ەرلەر اراسىندا ريو وليمپياداسىنىڭ قولا جۇلدەگەرى, الەم جانە ازيا چەمپيونى, ازيا ويىندارىنىڭ جەڭىمپازى ەلدوس سمەتوۆ (60 كەلى) باستاعان جىگەرلى جىگىتتەر ەردىڭ ەرلىگى ەمەس, ەلدىڭ ەلدىگى سىنعا تۇسەر ساتتە ەش ايانىپ قالمايمىز دەپ الاقاندارىن ىسقىلاپ وتىر. وليمپيا ويىندارىندا بەلدەسىپ, ءتۇرلى حالىقارالىق دودالاردا دارالانىپ جۇرگەن جانساي سماعۇلوۆ (73 كەلى), ديدار حامزا (81 كەلى) جانە يسلام بوزباەۆ (90 كەلى) تا ءوز مۇمكىندىگىمىزدى قالت جىبەرمەيمىز دەپ قۇلشىنۋدا. كوپتى كورگەن كانىگى بالۋاندار ەلدوس جۇماقانوۆ (66 كەلى) پەن ۆيكتور دەميانەنكونىڭ دا (100 كەلى) دامەلەرى زور. ولار دا ازيادانىڭ ءبىر جۇلدەسىن ءىلىپ اكەتۋگە ءازىر. سونىمەن قاتار, سانجار جاببوروۆ (+100 كەلى) پەن ەراسىل قاجىباەۆ (ارالاس كوماندالىق سايىس) سىندى تاستۇلەكتەرگە سەنىم ارتىلىپ وتىر.
-ءبىزدىڭ دزيۋدوشىلار ازيا ويىندارىنا تىڭعىلىقتى دايارلاندى. وسى جارىس قارساڭىندا بىرقاتار گران-پري جانە گراند سلەم دودالارىنا قاتىستىق. سولاردىڭ اراسىنان ىرىكتەلىپ شىققانداردى جىلدىڭ باستى باسەكەسىنە قوسۋدى قۇپ كوردىك. قازىرگى كەزدە ششۋچينسك قالاسىنداعى «جاقسى» بازاسىندا جاتتىعۋ جۇمىستارىن وتكىزىپ جاتىرمىز. بۇيىرتسا, ەرلەر كومانداسى جاكارتادا ءبىر التىن, ءبىر كۇمىس جانە ءبىر قولا مەدالدى يەلەنۋدى كوزدەپ وتىر, – دەيدى ۇلتتىق قۇرامامانىڭ باس باپكەرى ايدىن سماعۇلوۆ.
ال ايەلدەر سايىسىندا وتگونتسەتسەگ گالبادراح (48 كەلى), كامشات قاراسايقىزى (52 كەلى), سەۆارا نىشانباەۆا (57 كەلى), يولانتا بەردىبەكوۆا (63 كەلى), زەرە بەكتاسقىزى (70 كەلى), زارينا رايفوۆا (78 كەلى) جانە گۇلجان يسانوۆا (+78 كەلى) بوز كىلەمگە شىعادى. وسى بالۋاندار اراسىنان وليمپيا ويىندارىنىڭ قولا جۇلدەگەرى وتگونتسەتسەگ گالبادراح پەن قۇرلىقتىڭ جارىستاردا ۇنەمى جۇلدەگەرلەر قاتارىنان كورىنىپ جۇرگەن گۇلجان يسانوۆاعا ارتىلار سەنىم زور.
وتكەنگە زەر سالساق, قازاقستاننىڭ دزيۋدوشىلارى ازيا ويىندارىندا تابىستى ونەر كورسەتىپ جۇرگەنىن اڭعارۋ قيىن ەمەس. ماسەلەن, 1994 جىلى وتانداستارىمىز ەكى كۇمىس جانە ءۇش قولا مەدالدى يەلەندى. حيروسيمادا يۆان كارەزەليدي مەن سەرىك ءالىمجانوۆ فينالدا ۇتىلسا, سەرىك شاكىموۆ, سەرىك ادىعانوۆ جانە يبراگيم ۆەشاگۋروۆ ءۇشىنشى ورىنعا تابان تىرەدى.
1998 جىلى بانگكوكتاعى جارىستى التى مەدالمەن قورىتىندىلادىق. اتاپ ايتساق, يۆان باعلاەۆ پەن ۆارۆارا ماسياگينا كۇمىس السا, نۇربول سۇلەيمەنوۆ, ۆياچەسلاۆ بەردۋتا, رۋسلان سەيىلحانوۆ جانە سەرىك شاكىموۆ قولاعا قول سوزدى.
2002 جىلى پۋساندا بازاربەك دونباي تەك اقتىق ايقاستا ۇتىلسا, اسحات جيتكەەۆ, ۆياچەسلاۆ بەردۋتا جانە شولپان كاليەۆا ءۇشىنشى ساتىعا جايعاستى.
2006 جىلى دوحادا التى جۇلدەنى ولجالادىق. ماكسيم راكوۆ پەن الماس اتاەۆ كۇمىسپەن كۇپتەلسە, اسحات جيتكەەۆ ەكى مارتە جانە سالامات وتارباەۆ پەن ەلدوس ىقسانعاليەۆ ءبىر-ءبىر رەتتەن قولا مەدالدى ەنشىلەدى.
2010 جىلى گۋانجوۋدا جالاۋى جەلبىرەگەن ءدۇبىرلى دودادا يسلام بوزباەۆ كۇمىسكە قول جەتكىزسە, ماكسيم راكوۆ, گۇلجان يسانوۆا جانە گاليا ۇلمەنتاەۆا قولا جۇلدەنى كەۋدەلەرىندە جارقىراتتى.
2014 جىلى ينچحونداعى جارىستا ەلدوس سمەتوۆ وتاندىق دزيۋدوشىلاردىڭ اراسىنان ءبىرىنشى بولىپ, ازيا ويىندارىندا قازاقستاننىڭ ءانۇرانىن شىرقاتتى. ماكسيم راكوۆ پەن ەرلەر قۇراماسى ەكىنشى ورىنعا تۇراقتاسا, ازامات مۇقانوۆ, لەناريا مەڭعازوۆا جانە ماريام ورداباەۆا ءۇشىنشى ساتىعا تابان تىرەدى.
عالىم سۇلەيمەن,
«ەگەمەن قازاقستان»
الماتى
