىگەرلەرى دە شاقىرىلعان. ءىس بويىنشا بارلىعى 14 كەشەندى سوت ساراپتاماسى مەن 4 زەرتتەۋ جۇرگىزىلگەن. قر قىلمىستىق كودەكسىنىڭ 15-بابى 2-تارماعىنا سايكەس جىنىستىق زورلىق-زومبىلىق ءۇشىن جاۋاپكەرشىلىك 14 جاستان باستالادى. ء«تورت كۇدىكتىنىڭ اراسىندا ءبىر عانا ءجاسوسپىرىم 14 جاسقا تولعان. ونىڭ ءىس-ارەكەتتەرى قر قىلمىستىق كودەكسىنىڭ 121-بابى 4-بولىگى (جاس بالاعا قاتىستى جىنىستىق سيپاتتاعى زورلىق-زومبىلىق ارەكەتتەر) بويىنشا باعالاندى. قالعان كۇدىكتىلەردىڭ 14 جاسقا تولماۋىنا بايلانىستى قىلمىستىق ءىس توقتاتىلدى», - دەلىنگەن رەسمي حابارلامادا.
باس پروكۋراتۋرانىڭ حابارلاۋىنشا, قىلمىسقا قاتىسۋشىلاردىڭ كامەلەتتىك جاسقا تولماۋىنا جانە وزگە دە سەبەپتەرگە بايلانىستى ءىستىڭ ءمان-جايىن تولىق جاريالاۋعا بولمايدى. قىلمىستىق-پروتسەستىك كودەكستىڭ 532-بابىنا سايكەس, كامەلەتكە تولماعانداردىڭ قۇپيالىلىققا قۇقىعى قىلمىستىق پروتسەستىڭ بارلىق ساتىلارىندا ساقتالۋى ءتيىس. «سونىمەن بىرگە جەكە ومىرگە قول سۇقپاۋشىلىقتىڭ ءاربىر ازاماتتىڭ كونستيتۋتسيالىق قۇقىعى ەكەنىن, ونىڭ مەملەكەت قورعاۋىندا ەكەنىن ەسكە سالامىز. قر قىلمىستىق كودەكسىنىڭ 147-بابىندا تۇلعانىڭ جەكە ءومىرى نەمەسە وتباسىلىق قۇپياسى تۋرالى اقپاراتتى باق-تا نەمەسە تەلەكوممۋنيكاتسيا جەلىلەرىندە تاراتۋ ءۇشىن قىلمىستىق جاۋاپكەرشىلىك كوزدەلگەن», - دەپ اتاپ ءوتتى قر باس پروكۋراتۋراسى.
